ލަމްހާ ބަންދުން ދޫކޮށްލި މައްސަލަ އަލުން ބަލަން ސުޕްރީމްކޯޓުން އަންގާފައިވާ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފިއެވެ.
އެ އޮފީހުން ބުނީ މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ދައުވާ ލިބޭ ހަލީމަތު ލަމްހާ ބަންދުން ދޫކޮށްލި މައްސަލަ ނުބަލަން ހައި ކޯޓުން ނިންމި ނިންމުން ގޯސްކޮށް ކަމަށް ސުޕްރީމް ކޯޓުން ނިންމައި, އެ މައްސަލަ ބަލަން އެ ކޯޓުން އަންގާފައިވާ ކަމަށެވެ.
އެގޮތުން މި މައްސަލަ 10 ދުވަސްތެރޭގައި ހުށައަޅައިފިނަމަ މައްސަލަ ބަލައިގަތުމަށް ހައިކޯޓަށް އަންގާފައިވާ ކަމަށާއި 10 ދުވަސް ތެރޭގައި މައްސަލަ ހައި ކޯޓަށް އަށް ހުށައަޅާނެ ކަމަށް އެ އޮފީހުން ބުނެފައިވެއެވެ.
ލަމްހާ ހުރީ ޝަރީއަތް ނިމެންދެން ބަންދުކޮށްފައެވެ. ނަމަވެސް އޭނާ ބަންދުން ދޫކޮށްލަން ކްރިމިނަލް ކޯޓުން ނިންމީ މިދިޔަ އަހަރުގެ ނޮވެމްބަރު މަހުގެ 12 ގައި ހަ ޝަރުތެއް ކުރުމަށްފަހު އެވެ. އެ ޝަރުތު ތަކަކީ:
- އޭނާ ރާއްޖެއިން ފުރައިގެން ނުދިއުން.
- ގާނޫނާ ހިލާފު އަމަލެއް ނުކުރުން.
- ކޯޓަށް ގަޑިއަށް ހާޒިރުވުން.
- ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުން.
- މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުން.
- ވަކި ގަޑިތަކެއްގައި ގޭގައި ހުރުމަށް .
މީގެ ކުރިން ވެސް ލަމްހާ ބަންދުން ދޫކޮށްލުމުން ދައުލަތުން ހައިކޯޓުގައި މައްސަލަ އިސްތިއުނާފުކޮށް އަލުން ހައްޔަރު ކޮށްފައިވެއެވެ.
މޭރީ ގްރޭސް އަކީ އައިޖީއެމްއެޗްގައި މަސައްކަތް ކުރި ފިލިޕީންސް ނަރުހެކެވެ.
ލަމްހާގެ އިތުރުން މޭރީ ގްރޭސްގެ މަރުގެ މައްސަލައިގައި މޭރީގެ ފިރިމީހާ މާވިން އެސްވައިގެ މައްޗަށް ވެސް ދައުލަތުން ދައުވާ ކުރެއެވެ.