އެސްޖޭ ކުންފުނިން ހުޅުމާލޭ ފޭސް ދޭއްގައި އިމާރާތް ކުރަމުންދާ މިސްކިތުގެ މަސައްކަތް ނުނިންމާ އުޅެނިކޮށް އެކުންފުނިން ރިސޯޓެއް ހެދުމަށް ރަށެއް ނަގައިފިއެވެ.
ޓޫރިޒަމް މިނިސްޓްރީން ވަނީ މިކަމުގެ ބައެއް ލިޔެކިޔުންތައް މީޑިއާއާ ހިއްސާކޮށްފައެވެ. އެސްޖޭއިން ރިސޯޓް ތަރައްޤީކުރުމަށް ނަގާފައިވަނީ، ޅ. އަތޮޅު ވިހަފަރު ފިނޮޅެވެ. މި ރަށް އެސްޖޭއިން ނަގާފައިވަނީ، ޓޫރިޒަމުން ހުޅުވާލި ފުރުސަތެއްގައި ޕްރޮޕޯސަލް ހުށަހަޅައިގެންނެވެ. 
ޓޫރިޒަމް މިނިސްޓްރީން މިހާރު ވަނީ ފިހަފަރު އެސްޖޭއާ ހަވާލުކުރުމުގެ އެއްބަސްވުމުގައި ސޮއިވެސްކޮށްފައެވެ. އެސްޖޭ ކުންފުންޏަށް ރިސޯޓް ހަދަން ރަށެއް ދިނުމުގެ އެއްބަސްވުމެއް ޤާއިމްކޮށްފައިވާއިރު، އެކުންފުނިން ފޭސް ދޭއްގައި އިމާރާތްކޮށް ނިންމަން ޖެހޭ މިސްކިތެއް ކަނޑައެޅިފައިވާ ތާރީހަށް ނުނިންމުމުގެ މައްސަލައެއް ވަނީ ފެންމަތިވެފައެވެ. 
އެސްޖޭއަށް ދިންކަމަށް ބުނާ ފިނޮޅު.. ފޮޓޯ: ގޫގުލް އިމޭޖް
ފޭސް ދޭއްގެ ސަލާހުއްދީން ސްކޫލް ކައިރީގައި ބިނާކުރަމުންދާ މިސްކިތް ނިންމުމުގެ އެންމެ ފަހު ތާރީހެއްގެ ގޮތުގައި އެކުންފުންޏަށް ދީފައިވަނީ މިދިޔަ ޑިސެމްބަރުމަހެވެ. ނަމަވެސް އަދިވެސް އެ މިސްކިތް ނިމިފައެއް ނުވެއެވެ. މިކަމާ ގުޅިގެން ދެން އަމަލުކުރާނެ ގޮތެއް އިސްލާމިކް މިނިސްޓްރީން ބުނެފައެއް ނުވެއެވެ.
ހުޅުމާލޭ ފޭސް ދޭއްގައި އެސްޖޭއިން ބިނާކުރަމުންދާ މިސްކިތުގެ މަސައްކަތުގެ އެއްބަސްވުމުގައި ސޮއިކޮށްފައިވަނީ، 2022 ވަނަ އަހަރުގެ ޖެނުއަރީމަހުގެ ތެރޭގައެވެ. އެސްޖޭއިން އެ މިސްކިތް ނިންމާގޮތަށް އޮތީ އަހަރުދުވަހުގެ ތެރޭގައެވެ. 
މައުލޫމާތު ލިބިފައިވާގޮތުގައި ސަރުކާރުން ވަނީ މިސްކިތް އިމާރާތްކުރުމަށް އެސްޖޭއަށް ދޭންޖެހޭ ފައިސާ ދީ ނިންމާފައެވެ. ނަމަވެސް މިސްކިތުގެ މަސައްކަތް ނުނިމެނީސް އެސްޖޭއަށް ރިސޯޓެއް ހަދަން ދިން ސަބަބެއް އަދި ޓޫރިޒަމް މިނިސްޓްރީއަކުން އަދި މިހާތަނަކަށް ނުބުނެއެވެ. 
މިސްކިތާއި އަދި ހައުސިންގެ އިމާރާތްކުރާ ބައެއް ކުންފުނިތަކުން ނާޖާއިޒް ފައިދާ ނަގައި، ރާއްޖެއިން ބޭރުން ޑިއުޓީއެއްނެތި މުދާ ގެންނަ މައްސަލަތަކަކީވެސް ރާއްޖޭގައި ހިނގަމުން އަންނަ ކޮރަޕްޝަނުގެ މައްސަލަތަކުގެ ތެރެއިން ފާހަގަކޮށްލެވޭ ކަމެކެވެ. މިކަންކަމުގައި ދައުލަތުގެ އިދާރާތަކުގެ އެކި ފަންތީގެ މުއައްޒަފުން ބައިވެރިވާކަމަށް ރައްޔިތުންގެ މަޖިލީހުގެ ޖަލްސާތަކުންނާއި ކޮމިޓީތަކުން މަޖިލީހުގެ މެމްބަރުންނާއި، މިނިވަން މުއައްސަސާތަކުގެ މެމްބަރުން ފާހަގަކުރެއެވެ.