ކައުންސިލް އިދާރާއަކުން ރަސްމީކޮށް ރެކޯޑް ނުބަލަހައްޓާނަމަ ސަރުކާރުން މިހާރު އިއުލާނު ކޮށްފައިވާ ގޯއްޗާއި ފްލެޓަށް އެދި ކުރިމަތިލާ ފަރާތެއް އެދިގެން މާލޭގައި 15 އަހަރު މެދުނުކެނޑި އުޅުނު ބައެއް ކަމަށް ކަނޑައަޅައި ލިޔުން ދޫނުކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ބުނެފިއެވެ.
އެ އިދާރާ އިން މިހެން ބުނެފައި ވަނީ ކައުންސިލްތަކަށް ފޮނުވި ސިޓީއެއްގައެވެ. ސަރުކާރުން ހުޅުވާލި "ބޯހިޔާވަހިކަން އެންމެންނަށް" މަޝްރޫއުގެ ދަށުން ބިމާއި ފްލެޓަށް ކުރިމަތިލުމަށް އެދޭ އެތައް ބަޔަކު އަންނަނީ އެ މީހަކީ މާލޭގައި ދިރިއުޅޭ މީހެއް ކަން އަންގައިދޭ ލިޔުން ހޯދުމަށް ކައުންސިލްތަކުގައި އެދެމުންނެވެ. އަދި މި ކަމާ ގުޅިގެން އެތައް ކައުންސިލްތަކަކުން އަންނަނީ އެލްޖީއޭގެ ލަފައަކަށް އެދެމުން ކަމަށް އެލްޖީއޭ އިން ބުނެއެވެ.
އެ ގޮތުން ކައުންސިލްތަކަށް އެލްޖީއޭ އިން ފޮނުވި ސިޓީގައި ބުނެފައި ވަނީ، މާލޭގައި ދިރިއުޅުނު މުއްދަތު ސާބިތުކުރުމަށް ހުށަހެޅިދާނެ ލިޔެކިޔުންތަކުގެ ތެރޭގައި ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔުންތަކާއި މައުލޫމާތުތަކުން މާލޭގައި ދިރިއުޅުނުކަން ސާބިތުވާ ނަމަ އެ އިދާރާއަކުން ދީފައިވާ ލިޔުން ހުށަހެޅިދާނެ ކަމަށެވެ. ނަމަވެސް އިދާރާއަކުން ދޫކުރާ ލިޔުން ބަލައިގަނެވޭނީ އެ އިދާރާ އިން ރަސްމީކޮށް ރެކޯޑްތައް ބަލަހައްޓާ މައުލޫމާތުން މާލޭގައި އުޅެފައިވާ މުއްދަތު ސާބިތުވާ ނަމަ ކަމަށް އެލްޖީއޭ އިން ބުނެއެވެ. އަދި މާލޭގައި އުޅެފައިވާ ސާބިތުކޮށް ނުދެވޭ ނަމަ އެ ލިޔުން ބަލައި ނުގަންނާނެ ކަމަށް ވެސް ވަނީ ބުނެފައެވެ.
މީގެ ކުރިން ވެސް ކައުންސިލުތަކުން ސާބިތު ނުކުރެވޭ ނުވަތަ ދޮގު މައުލޫމާތު ހިމަނަގައިގެން އެފަދަ ލިޔުންތައް ދޫކޮށްފައި ވާތީ، އެ ލިޔުން ދޫކުރުމުގައި ޒިންމާވާ ފަރާތްތަކުގެ މައްސަލަ ބަަލައި ފިޔަވަޅު އެޅުމުގެ މަސައްކަތް ކަމާގުޅޭ އިދާރާތަކުން ކޮށްފައިވާ ކަމަށް އެލްޖީއޭ އިން ބުނެއެވެ.
މި ކަމާ ގުޅިގެން ހައުސިން މިނިސްޓަރު ޑރ. އަބްދުﷲ މުއްތަލިބް ދާދި ފަހުން ޕީއެސްއެމް ނިއުސް އަށް ދެއްވި އިންޓަވިއުއެއްގައި ވެސް ވަނީ ކައުންސިލު ރައީސަށް މާލޭގައި މީހަކު 15 އަހަރު އުޅުނު ކަމަށް ބަޔާންކޮށް ލިޔުން ނުދެވޭނެ ކަމަށް ވިދާޅުވެފައެވެ. މާލޭގައި 15 އަހަރު އުޅުނު ކަމަށް ބުނާ ލިޔުން ހުށަހެޅުމުގައި މި ސަރުކާރުން ލުއިތަކެއް ދީފައި ހުންނާނެ ކަމަށް މިނިސްޓަރު ފާހަގަ ކުރެއްވިއެވެ. އެގޮތުން ވަަޒީފާއެއްގައި އުޅުނު ކަމުގެ ލިޔުން ނުވަތަ އާއިލާއެއް ބިނާކުރި ކަމުގެ ރަސްމީ ލިޔެކިޔުމެއް ނެތް ނަމަ އެ އުޅުނު ގެއެއްގެ ވެރިފަރާތެއްގެ ލިޔުން ހުށަހެޅިދާނެ ކަމަށް މުއްތަލިބު ވިދާޅުވިއެވެ. ނަމަވެސް އެ ގޮތަށް ހުށަހަޅާ ކޮންމެ ލިޔުމަކީ ގާނޫނީ ލިޔުމަކަށް ވާންޖެހޭނެ ކަމަށާއި އެއީ ނޮޓަރައިޒްޑް ކޮށްފައިވާ ލިޔުމަކަށް ވާން ޖެހޭނެ ކަމަށް މިނިސްޓަރު ވިދާޅުވިއެވެ.
މާލޭގައި ދިރިއުޅުމަށް ބިން ދޫކުރުމުގެ ސްކީމުގެ ތެރެއިން ގްރޭޓާ މާލޭ ސަރަހައްދުންނާއި ރަސްމާލެއިން 1250 އަކަފޫޓުގެ ޖުމުލަ 15،000 ގޯތި ދޫކުރުމަށް ވަނީ ހަމަޖެހިފައެވެ. ހަމައެއާއެކު ފުލެޓު ދޫކުރުމުގެ ސްކީމުގެ ތެރެއިން ގްރޭޓާ މާލޭ ސަރަހައްދުން 7900 ފުލެޓު ދޫކުރުމަށް ހަމަޖެހިފައިވެއެވެ. މި ސްކީމްގެ ތެރެއިން ބިމަށް އެދި ހުށަހެޅުމުގެ ސުންގަޑި ހަމަވާނީ މާޗް މަހުގެ 5 ވަނަ ދުވަހުގެ ނިޔަލަށެވެ. އަދި ފްލެޓަށް އެދި ހުށަހެޅުމުގެ ސުންގަޑި ހަމަވާނީ އޭޕްރިލް 18 ވަނަ ދުވަހުގެ ނިޔަލަށެވެ.