ހުޅުމާލޭ 50 މެގަވޮޓް އިންޖީނުގޭގައި މިއަދު ކުރި މެއިންޓަނަންސްގެ މަސައްކަތް މިއަދު ކާމިޔާބުކަމާއެކު ނިންމާލައިފި އެވެ. އެ މަސައްކަތް ނިންމާލާފައި ވަނީ ކުރިން ލަފާކުރި ގަޑިއަށްވުރެ ކުރިންނެވެ.ސްޓެލްކޯއިން އިއްޔެ ބުނީ، މިއަދު ހެނދުނު 6:00 އިން 10:00 އަށް ހުޅުމާލޭގެ އިންޖީނު ނިވާލައި، ކޮންމެހެން ކުރަންޖެހޭ ޓެކްނިކަލް މަސައްކަތްތަކެއް ކުރާނެ ކަމަށާއި، އަމާޒަކީ ތާވަލުކޮށްފައިވާ ގަޑީގެ ކުރިން މަސައްކަތްތައް ނިންމާލުން ކަމަށެވެ.ސްޓެލްކޯގެ މެނޭޖިން ޑިރެކްޓާ ހުސެއިން ފަހުމީ މިއަދު އެކްސްގައި ވިދާޅުވި ގޮތުގައި މި މަސައްކަތް ނިންމާލާފައި ވަނީ މިއަދު ހެނދުނު 8:43ގަ އެވެ. އަދި ކުރިން ލަފާކޮށްފައި ވަނީ އެ މަސައްކަތް ނިންމާލާ އަލުން ކަރަންޓް ދެވޭނީ މިއަދު ހެނދުނު 6-10އަށް ކަމަށެވެ. "މި މަސައްކަތް މިހާ އަވަހަށް ނިންމާލެވުނީ ސްޓެލްކޯގެ ހިދުމަތްތެރި އިންޖީނިއަރުންނާއި ޓެކްނީޝަނުންގެ ގާބިލްކަމާއި ހީވާގިކަމުން،" ފަހުމީ ވިދާޅުވި އެވެ. އަދި މުވައްޒަފުންގެ މަސައްކަތުގެ އަހުލާގާއި، އެ މަސައްކަތަށް އޮންނަ ލޯތްބާއި، ރައްޔިތުންނަށާއި ގައުމަށް ހިދުމަތްކުރުމުގެ މަތިވެރި ރޫހު އޮތްކަން އޭނާ ފާހަގަކުރެއްވި އެވެ.އެ މަސައްކަތުގައި ބައިވެރިވި މުޅި ޓީމަށް އައްސަރިބަހާއި ސާބަސް ރައްދުކުރަމުން ފަހުމީ ވިދާޅުވީ ގްރޭޓާ މާލެ ސަރަހައްދުގެ ކަސްޓަމަރުންގެ ފަރާތުން ލިބެމުންދާ އެއްބާރުލުން ފާހަގަކުރައްވައި، އެންމެހާ ކަސްޓަމަރުންނަށް އިހުލާސްތެރިކަމާއެކު ޝުކުރު އަދާކުރައްވާ ކަމަށެވެ. ސްޓެލްކޯއިން މިފަދަ މަރާމާތުގެ މަސައްކަތްތައް ކުރިއަށް ގެންދަނީ ކަރަންޓުގެ ހިދުމަތް ދެމެހެއްޓެނިވި ގޮތެއްގައި އެންމެ އެކަށީގެންވާ ގޮތުގައި ފޯރުކޮށްދިނުމަށްޓަކައި ކުރަންޖެހޭ މުހިންމު މަސައްކަތްތަކުގެ ގޮތުގައި ކަން ވެސް ފަހުމީ ފާހަގަކުރެއްވި އެވެ.