އައްޑޫ ސިޓީގެ ސެންޓްރަލް ޕަވަރ ޕްލާންޓްގެ 1 މެގަވޯޓުގެ ޖެނެރޭޓާ ސެޓަކަށް ދިމާވި މައްސަލަ އާ ގުޅިގެން އެކަން ހައްލު ކުރަން މަސައްކަތްކުރަމުން ގެންދާކަމަށް ފެނަކަ ކޯޕޮރޭޝަން އިން ބުނެފި އެވެ.
ފެނަކައިން އެކްސްގައި ކުރި ޕޯސްޓެއްގައި ބުނީ 1 މެގަވޯޓުގެ ޖެނެރޭޓާ ސެޓަކަށް ދިމާވި މައްސަލަ އާ ގުޅިގެން، ތާވަލު ކުރެވިގެން ލޯޑު މަތިވާ ގަޑިތަކުގައި ސިޓީގެ ގުޅިފައިވާ ރަށްތަކުން ކަރަންޓު ކަނޑަން ޖެހިފައިވާ ކަމަށެވެ.  އަދި މައްސަލަ ޖެހުނު 1 މެގަވޯޓުގެ ޖެނެރޭޓާގެ މައްސަލަ ހައްލު ކުރުމުގެ މަސައްކަތަކުގެ އިތުރުން 2 މެގަވޯޓުގެ ޖެނަރޭޓާ ސެޓް މަރާމާތު ކުރުމުގެ މަސައްކަތް ވެސް ކުރަމުން ދާކަން ފެނަކައިން ވަނީ ފާހަގކޮށްފަ އެވެ. އަދި އެކަމުގެ ސަބަބުން ފެނަކައިން ވަނީ  އައްޑޫ ސިޓީގެ ރައްޔިތުންނަށް ދިމާވާނެ ދަތިތަކަށް ނިހާޔަތައް މާއްފަށް ވެސް އެދިފަ އެވެ.
ރޯދަ ވީއްލާ ގަޑިއާ ދިމާކޮށް ކަރަންޓު ކެންޑެމުންދާތީ ގިނަ ބަޔަކު އެކަމާ ކަންބޮޑުވުން ފާޅުކުރަމުން ދެ އެވެ.
ފެނަކައިން  ބުނީ މިމައްސަލަ ހައްލުކުރުމަށް ހަފުތާއެއް ވަރު ހޭދަވާނެކަމަށް ލަފާކުރެވޭކަމަށެވެ. އަދި މި މުއްދަތުގައި ވީހާވެސް މަދުން ކަރަންޓު ބޭނުންކުރުމަށް ފެނަކައިން ވަނީ އިލްތިމާސްކޮށްފަ އެވެ.