އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދިޔަ ހަނގުރާމަ ނިންމުމަކަށް ގެނައުމަށް އެމެރިކާ އާއި އީރާނާ ދެމެދު ސޮއިކުރި އެއްބަސްވުމާ ގުޅިގެން، ހޮރްމުޒް ކަނޑުއޮޅީގައި ތާށިވެފައި ތިބި 11,000 އަށްވުރެ ގިނަ ފަޅުވެރިން ސަލާމަތްކުރުމުގެ މަސައްކަތް އދ. ގެ އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) އިން ފަށައިފިއެވެ.
މިދިޔަ ފެބުރުއަރީ މަހުގެ 28 ގައި އެމެރިކާ އާއި އިސްރާއީލުން އީރާނާ ދެކޮޅަށް ހަނގުރާމަ ފެށުމާއެކު، އީރާނުން ވަނީ ހޮރްމުޒް ކަނޑުއޮޅި ބަންދުކޮށްފައެވެ. މީގެ ސަބަބުން ގިނަ އަދަދެއްގެ މުދާ އުފުލާ ބޯޓުފަހަރު އެ ސަރަހައްދުގައި ތާށިވިއެވެ. ނަމަވެސް މިދިޔަ ހަފުތާގައި ވެވުނު އެއްބަސްވުމަށްފަހު އެ ސަރަހައްދުގެ ކަނޑުގެ ދަތުރުފަތުރުތައް ވަނީ އިތުރުވާން ފަށާފައެވެ. ޝިޕިން އިންޓެލިޖެންސް އެޖެންސީއެއް ކަމަށްވާ ކްޕްލާ އިން ރިޕޯޓްކުރި ގޮތުގައި ހަނގުރާމަ ފެށުނު ފަހުން އެންމެ ގިނަ އަދަދަކަށް ބޯޓުފަހަރު އެ ސަރަހައްދުން ދަތުރުކޮށްފައިވަނީ މިދިޔަ ހޯމަ ދުވަހުއެވެ. އެގޮތުން މަދުވެގެން 36 ވިޔަފާރި ބޯޓު އެދުވަހު ކަނޑުއޮޅި ހުރަސްކުރި ކަމަށް ބުނެފައިވެއެވެ.
މި ސަރަހައްދު ހުޅުވާލުމުގެ މަޝްވަރާތައް ކުރިއަށްދާއިރު، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ޔޫއޭއީއަށް ކުރެއްވި ދަތުރެއްގައި ވިދާޅުވީ ހޮރްމުޒް ކަނޑުއޮޅިން ދަތުރުކުރާ ބޯޓުފަހަރުން ފީއެއް ނުވަތަ ޓޯލްއެއް ނެގުމުގެ ފުރުސަތު އީރާނަށް ނުދޭނެ ކަމަށެވެ. އެއީ ބައިނަލްއަގުވާމީ ކަނޑުގެ މަގެއް ކަމަށާއި އެއްވެސް ގައުމަކަށް އެފަދަ ފީއެއް ނުނެގޭނެ ކަމަށް ރޫބިއޯ ބުންޏެވެ. ނަމަވެސް އީރާނުގެ ޗީފް ނެގޯޝިއޭޓަރު މުހައްމަދު ބާގިރު ގާލިބާފް ކުރިން ވިދާޅުވެފައިވަނީ، މުވާސަލާތީ ދާއިރާތައް ހުޅުވާލަން އެއްބަސްވި ނަމަވެސް، ހޮރްމުޒް ކަނޑުއޮޅީގެ ކަންކަން ހަނގުރާމައިގެ ކުރިން އޮތް ހާލަތަށް ދެން ދުވަހަކުވެސް ބަދަލުނުވާނެ ކަމަށެވެ.
މިދިޔަ ފެބުރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ގުޅިގެން އީރާނާ ދެކޮޅަށް ފެށި ހަނގުރާމައަކީ މެދުއިރުމަތީގެ ހަމަޖެހުން މުޅިން ބަދަލުކޮށްލި ނުރައްކާތެރި ކުރިމަތިލުމެކެވެ. މި ހަނގުރާމަ ފެށުމާއެކު އީރާނުން ވަނީ ދުނިޔޭގެ ތެލުގެ ވިޔަފާރީގެ އެންމެ މުހިންމު އެއް މަގު ކަމަށްވާ ހޮރްމުޒް ކަނޑުއޮޅި އެއްކޮށް ބަންދުކޮށްފައެވެ. އީރާނުގެ މި ފިޔަވަޅުގެ ސަބަބުން ބައިނަލްއަގުވާމީ ވިޔަފާރީގެ ދަތުރުފަތުރަށް ބޮޑު ހުރަހެއް އެޅި، އެތައް ސަތޭކަ މުދާ އުފުލާ ބޯޓެއް ދެ ފަރާތުގައި ތާށިވެ، ދުނިޔޭގެ އިގްތިސާދަށް އޭގެ ނޭދެވޭ އަސަރު ވަރަށް ބޮޑަށް ކުރިއެވެ.
މި ބޮޑު ހަމަނުޖެހުމަށް ހައްލެއްލިބޭނެ މަގު ހުޅުވިގެންދިޔައީ، ހަނގުރާމަ ހުއްޓާލުމަށްޓަކައި އެމެރިކާ އާއި އީރާނާ ދެމެދު މިދިޔަ ހަފުތާގައި ސޮއިކުރެވުނު އެއްބަސްވުމާ ގުޅިގެންނެވެ. ސުވިޒަލޭންޑުގައި ކުރިއަށްދިޔަ މަޝްވަރާތަކަށްފަހު ވެވުނު މި އެއްބަސްވުމުގެ ސަބަބުން، ކަނޑުއޮޅީގައި ތާށިވެފައި ތިބި ފަޅުވެރިން ސަލާމަތްކުރުމުގެ އޮޕަރޭޝަން ފެށުމަށް ބޭނުންވާ ސަލާމަތީ ޔަގީންކަން މިހާރު ވަނީ ލިބިފައެވެ. އަދި މިއީ އެ ސަރަހައްދުގެ ވިޔަފާރި އަލުން އާންމު ހާލަތަކަށް ގެނައުމަށް އެޅުނު އެންމެ މުހިންމު ފިޔަވަޅެވެ.