ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ގަދަކަމުން ބަންދު ކުރި މައްސަލައިގައި ޓެރަރިޒަމްގެ ދައުވާ ސާބިތުވެ 13 އަހަރަށް ޖަލަށް ލުމަށް ހުކުމް ކޮށްފައިވާ ކުރީގެ ރައީސް މުހައްމަދު ނަޝީދު ޖަލުގައި ހުންނަވާ އިރު، ޖަލުގައި ތިބި އެމަނިކުފާނުގެ އެކުވެރިންނަށް އެމަނިކުފާނާއި އެކު ތިބެވޭނެ ކަމަށާއި ނަޝީދާއިއެކު ތިބެވޭނީ ނުރައްކާތެރި ކުށްވެރި އަކަށް ނުވާނަމަ ކަމަށް ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
ރޭ ޓީވީއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން މިނިސްޓަރ ވިދާޅުވީ ރައީސް ނަޝީދުގެ އެކުވެރިން ޖަލުގައި ތިބި ނަމަ އެބަޔަކު ފާހަގަކޮށް އެބަޔަކާ ބެހޭ މައުލޫމާތު ހިއްސާ ކުރުމަށް އެމަނިކުފާނުގެ އާއިލާއަށް ދަންނަވާފައި ވާނެ ކަމަށެވެ.
"ރައީސް ނަޝީދާއި ގާތް އެއްވެސް މީހަކު ޖަލުގައި ހުރި ކަމަށް ވަންޏާމު، ރައްޓެހި މީހަކު ހުރި ކަމަށް ވަންޏާއި އެމީހެއްގެ ނަން ބުނެދިނުމަށް ރައީސް ނަޝީދުގެ އާއިލާއަށް ދަންނަވާފައި މިހާރު އޮންނާނީ."، މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެފަދަ މީހަކު ހުރި ކަމުގައި ވާނަމަވެސް، ރައީސް ނަޝީދާއި އެކުގައި ހުރުމުގެ ފުރުސަތު ދެވޭނީ އެމީހާއަކީ ނުރައްކާތެރި ކުށްވެރި އަކަށް ނުވާނަމައެވެ.
"އެމީހާ އަކީ އަޅުގަނޑުމެންނަށް ސެކިއުރިޓީ ގޮތުން ލުއި ޖަލެއްގައި ބެހެއްޓޭނެ މީހެއް ކަމުގައި ވަންޏާމު ހަމަ ރައީސް ނަޝީދާއި އެކު ބެހެއްޓޭނެ އިންތިޒާމްވެސް މިހާރު ހަމަޖައްސަން ގަސްދުކޮށްފައި އޮތީ." އުމަރު ވިދާޅުވިއެވެ.
އޭރުން ރައީސް ނަޝީދު ބަންދު ކުރެވިފައި ހުރި ނަމަވެސް، އެމަނިކުފާނު ހުންނަވާނީ އެސަރަހައްދަށް ދޫކޮށްލެވި އާދައިގެ ދިރިއުޅުމެއް އުޅެވޭނެ ގޮތަށް ކަމަށް މިނިސްޓަރ ވިދާޅުވިއެވެ.
ރައީސް ނަޝީދު ހުކުމް ތަންފީޒު ކުރަމުން ދާނީ 264 އަކަ ފީޓުގެ ޖަލު އެޕާޓްމަންޓެއްގައި ކަމަށާއި އެތަނުގައި އެއް ރޫމް، ސިޓިންގ ރޫމްއެއް ހުންނާނެ ކަމަށްވެސް މިނިސްޓަރ ވިދާޅުވިއެވެ. އަދި އެތަން ހުންނާނީ ފަރުނީޗަރު އެކީގައި އޭސީ، ޓީވީ އަދި ވީސީޑީ ޕްލެޔާ ބޭނުން ކުރެވޭ ގޮތަށެވެ.
އިތުރަށް ވާހަކަ ދައްކަވަމުން މިނިސްޓަރ ވިދާޅުވީ ރައީށް ނަޝީދަށް މިފަދަ އިންތިޒާމުތަކެއް ހަމަޖައްސައި ދިނުމުން ވަރަށް ބޮޑެތި ފާޑުކިޔުންތައް ލިބެމުން އަންނަ ކަމަށެވެ.
"އަޅުގަނޑު ދަންނަވާނީ މި ޤައުމުގެ ރައީސްކަން ކުރެއްވި ބޭފުޅެއްގެ މައްޗަށް ބޭއިހްތިރާމް ކުރާނެ ގޮތަކަށް މި ސަރުކާރުން އަމަލެއް ނުކުރާނެ. މި ސަރުކާރަށް ކޮންމެ ފަރާތަކުން ފާޑު ކިޔުން އައި ކަމުގައި ވިޔަސް މި ސަރުކާރުގެ ފަރާތުން ރައީސްކަން ކޮށްފައި ހުރި މީހަކަށް އޭނާ ޖަލުގައި ހުރި ކަމަށް ވީނަމަވެސް ދޭންޖެހޭ ފުރިހަމަ އިއްޒަތާއި އިހްތިރާމް އަޅުގަނޑުމެން ދޭނަން. އެހެން ވެގެންނޭ މި ހުރިހާ މި އިންތިޒާމް ތަކެއް މި ހަމަޖައްސަނީ."، އުމަރު ވިދާޅުވިއެވެ.
އުމަރު ވިދާޅުވީ ރައީސް ނަޝީދު ދެކެ ރުޅި އަންނަ ވަރަށް ގިނަ ބަޔަކާއި، އެމަނިކުފާނުގެ އަމަލު ތަކުގެ ސަބަބުން ޖަލު ހުކުމް ތަންފީޒު ކުރަން ޖެހުނު މީހުން މިހާރުވެސް ޖަލުގައި ތިބި ކަމަށެވެ. އެހެން ކަމުން އެފަދަ ބައެއްގެ ފަރާތުން ރައީސް ނަޝީދަށް ލިބިދާނެ ގެއްލުމަކުންވެސް ފުރިހަމަ ރައްކާތެރިކަން ހޯދައިދޭނެ ކަމަށް އުމަރު ވަނީ ވިދާޅުވެފައެވެ.
"ފަހަރެއްގަ އެމީހުންގެ ފުށުން މީނައަށް ގެއްލުމެއްވެސް ލިބިދާނެ. އެހެންކަމުން އަޅުގަނޑުމެން މީނަގެ ރައްކާތެރިކަމާ ދޭތެރޭ ވަރަށް ބޮޑަށް ފާރަވެރިވަމުން މިދަނީ. މީނަ އަޅުގަނޑުމެން ދޫކޮށެއް ނުލާނަން އެންމެގެ ތެރެއަށް." މިނިސްޓަރު ވިދާޅުވިއެވެ.
އަދި މިހާރު ތައްޔާރު ކުރަމުން އަންނަ ތަނަކީވެސް ރައީސް ނަޝީދަށް ލިބިދޭންޖެހޭ ރައްކާތެރިކަން ކަށަވަރުކޮށްދިނުމަށް ތައްޔާރު ކުރާ ތަނެއް ކަމަށް މިނިސްޓަރ ވިދާޅުވިއެވެ.
ނަޝީދާއިއެކު ތިބެވޭނީ ނުރައްކާތެރި ކުށްވެރި އަކަށް ނުވާނަމަ - އުމަރު
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ