ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު 2021 ވަނަ އަހަރު އެމެރިކާގެ ނިއުޔޯކަށް ކުރެއްވި ދަތުރުފުޅުގެ ޚަރަދުތަކުގެ ތަފުސީލް ހާމަކުރުމަށް އިންފޮމޭޝަން ކޮމިޝަނުން އެންގި އެންގުމަށް ތާއިދުކޮށް ހައި ކޯޓުންކުރި ހުކުމް، ސުޕްރީމް ކޯޓުގައި އިސްތިއުނާފުކޮށްފިއެވެ. އެޓާނީ ޖެނެރަލްގެ އޮފީހުން މިއަދު ބުނީ އެ މައްސަލަ މިދިޔަ އާދިއްތަ ދުވަހު ދައުލަތުން ސުޕްރީމް ކޯޓުގައި އިސްތިއުނާފުކޮށްފައިވާ ކަމަށެވެ. ނަމަވެސް އެ މައްސަލަ ބަލައިގަތުމާ ބެހޭ ގޮތުން އެ ކޯޓުން މިހާތަނަށް ވަކި ގޮތެއް ނިންމާފައިނުވެއެވެ. ރައީސްގެ އެ ދަތުރުފުޅަކީ އދ.ގެ އާންމު މަޖިލީހުގެ 76 ވަނަ ސެޝަންގައި ތަގްރީރު ކުރެއްވުމަށް އެމަނިކުފާނާއި ސަރުކާރުގެ އިސް ވަފުދެއް ނިއުޔޯކަށް ކުރެއްވި ދަތުރުފުޅެކެވެ. ހައިކޯޓުގެ ނިންމުމުގައިވާ ގޮތުން ނޫސްވެރިއަކު ރައީސް އޮފީހުގައި އެ މައުލޫމާތަށް އެދުނީ ސެޕްޓެމްބަރު 27، 2021ގައެވެ. އެކަމާ ގުޅިގެން އެ އޮފީހުން މައުލޫމާތު ފޯރުކޮށްދިނުމުން، އެ މައުލޫމާތު ފުރިހަމަ ނޫން ކަމަށް ބުނެ އަނެއްކާވެސް އޭނާ ރައީސް އޮފީހަށް ސިޓީއެއް ހުށަހެޅިއެވެ. އެ ސިޓީއަށް ދިން ޖަވާބުގައި ރައީސް އޮފީހުން ބުނެފައި ވަނީ، އެމަނިކުފާނުގެ ދަތުރުފުޅުގައި ސަރުކާރުން ކުރި ޚަރަދުތަކާ ގުޅޭ ރަސީދުތަކުގައި ތިން ވަނަ ފަރާތެއްގެ ޒާތީ މައުލޫމާތު ހިމެނޭ ކަމަށެވެ. އެ ސަބަބާ ހެދިއާއި ސަލާމަތީ އިތުރު ސަބަބުތަކާ ހެދި އެ ރަސީދުތައް ސިއްރުކުރަން ނިންމާފައިވާ ކަމަށް ރައީސް އޮފީހުން ބުނެފައިވެއެވެ. އެއަށް ފަހު އެ މައްސަލަ އިންފޮމޭޝަން ކޮމިޝަނަށް ހުށަހެޅުމުން އެ ކޮމިޝަނުން އަންގާފައި ވަނީ ސަލާމަތީ ސަބަބުތަކަށް ޓަކައި އުނިކުރަންޖެހޭ މައުލޫމާތާއި ޒާތީ މައުލޫމާތު އުނިކުރުމަށް ފަހު ބާކީ މައުލޫމާތު ހާމަކުރުމަށެވެ. އެ މައްސަލަ ދައުލަތުން ހައިކޯޓަށް ހުށަހެޅުމުން މިދިޔަ މެއި މަހުގެ 25ގައި އެ ކޯޓުން ނިންމީ އިންފޮމޭޝަން ކޮމިޝަންގެ ނިންމުމަށް ތާއިދުކުރާށެވެ.