އިންޑިއާގެ ހުޅަނގު ބެންގާލްގައި ނުރައްކާތެރި 'ނިޕާ' ވައިރަސް ފެތުރެން ފެށުމާ ގުޅިގެން، އޭޝިއާގެ ބައެއް ގައުމުތަކުން އެއާޕޯޓުތަކުގެ ސިއްހީ ފާސްކުރުންތަކާއި ރައްކާތެރިކަމުގެ ފިޔަވަޅުތައް އަލުން ވަރުގަދަކުރަން ފަށައިފިއެވެ. ތައިލެންޑް، ނޭޕާލް އަދި ތައިވާން ފަދަ ގައުމުތަކުން މިހާރު ވަނީ އިންޑިއާއިން އަންނަ ފަސިންޖަރުން ސްކްރީން ކުރުމުގެ ހަރުކަށި އުސޫލުތަކަށް އަމަލުކުރަން ފަށާފައެވެ. މި ފިޔަވަޅުތައް އަޅަން ފެށީ ހުޅަނގު ބެންގާލުން މި ބަލީގެ ފަސް ކޭސްއެއް ފެނި، ގިނަ ބަޔަކު ކަރަންޓީނު ކުރަން ޖެހުމާ ގުޅިގެންނެވެ. ތައިލެންޑުގެ ސުވަންނަބޫމީ، ފުކެޓް އަދި ފޮން މުއާން އެއާޕޯޓުގައި މިހާރު ދަނީ ހުޅަނގު ބެންގާލުން އަންނަ ފަސިންޖަރުންގެ ހުން ހުރިތޯއާއި ބަލީގެ އެހެނިހެން އަލާމާތްތައް ހުރިތޯ ބަލައި މޮނިޓަރު ކުރަމުންނެވެ. އަދި ބަލިވެއްޖެ ނަމަ އަމަލުކުރާނެ ގޮތުގެ އިރުޝާދު ދޭ ހާއްސަ ހެލްތު ކާޑުތަކެއްވެސް ދަނީ ފަސިންޖަރުންނަށް ދޫކުރަމުންނެވެ. ތައިލެންޑުގެ ޑިޕާޓްމެންޓް އޮފް ޑިޒީޒް ކޮންޓްރޯލުން އިންޑިއާގެ ވެސްޓް ބެންގާލް އިން ދަތުރުކުރާ މީހުން ސުވަރްނަބޫމީ އަދި ޑޮން މުއަންގް އެއާޕޯޓުން ސްކްރީން ކުރަނީ -- ފޮޓޯ: އިންޑިޕެންޑެންޓް ހާއްސަކޮށް ޕުކެޓް ބައިނަލްއަގުވާމީ އެއާޕޯޓުގައި ސިއްހީ ފިޔަވަޅުތައް ވަނީ އިތުރަށް ވަރުގަދަކޮށްފައެވެ. އެއީ ހުޅަނގު ބެންގާލްގެ ކަލްކަތާއާއި ޕުކެޓާ ދެމެދު އިންޑިގޯ އެއާލައިނުން ކޮންމެ ދުވަހަކު ސީދާ ދަތުރުތައް ބާއްވަމުންދާތީއެވެ. ތައިލެންޑުގެ ބޮޑުވަޒީރު އަނޫތިން ޗާންވީރަކުލް ވިދާޅުވި ގޮތުގައި އެ ގައުމުން އަދި މި ބަލީގެ ކޭސްއެއް ފެނިފައެއް ނުވެއެވެ. ނަމަވެސް ބަލި ފެތުރުން ހުއްޓުވުމަށްޓަކައި އެއާޕޯޓުތަކުގެ ފާރަވެރިކަން މެދުކަނޑުމެއް ނެތި ކުރިއަށް ގެންދާނެ ކަމަށް އޭނާ ވިދާޅުވިއެވެ. އިންޑިއާގެ ހުޅަނގު ބެންގާލްގައި މި ބަލި ފެނުނީ އެ ސަރަހައްދުގެ ހޮސްޕިޓަލަކުންނެވެ. ބަލި ޖެހުނު މީހުންގެ ތެރޭގައި ޑޮކްޓަރަކާއި ދެ ނަރުހުން ހިމެނޭއިރު، މިކަމާ ގުޅިގެން 100 އެއްހާ މީހުން ވަނީ ކަރަންޓީނުކޮށްފައެވެ. ތައިލެންޑަށް އަންނަ ދަތުރުވެރިން ނުވަތަ ނިޕާ އިންފެކްޝަންގެ އަލާމާތެއް ފެނި ކަރަންޓީން ފެސިލިޓީތަކަށް ފޮނުވަނީ --- ފޮޓޯ: އިންޑިޕެންޑެންޓް ނޭޕާލް ސަރުކާރުންވެސް ވަނީ ކަތުމަންޑޫގެ އެއާޕޯޓުގެ އިތުރުން އިންޑިއާއާ ގުޅޭ ބޯޑަރުތަކުގައި ހެލްތު ޑެސްކުތައް ގާއިމުކޮށްފައެވެ. އިންޑިއާގެ ބޯޑަރު ހުރަސްކޮށް ކޮންމެ ދުވަހަކު ގިނަ ބަޔަކު ދަތުރުކުރާތީ، ބަލި އެތެރެވިޔަ ނުދިނުމަށް އެ ގައުމުން ވަނީ ސިއްހީ އެލާޓް މަތިކޮށްފައެވެ. ތައިވާނުގެ ސިއްހީ އިދާރާތަކުން ނިންމާފައިވަނީ 'ނިޕާ' ވައިރަހަކީ އެންމެ ނުރައްކާތެރި ބަލިތައް ހިމެނޭ "ކެޓަގަރީ 5" ގެ ބައްޔެއްގެ ގޮތުގައި ކަނޑައެޅުމަށެވެ. މީގެ އިތުރުން އިންޑިއާގެ ބައެއް ސަރަހައްދުތަކަށް ދަތުރުކުރުމުގައި ސަމާލުވުމަށްވެސް އެ ގައުމުން ވަނީ އިރުޝާދު ދީފައެވެ. ދުނިޔޭގެ ސިއްހަތު ޖަމްއިއްޔާއިން 'ނިޕާ' ވައިރަސް ސިފަކޮށްފައިވަނީ ބޮޑު ބަލިމަޑުކަމަކަށް ބަދަލުވުމުގެ ފުރުސަތު އޮތް ނުރައްކާތެރި ބައްޔެއްގެ ގޮތުގައެވެ. މި ބަލި ޖެހުމުން ފެންނަ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ނޭވާލާން އުނދަގޫވުމުގެ އިތުރުން ސިކުނޑި ދުޅަވުން ހިމެނެއެވެ. ވާލާއި އޫރުގެ ފަރާތުން އިންސާނުންނަށް ފެތުރޭ މި ބައްޔަކީ މަރުވާ ނިސްބަތް ވަރަށް މަތީ ބައްޔެކެވެ. ރެކޯޑުތަކުން ދައްކާ ގޮތުގައި މި ބަލި ޖެހޭ މީހުންގެ ތެރޭގައި 40 އިންސައްތައާއި 75 އިންސައްތައާ ދެމެދުގެ އަދަދަކަށް މީހުން މަރުވެއެވެ.