މިއަދު ހެނދުނު އދ. މާމިގިއްޔަށް ދަތުރުކުރި، ވިލާއެއާ ފްލައިޓް، މޫސުން ގޯސްވުމުގެ ސަބަބުން އެބުރި މާލެ އިންޓަނޭޝަނަލް އެއާޕޯޓުގައި ޖައްސަައިފިއެވެ.
ވައިގެ އުދުހުންތަކުގެ މައުލޫމާތު އެނގޭ ފްލައިޓް ރާޑާއިން ދައްކާ ގޮތުން މާލެ އިން ފުރައިގެން މާމިގިއްޔަށް ދަތުރުކުރި ފްލައިޓްވަނީ ރަންވޭގައި ޖެއްސުމަށް ވަރަށް ގިނަ އިރު މަސައްކަތްކޮށްފައެވެ. އެއް ގަޑިއިރު ވަންދެން މަތީގައި އުދުހުމަށްފަހު ރަންވޭގައި ޖެއްސޭނެ ގޮތެއް ނެތުމުން ފްލައިޓް ވަނި އަބުރާ މާލެ ގޮސްފައެވެ.
މިދުވަސްވަރަކީ ރާއްޖެއަށް ވަރަށް ބޮަޑަށް ވިއްސާރަ ދުވަސްވަރަކަށް ވާއިރު ކަނޑުދަތުރުފަތުރުގެ އިތުރުން ވައިގެމަގުން ކުރާ ދަތުރުތަކަށްވެސް ވަނީ ބުރޫއަރާފައެވެ. މިޑް ޓާމް ބްރޭކް ނިމި ގިނަ ބަޔަކު ދަތުރުކުރާ މި ދުވަސްވަރު ކަނޑު ގަދަވުމުގެ ސަބަބުން ދަތުރުތައް ކެންސަލްކުރަމުން އަންނައިރު، ފްލައިޓްތައް ޑިލޭވުމުގެ މައްސަލަވެސް އަންނަނީ ފެންމަތިވަމުންނެވެ.
މެޓް އޮފިީހުން ވަނީ ކ.އަތޮޅުން ފެށިގެން ތ.އަތޮޅަށް ރީދޫ ސަމާލު ނެރެފައެވެ. އަދި ބޯކޮށް ވާރޭވެހުމާއެކު ގުގުރުމާއެކު ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް މެޓުން ވަނީ ލަފާކޮށްފައެވެ.