ސްރީލަންކާއަށް އެރި ބާރުގަދަ ތޫފާނުގެ ސަބަބުން، 1 ޑިސެމްބަރު 2025 ވަނަ ދުވަހާ ހަމައަށް، އެޤައުމުގެ 1.3 މިލިއަނަށްވުރެ ގިނަ މީހުންނަށް އަސަރުކޮށްފައިވާ ކަމަށާއި، މި ކާރިސާގެ ސަބަބުން ގިނަ ސަރަހައްދުތަކެއް މިހާރުވެސް ވަރަށް ނާޒުކު ހާލަތެއްގައިވާކަމަށް ލަންކާގެ މީޑިއާ ރިޕޯޓުތައް ބުނެއެވެ.
ތޫފާނުގެ ހާލަތު
"ޑިތުވާ" ނަމުން ނަންދެވިފައިވާ މި ތޫފާން ލަންކާއާ ދުރުވެ، އިންޑިއާގެ ތަމިލްނާޑޫގެ އައްސޭރިފަށާ ދިމާލަށް މިސްރާބު ޖަހާފައިވާއިރު، ތޫފާނު މިހާރު ބަލިކަށިވެ، ޑީޕް ޑިޕްރެޝަން އަށް ބަދަލުވެފައިވީ ނަމަވެސް، ލަންކާގައި ދިމާވެފައިވާ ހާލަތު ވަރަށް ނުރައްކާތެރިކަން އެ ގައުމު މީޑީއާއިން ވަނީ ފާހަގަކޮށްފައެވެ.
އެޤައުމުގެ މޫސުމާ ބެހޭ ޤައުމީ އިދާރާއިން ހާމަކުރާ ގޮތުގައި، މި ސިސްޓަމް ވަނީ ސައިކްލޯނިކް ތޫފާނެއްގެ ހާލަތުން ބަލިކަށިވެ، ޑީޕް ޑިޕްރެޝަނަކަށް ބަދަލުވެފައެވެ. މިހާރު މި ސިސްޓަމް ލަންކާއިން އުތުރަށް ފެޔަށްޖެހި، އިންޑިއާގެ (ތަމިލްނާޑޫ/ޕުޑުޗެރީ) އައްސޭރިފަށުގެ ކައިރިއަށް ފޯރާފައިވާކަމަށް ލަންކާގެ މޫސުމީ އިދާރާއިން ބުނެފަވެއެވެ. އަދި ބޯކޮށް ވާރޭ ވެހުން މަދުވެފައި ވިޔަސް، މޫސުމާ ބެހޭ އިދާރާއިން ވަނީ ކަނޑުގެ ވަށައިގެންވާ ސަރަހައްދުތަކަށް ގަދަ ވަޔާ އެކު ގެއްލުންތައް ކުރިމަތިވެދާނެ ކަމުގެ އިންޒާރު ދީފައެވެ.
ލަންކާއަށް ކުރިމަތިވި އަސަރުތަކާއި ގެއްލުންތައް
ލަންކާގެ ސަރުކާރުގެ އިސްވެރިން މި ކާރިސާ ސިފަކޮށްފައިވަނީ ފާއިތުވި ދެ ދިހަވަރަކަށް އަހަރުގެ ތެރޭގައި އެ ޤައުމަށް ކުރިމަތިވި އެންމެ ބޮޑު ގުދުރަތީ ކާރިސާގެ ގޮތުގައެވެ. އެންމެ ފަހުގެ ރިޕޯޓުތަކުން ދައްކާ ގޮތުގައި، މި ކާރިސާގައި 334 މީހުން މަރުވެފައިވާއިރު، 400 އަށްވުރެ ގިނަ މީހުން ގެއްލިގެން ހޯދުމުގެ މަސައްކަތް ދަނީ ކުރިއަށެވެ. ޖުމްލަ 1.3 މިލިއަނަށްވުރެ ގިނަ މީހުންނަށް މި ކާރިސާގެ އަސަރުކޮށް، އެތައް ބަޔަކު ވަނީ ހާލުގައި ޖެހިފައެވެ. ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތައް ވަނީ ފުޅާ ދާއިރާއެއްގައި ހިނގާފައެވެ. ޚާއްސަކޮށް ލަންކާގެ މެދުތެރޭ ސަރަހައްދުތަކާއި ކޮލަންބޯގެ ތިރި ހިސާބުތަކަށް ބޮޑެތި ގެއްލުންތަކެއް ލިބިފައިވެއެވެ. މަގުތަކާއި ގޯތިގެދޮރު ހިމެނޭ ގޮތަށް، އުމްރާނީ ބިނާތަކަށް ވަނީ ބޮޑެތި ގެއްލުންތަކެއް ލިބިފައެވެ.
ސަރުކާރުގެ އިލްތިމާސްތަކާއި އިންޒާރުތައް
ވާރޭ މަޑުޖެހިފައި ވިޔަސް، ކޮލަންބޯގެ ބައެއް ހިސާބުތައް ހިމެނޭ ގޮތަށް، ގިނަ ތިރި ހިސާބުތަކުގައި ފެންގަނޑު އަދިވެސް ހިކިފައެއް ނުވެއެވެ. މޫސުމާ ބެހޭ ޤައުމީ އިދާރާއިން ވަނީ ގަދަ ވައި ޖެހޭނެކަމަށް ލަފާކޮށް، ކަނޑު ދަތުރުކުރާ ފަރާތްތައް ސަމާލުވުމަށް އަންގައި "ރެޑް އެލާޓް" ނެރެފައެވެ. އެ އިދާރާއިން ވަނީ ބޯޓުދަތުރުކުރާ އަދި މަސްވެރިކަންކުރާ ފަރާތްތަކަށް ޓްރިންކޮމަލީއިން ފެށިގެން (ކަންކަސަންތުރާއާއި މަނާރުގެ މަގުން) ފުއްޓަލަމާ ހަމައަށް އޮތް ކަނޑުގެ ސަރަހައްދުން ދަތުރުފަތުރު ނުކުރުމަށް އިރުޝާދުދީފައެވެ.
ނޭޝަނަލް ބިލްޑިންގ ރިސަރޗް އޯގަނައިޒޭޝަން (އެންބީއާރުއޯ) އިން ވަނީ ބިންގަނޑު ވަރަށް ބޮޑަށް ތެމިފައި ހުރުމުގެ ސަބަބުން، ގިނަ ޑިސްޓްރިކްޓްތަކަށް ބިންގަނޑު ކަނޑައިގެން ދިއުމުގެ ނުރައްކާ އޮތް ކަމަށް އިންޒާރު ދީފައެވެ.
އެހީތެރިކަމުގެ އޮޕަރޭޝަންތައް
މި ކާރިސާއިން ސަލާމަތްތެރިކަން ހޯދުމަށް ކުރާ މަސައްކަތްތައް ހިންގުމަށް، ރައީސް އަނޫރާ ކުމާރާ ދިއްސަނަޔަކަ ވަނީ އެމަޖެންސީ ހާލަތު އިޢުލާނު ކުރައްވާފައެވެ. ލަންކާގެ އަސްކަރިއްޔާ އާއި ބައިނަލްއަޤްވާމީ ފަރާތްތަކުގެ އެހީތެރިކަމާއެކު، ބޮޑެތި އެހީތެރިކަމުގެ އޮޕަރޭޝަންތައް މިހާރުވެސް ކުރިއަށް އެބަދެއެވެ. އިންޑިއާއިން ވަނީ "އޮޕަރޭޝަން ސާގަރް ބަންދޫ" ގެ ނަމުގައި، އިންސާނީ އެހީތެރިކަމާއި ފަރުވާގެ ސާމާނު ފޯރުކޮށްދިނުމަށް ބޯޓުފަހަރާއި މަތިންދާބޯޓުތައް ފޮނުވާފައެވެ.
Thiladhun © 2019 – 2025| Made with in #Thiladhunmathi
Thiladhun © 2019 – 2025
Made with ❤️ in #Thiladhunmathi