ކުވައިތު އިންޓަނޭޝަނަލް އެއާޕޯޓުގެ ތެޔޮ ރައްކާކުރާ މައި ތާނގީއަކަށް އަމާޒުކޮށް މިއަދު ދިން ނުރައްކާތެރި ޑްރޯން ހަމަލާއަކާ ގުޅިގެން އެ ސަރަހައްދުގައި ބޮޑު އަލިފާނުގެ ހާދިސާއެއް ހިނގައިފިއެވެ. ރޮއިޓާސް އިން ރިޕޯޓުކޮށްފައިވާ ގޮތުގައި، މިއަދު ހެނދުނުގެ ވަގުތެއްގައި ދިން މި ހަމަލާއާއެކު ވަރުގަދަ ގޮވުމެއްގެ އަޑު އިވި، ކަޅު ދުމުގެ ބޯ ވިލާގަނޑެއް އެއާޕޯޓު މަތިން ފެންނަން ފެށިއެވެ. ކުވައިތުގެ ސިވިލް އޭވިއޭޝަން އޮތޯރިޓީން ވަނީ މި ހަމަލާ ކަށަވަރުކޮށްދީފައެވެ. މިއީ މެދުއިރުމަތީގައި މިހާރު ހިނގަމުންދާ ހަނގުރާމައިގެ ތެރެއިން، އާންމު ރައްޔިތުން ބޭނުންކުރާ އުމްރާނީ ވަސީލަތްތަކަށް އަމާޒުކޮށް ދެމުންދާ ހަމަލާތަކުގެ ތެރެއިން އެންމެ ފަހުގެ ހާދިސާއެވެ. ހަމަލާއާއެކު އެއާޕޯޓުގެ އިމަޖެންސީ ނިޒާމުތައް ވަގުތުން ހަރަކާތްތެރިކޮށް، އަލިފާން ނިއްވުމުގެ ބޮޑު އޮޕަރޭޝަނެއް ވަނީ ފަށާފައެވެ. މި ހާދިސާއާ ގުޅޭގޮތުން ކުވައިތުގެ ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަންގެ ރަސްމީ ތަރުޖަމާނު އަބްދުﷲ އަލް ރާޖިހީ ވިދާޅުވީ، ހަމަލާ ދިން ވަގުތު އެއާޕޯޓުގެ އިމަޖެންސީ ޕްރޮޓޮކޯލްތައް ވަގުތުން ތަންފީޒުކުރަން ފެށި ކަމަށެވެ. އަދި އަލިފާން ނިއްވާ ޓީމުތަކުން ކުރި ބުރަ މަސައްކަތުން، އެހެން ތާނގީތަކަށާއި އިމާރާތްތަކަށް އަލިފާން ފެތުރުނަ ނުދީ ވަނީ ކޮންޓްރޯލް ކުރެވިފައި ކަމަށް އޭނާ ވިދާޅުވިއެވެ. އޭނާ ކަށަވަރުކޮށްދެއްވި ގޮތުގައި، މި ހާދިސާގައި އެއްވެސް މީހެއްގެ ފުރާނައަށް ގެއްލުމެއް ލިބިފައި ނުވެއެވެ. އަދި އެއްވެސް މީހަކަށް އަނިޔާވި ކަމުގެ ރިޕޯޓެއްވެސް ލިބިފައެއް ނުވެއެވެ. ލިބުނު ގެއްލުންތައް މައިގަނޑު ގޮތެއްގައި ހިމެނެނީ މާއްދީ ގެއްލުންތަކެއްގެ ގޮތުގައެވެ. ތެޔޮ ތާނގީއަށް ބޮޑެތި ގެއްލުންތަކެއް ލިބިފައިވީ ނަމަވެސް، އެއާޕޯޓުގެ ޓާމިނަލްތަކަށާއި ރަންވޭއަށް އެއްވެސް ގެއްލުމެއް ލިބިފައި ނުވާކަމަށް ކަމާބެހޭ ފަރާތްތަކުން ހާމަކުރެއެވެ. ކުވައިތުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، "ކުވައިތުގެ ވައިގެ ދިފާއީ ނިޒާމުތަކުން މިހާރު ދަނީ ދުޝްމަނުންގެ މިސައިލް އަދި ޑްރޯން ހަމަލާތަކާ ކުރިމަތިލަމުން" ކަމަށެވެ. އަދި އިވޭ ގޮވުންތަކުގެ އަޑަކީ ދިފާއީ ނިޒާމުން ދުޝްމަނުންގެ ހަމަލާތައް ވައްޓާލުމުގެ ސަބަބުން އިވޭ އަޑުތަކެއް ކަމަށާއި، ކަމާބެހޭ ފަރާތްތަކުގެ އިރުޝާދުތަކާ އެއްގޮތަށް އަމަލުކުރުމަށް އާންމުންނަށް ވަނީ އިލްތިމާސްކޮށްފައެވެ. މި ހަމަލާއަކީ ފެބްރުއަރީ 28 ވަނަ ދުވަހު އިސްރާއީލާއި އެމެރިކާއިން އީރާނަށް ދިން ހަމަލާތަކާ ގުޅިގެން ފެށުނު ސަރަހައްދީ ހަނގުރާމައިގެ ބައެކެވެ. ކުވައިތުގެ ނޭޝަނަލް ގާޑުން ނެރުނު ބަޔާނެއްގައި ބުނެފައިވަނީ، ބުދަ ދުވަހުގެ ހެނދުނުގެ ވަގުތެއްގައި އެ ގައުމުގެ ވައިގެ ސަރަހައްދަށް "ވަން 6" ޑްރޯނެއް ވައްޓާލާފައިވާ ކަމަށެވެ. މީގެ އިތުރުން، އީރާނުގެ ރިވޮލިއުޝަނަރީ ގާޑުން ވަނީ ކުވައިތު، އުރުދުން އަދި ބަހްރޭންގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދިންކަމަށް ދައުލަތުގެ ޓީވީ މެދުވެރިކޮށް ބުނެފައެވެ. މި ހަމަލާތަކުގެ އަސަރު މުޅި ސަރަހައްދަށް ވަނީ ކޮށްފައެވެ. ބަހްރޭންގެ ދާޚިލީ ވުޒާރާއިން ބުނެފައިވަނީ އެ ގައުމުގައި ވައިގެ ހަމަލާގެ އިންޒާރުދޭ ސައިރަންތައް ގޮއްވާފައިވާ ކަމަށެވެ. އުރުދުންގެ ވެރިރަށް އައްމާންގެ ކައިރިއަށް ހަތިޔާރުގެ ބައިތަކެއް ވެއްޓިފައިވާއިރު، ސައުދީ އަރަބިއްޔާއިން ވަނީ އެ ގައުމުގެ އިރުމަތީ ފަރާތަށް އައި 4 ޑްރޯނެއް ވައްޓާލާފައެވެ. މިއީ މާޗް މަހުގެ ތެރޭގައި ކުވައިތު އެއާޕޯޓަށް އަމާޒުވި ތިންވަނަ ހަމަލާއެވެ. ހަމަލާތަކުގެ ސަބަބުން މުޅި ގަލްފު ސަރަހައްދުގެ ވައިގެ ދަތުރުފަތުރުގެ ސަލާމަތާމެދު ވަނީ ބޮޑެތި ސުވާލުތަކެއް އުފެދިފައެވެ. ސަލާމަތީ ސަބަބުތަކަށްޓަކައި ކުވައިތު އިންޓަނޭޝަނަލް އެއާޕޯޓު މިހާރު އޮތީ ވިޔަފާރި ދަތުރުތަކަށް މައިގަނޑު ގޮތެއްގައި ބަންދުކޮށްފައެވެ. ނަމަވެސް، ކުވައިތު އެއާވޭސްއިން ވަނީ މާދަމާއިން ފެށިގެން މިސްރުގެ ގާހިރާއަށް ކުރާ ދަތުރުތައް ސައުދީ އަރަބިއްޔާގެ ދައްމާމް އެއާޕޯޓު މެދުވެރިކޮށް ފެށުމަށް ނިންމާފައެވެ. މިގޮތުން ހަފުތާއަކު ހަތަރު ދުވަހު މި ފްލައިޓުތައް އޮޕަރޭޓްކުރާނެއެވެ.