މެދުއިރުމަތީގެ މަސްރަހު ގޯސްވުމުގެ ސަބަބުން ތެޔޮ ސަޕްލައި ކުރުމަށް ދިމާވެފައިވާ ހުރަސްތަކަށް ހައްލެއް ހޯދުމުގެ ގޮތުން، އިންޑިއާގެ ރިފައިނަރީތަކުން ރަޝިއާގެ ސާފުނުކުރާ ތެޔޮ ގަންނަން ފަށައިފި އެވެ.
މި ފުރުސަތު އިންޑިއާއަށް ލިބުނީ އެމެރިކާގެ ޓްރެޒަރީ ޑިޕާޓްމަންޓުން ދިން 30 ދުވަހުގެ ވަގުތީ ހުއްދައެއްގެ ދަށުންނެވެ. ޔޫކްރެއިން ހަނގުރާމައާ ގުޅިގެން ރަޝިއާގެ ތެޔޮ ގަތުން މަދުކުރުމަށް އެމެރިކާއިން ކުރިން އިންޑިއާއަށް ބާރުއަޅަމުން ދިޔަ ނަމަވެސް، މި ހުއްދައިގެ ދަށުން މިހާރު ކަނޑުމަތީގައި ތާށިވެފައި ހުރި ރަޝިއާގެ ތެޔޮ އިންޑިއާއަށް ގަނެވޭނެ އެވެ.
އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވި ގޮތުގައި، މި ނިންމުމަކީ ދުނިޔޭގެ ބާޒާރުގައި ތެލުގެ ސަޕްލައި ހަމަހަމަކަންމަތީ ހިފެހެއްޓުމަށް އެޅި ފިޔަވަޅެކެވެ.
"ދުނިޔޭގެ ބާޒާރަށް މެދުކެނޑުމެއް ނެތި ތެޔޮ ފޯރުކޮށްދިނުމަށްޓަކައި، ކަނޑުމަތީގައި ހުރި ރަޝިއާގެ ތެޔޮ ގަތުމުގެ ވަގުތީ 30 ދުވަހުގެ ހުއްދައެއް ޓްރެޒަރީ ޑިޕާޓްމަންޓުން އިންޑިއާގެ ރިފައިނަރީތަކަށް ވާނީ ދީފައި،" އޭނާ ވިދާޅުވި އެވެ.
ރޮއިޓާސް އިން ބުނި ގޮތުގައި، އިންޑިއާގެ ސަރުކާރު ހިއްސާވާ ރިފައިނަރީތައް ކަމަށްވާ އިންޑިއަން އޮއިލް ކޯޕަރޭޝަން، ބާރަތު ޕެޓްރޯލިއަމް، ހިންދުސްތާން ޕެޓްރޯލިއަމް އަދި މަންގަލޯ ރިފައިނަރީން މިހާރު ވެސް ވަނީ ގާތްގަނޑަކަށް 20 މިލިއަން ބެރަލްގެ ތެޔޮ ގަނެފަ އެވެ.
އިންޑިއާއިން މިގޮތަށް އަމަލުކުރަން މިޖެހުނީ އިރާނާއި އެމެރިކާ އަދި އިޒްރޭލާ ދެމެދު ހިނގަމުންދާ ހަނގުރާމައިގެ ސަބަބުން ހޮރުމުޒް ކަނޑުއޮޅި މެދުވެރިކޮށް ތެޔޮ އުފުލުމަށް ބުރޫއަރާފައިވާތީ އެވެ.
އިންޑިއާއަށް ބޭނުންވާ ތެލުގެ ގާތްގަނޑަކަށް %40 އެތެރެކުރަނީ އެ ސަރަހައްދުންނެވެ. އަދި އިންޑިއާގައި ރައްކާކުރެވިފައި ހުރި ތެލުން ފުދޭނީ ގާތްގަނޑަކަށް 25 ދުވަހަށް ކަމަށްވާތީ، ސަޕްލައި މެދުކެނޑިއްޖެ ނަމަ އެ ގައުމަށް ބޮޑެތި ގޮންޖެހުންތަކެއް ކުރިމަތިވާނެ އެވެ.