އާއިލާއަށް ފިލައިގެން އުޅުނު 16 އަހަރުގެ އަންހެން ކުއްޖާ ހޯދައި އޭނާގެ އާއިލާއާ ހަވާލު ކޮށްފިއެވެ.
ގ. ގްރީންބީންސް ޝިފާ މުޙައްމަދު (16އ) އާއިލާއަށް ފިލާފައިވާކަމަށް އާއިލާގެ ފަރާތުުން ފުލުހުންނަށް ރިޕޯޓް ކޮށްފައި ވަނީ މިދިޔަ އޮކްޓޯބަރު މަހުގެ 19 ވަނަ ދުވަހުގެ ވަގުތެއްގައެވެ.
ޝިފާ މުޙައްމަދު ހޯދުމަށް ފުލުހުން ކުރަމުންދިޔަ މަސައްކަތުން އޭނާ ފެނިފައިވަނީ، މާފަންނު ގެއެއްގެ ތެރޭގައި އޭނާ ހުރި ކަމުގެ މަޢުލޫމާތު އާންމު ފަރާތަކުން ފުލުހުންނަށް ދިނުމާއެކު ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓްގެ މުވައްޒަފުން އެގެއަށް ގޮސް ގޭގެ ވެރިފަރާތުގެ ހުއްދާއާއެކު އެގޭތެރެ ބަލައިފާސްކުރިއިރު އެގޭ ކޮޓަރިއެއްގެ ތެރެއިންނެވެ.
ޝިފާ މުޙައްމަދު ހޯދުމަށް ފުލުހުން ހިންގި ހަރަކާތުގައި އޭނާ ފިލުވައިގެން ގެންގުޅުނު ކަމަށް ތުޙުމަތު ކުރެވިގެން 25 އަހަރުގެ ފިރިހެނަކު ވަނީ ފުލުހުންގެ ބެލުމުގެ ދަށަށް ގެނެސްފައެވެ.
އެއްވެސް ފަރާތެއްގެ ބެލުމުގެ ދަށަށުގައި ގޭގޭގައި މީހުންނާއި ކުޑަކުދިން ބައިތިއްބާއިރު އެ ފަރާތްތަކަކީ ކާކުކަން ދެނެގަނެ ކަށަވަރު ކުރުމަށް ހެޑް އޮފް ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓް ޗީފް އިންޕެކްޓަރ އޮފް ޕޮލިސް ޙަސަން ޝިފާޢު ވަނީ އިލްތިމާސް ކުރައްވާފައެވެ.
ޝިފާ މުޙައްމަދު އާއިލާއަށް ފިލައިގެން އުޅުނު މައްސަލައާއި އޭނާ ފިލުވައިގެން ގެންގުޅުނު ކަމަށް ތުޙުމަތު ކުރެވޭ މައްސަލަ ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓުން ދަނީ ތަޙުޤީޤު ކުރަމުންނެވެ.