ރާއްޖެ އާއި އިންޑިއާއާ ދެމެދު އޮތް ގުޅުން ރަނގަޅުވަމުން އަންނާތީ އުފާ ކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާުވެއްޖެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތް ފަހުން އިންޑިއާ އަށް ކުރައްވާ ފުރަތަމަ ރަސްމީ ދަތުރުގައި އިއްޔެ އެ ގައުމަށް ވަޑައިގަތުމާ ގުޅިގެން ރައްޔިތުންގެ މަޖިލީހުގެ ރައީސްކަން ވެސް ކުރެއްވި ނަޝީދު ސޯޝަލް މީޑިއާ ޕޯސްޓެއްގައި ވިދާޅުވީ ރާއްޖެ އާއި އިންޑިއާ އަކީ އެތައް ގޮތަކުން ވަރަށް ގާތް، އެއްގޮތަށް ދެ ގައުމު ކަމަށެވެ.
އެގޮތުން މިއުޒިކާއި ފިލްމާއި ކާނާ އާއި ސަގާފަތާއި ތާރީހާއި ޖޯގްރަފީ ގޮތުން ވެސް ދެ ގައުމަކީ ވަރަށް އެއްގޮތް ދެ ގައުމު ކަމަށް ވިދާޅުވި އެވެ.
"އެހެންވެ އަަބަދު ވެސް ދެމިތިބެން ވާނީ މިތުރުންގެ ގޮތުގައި." ނަޝީދު ވިދާޅުވި އެވެ.
އެ މަނިކުފާނު ވިދާޅުވީ މި ސަރުކާތު ވެރިކަމަށް އައި ފަހުން އިންޑިއާއާ އޮތް ގުޅުމަށް ހީނަރުކަން އައި ނަމަވެސް އެ ގުޅުން މިހާރު ހަމައަކަށް އެޅި، ގުޅުން ބަދަހިވަމުން އަންނާތީ ވަރަށް އުފާ ވެސް ކުރައްވާ ކަމަށެވެ. އެހެންވެ މިކަމަށްޓަކައި ރައީސް މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ ކުރައްވާ މަސައްކަތްތަކަށް މަރުހަބާ ވިދާޅުވެފައިވެ އެވެ.
ރައީސް އިންޑިއާ އަށް މިހާރު ކުރައްބަމުން ގެންދަވާ ދަތުރަކީ އެ ގައުމުގެ ރައީސް ދުރޯޕަޅީ މުރްމޫގެ ދައުވަތަކަށް ކުރައްވާ ދަތުރެކެވެ. މޯދީ ވެރިކަމުގެ ތިން ވަނަ ދައުރަކަށް މިދިޔަ އެޕްރީލް މަހުގެ ތެރޭގައ އިންތިހާބުވުމާ ގުޅިގެން ހުވާ ކުރެއްވުމުގެ ރަސްމިއްޔާތަށް ވެސް ރައީސް އިންޑިއާ އަށް ވަޑައިގެތެވެ.
ރައިސް މުއިއްޒު މިހާރު އިންޑިއާ އަށް ކުރައްވާ ރަސްމީ ދަތުރަކީ މި މަހުގެ 10 އާ ހަމައަސް ކުރައްވާ ދަތުރެކެވެ.