ދިވެހި ރައްޔިތުން ބޭނުންވާ ގޮތަށް ކަންކަން ކޮށްދޭނެ ކެންޑިޑޭޓަކަށް ހުރީ ޖުމްހޫރީ ޕާޓީގެ ލީޑަރު ގާސިމް އިބްރާހިމް ކަމަށް އެމަނިކުފާނުގެ ރަނިންމޭޓު އަދި އެ ޕާޓީގެ ޑެޕިއުޓީ ލީޑަރު ޑރ. އަމީން އިބްރާހިމް ވިދާޅުވެއްޖެ އެވެ.
ގާސިމްގެ ރަނިންމޭޓަކަށް އަމީން ހަމަޖެއްސުމަށްފަހު މިއަދު ނޫސްވެރިންނާއެކު ބޭއްވި ބައްދަލުވުމުގައި ވާހަކަ ދައްކަވަމުން އަމީން ވިދާޅުވީ ރިޔާސީ އިންތިހާބަށް ވާދަކުރައްވާ ކެންޑިޑޭޓުންގެ ތެރެއިން ރައްޔިތުން ބޭނުންވާ ފެންވަރަށް، ރައްޔިތުން ބޭނުންވާ ގޮތަށް ކަންކަން ކޮށްދޭނެ އެހެން އެއްވެސް ލީޑަރެއް ރާއްޖެއަކު ނެތް ކަމަށެވެ.
އޭނާ ވިދާޅުވީ ގައުމުގެ މުސްތަގުބަލް އުޖާލާކޮށް، ގައުމަަށް ހަމަޖެހުން ގެންނަން ބޭނުންނަމަ މިފަހަރު ހޮވަންވީ ގާސިމް ކަމަށެވެ.
"ރައްޔިތުންނަށް އުންމީދެއް ގެނެސްދޭނަމަ އެ އުންމީދެއް ގެނެސްދޭނެ މީހަކީ އަޅުގަނޑުމެންގެ ކެންޑިޑޭޓޭ. އެ ކެންޑިޑޭޓަކީ އަޅުގަނޑުމެންގެ ކެންޑިޑޭޓް، ގާސިމް އިބްރާޙިމް،" އަމީން ވިދާޅުވި އެވެ.
އަމީން ވިދާޅުވީ ރާއްޖެ މިހާރު މި އޮތް ހިސާބުން އެހެން ހިސާބަކަށް ގެންގޮސް ރާއްޖޭގައި ހުރި ބޮޑެތި މައްސަލަތައް ހައްލު ކުރަން ބޭނުންނަމަ ކުރަން ޖެހޭ ކަމަކީ ގާސިމަށް ވޯޓު ދީގެން ރައީސްކަމަށް ހޮވުން ކަމަށް އޭނާ ވިދާޅުވި އެވެ.
"ވަކިވަކި ފަރުދުންނަށް ދިމާވާ ދަތި ހާލުތަކުގައި އެހީތެރިވާ ދެވަނަ އިންސާނަކު، އެފަދަ އެހީތެރިކަމެއް ދެއްވަވާ، އަމިއްލަ ޖީބުން ހަރަދު ކުރައްވައިގެން އެ ކަންކަން ހައްލު ކޮށްދެއްވާ ދެވަނަ ބޭފުޅަކު އަޅުގަނޑަށް ފެންނާކަށް ނެތް. އެއިން އަންގައިދެނީ ރައްޔިތުންނަށް އެފަދަ ހާލަތެއް ދިމާވެއްޖެނަމަ އެންމެ ކައިރީގައި، އެ މީހެއްގެ ހިތަށް، އެ މީހެއްގެ ސިކުނޑިއަށް މި ވަންނަނީ ގާސިމް އިބްރާހިމް،" އަމީން ވިދާޅުވި އެވެ.
Gasim ge running mate akee Dr. Ameen ibrahim
The most trusted news source in the Maldives
Mihaaru
އޭނާ ވިދާޅުވީ ގާސިމަށް ސަރުކާރެއް ހިންގަން ލިބިއްްޖެނަމަ އެހީތެރިވުމުގެ ކަންކަން މާ ފުރިހަމަށް ކޮށްދެއްވާނެ ކަމަށެވެ.
"ގާސިމަށް ސަރުކާރެއް ހިންގަން ލިބިއްޖެނަމަ އެ ކަންކަން މާ ފުރިހަމައަށް، މާ ރަނގަޅަށް ކޮށްދެއްވާނެ ކަމުގެ ޔަގީންކަން އަޅުގަނޑަށް އޮތީމަ އަޅުގަނޑު ގާސިމްގެ ފަހަތުގައި މަސައްކަތް ކުރައްވަން މި މަގާމުގައި މި ފުރުސަތުގެ ބޭނުން މި ހިފީ،" އަމީން ވިދާޅުވި އެވެ.
އަންނަ މަހުގެ ނުވަވަނަ ދުވަހު ބާއްވާ ރިޔާސީ އިންތިހާބުގައި ޖޭޕީގެ އިތުރުން ވާދަ ކުރައްވަން ނިންމަވާފައި ވާކަން އިއުލާން ކުރައްވާފައި ވަނީ އެމްޑީޕީގެ ފަރާތުން ރައީސް އިބްރާހިމް މުހައްމަދު ސޯލިހާއި އެމްއާރުއެމްގެ ރައީސް ފާރިސް މައުމޫނާއި ޑިމޮކްރެޓްސްގެ ކެންޑިޑޭޓެއްގެ ގޮތުގައި މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބްގެ އިތުރުން އެމްއެންޕީގެ ފަރާތުން ދަނގެތި ދާއިރާގެ މެމްބަރު މުހައްމަދު ނާޒިމެވެ.
ޕީޕީއެމުން ކުރީގެ ރައީސް އަބްދުﷲ ޔާމީން ނެރެން ނިންމާފައިވާ ނަމަވެސް މިއަދު ސުޕްރީމް ކޯޓުން ހުކުމް ކުރީ ޔާމީންގެ މައްޗަށް އޮތް ޖަލު ހުކުމުގެ ސަބަބުން އެ މަނިކުފާނުގެ ރިޔާސީ ކެންޑިޑެސީ ބަލައިނުގަތުމަށް އީސީން ނިންމީ ރަނގަޅަށް ކަމަށެވެ. ޔާމީން ވަނީ އެމަނިކުފާނަށް އިންތިހާބުގައި ވާދަނުކުރެއްވޭތީ ރިޔާސީ އިންތިހާބު ބޮއިކޮޓް ކުރަން ޕީޕީއެމް/ޕީއެންސީ އަށް އަންގަވައިފަ އެވެ.
ނަމަވެސް އެ ދެ ޕާޓީގެ ޖޮއިންޓު ސެނެޓުން ނިންމާފައި ވަނީ އިންތިހާބު ބޮއިކޮޓް ނުކުރުމަށެވެ. ޔާމީނަށް ވާދަނުކުރެއްވޭ ހާލަތެއްގައި އެކުގައި މަސައްކަތް ކުރާ ޕީއެންސީގެ ފަރާތުން މާލޭގެ މޭޔަރު ޑރ. މުހައްމަދު މުއިއްޒަށް ވަނީ އެ ޕާޓީގެ ޓިކެޓު ދީފަ އެވެ.