ސިޔާސީ ޕާޓީތަކުގެ ރަޖިސްޓްރޭޝަން ނިޒާމަށް ގެނައި ބޮޑު އިސްލާހުތަކާއެކު، މީހުންނަށް ނޭނގި ސިޔާސީ ޕާޓީތަކަށް ރަޖިސްޓްރީ ކުރާ މައްސަލަ ދާއިމީކޮށް ހައްލުކުރެވިފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން އިލެކްޝަންސް ކޮމިޝަންގެ މެންބަރު ޙަސަން ޒަކަރިއްޔާ ވިދާޅުވީ، އީފާސް ނިޒާމު ތައާރަފްކުރުމާއި ސިމެދަ ޕޯޓަލްއަށް ގެނައި ކުރިއެރުންތަކުގެ ސަބަބުން، ސިޔާސީ ޕާޓީތަކުގެ މެންބަރުންގެ ކަންކަން ބެލެހެއްޓުން ހަރުދަނާވެ، ހުއްދަނެތި ޕާޓީތަކަށް މީހުން ވެއްދުން ހުއްޓުވިފައިވާ ކަމަށެވެ.
ޒަކަރިއްޔާ ވިދާޅުވި ގޮތުގައި، ގަވާއިދުތަކަށް ބަދަލު ގެނެސް ޑިޖިޓަލް ނިޒާމު ތައާރަފްކުރި ފަހުން، މީހެއްގެ ނުރުހުމުގައި ނުވަތަ ނޭނގި ޕާޓީއަކަށް ރަޖިސްޓްރީކޮށްގެން އެއްވެސް ޝަކުވާއެއް ކޮމިޝަނަށް ލިބިފައެއް ނުވެއެވެ. އަދި މިހާރު އޮތް ނިޒާމުގެ ތެރެއިން މީހަކަށް ނޭނގި ޕާޓީއަކަށް ވެއްދުމަކީ ނުވަތަ އެއް ޕާޓީން އަނެއް ޕާޓީއަށް ބަދަލުކުރުމަކީ ކުރެވޭނެ ކަމެއް ނޫން ކަމުގެ ޔަގީންކަން އޭނާ ދެއްވިއެވެ.
ކުރިން އޮތް ނިޒާމުގައި ރާއްޖޭގެ އެކި ކަންކޮޅުތަކުން ހުށަހަޅާ މެންބަރޝިޕް ފޯމުތަކުގެ ސައްހަކަން ކަށަވަރުކުރާނެ ހަރުދަނާ އުސޫލެއް ނެތްކަން ޒަކަރިއްޔާ ފާހަގަކުރެއްވިއެވެ. ނަމަވެސް، އައު އޮނިގަނޑުގެ ދަށުން ޕާޓީއަށް ވަނުމާއި ޕާޓީން ވަކިވުމުގެ ހުރިހާ މަރުހަލާއެއް ކުރިއަށްދަނީ އީފާސް މެދުވެރިކޮށް ކަމަށްވުމުން، އެއީ ރައްކާތެރި އަދި ދެފުށް ފެންނަ ނިޒާމެއްކަން އޭނާ ބަޔާންކުރެއްވިއެވެ.
މި އިސްލާހުތަކުގެ ސަބަބުން ސިޔާސީ ޕާޓީތަކުން ވަކިވުމަށްވެސް ވަނީ ފަސޭހަވެފައެވެ. ކުރިން ޕާޓީން ވަކިވާން ބޭނުންވާ މީހުން ސީދާ އެ ޕާޓީއަކަށް ސިޓީ ހުށަހަޅަން ޖެހުނު ނަމަވެސް، މިހާރު ޕާޓީތަކުގެ އިސް މަގާމުތަކުގައި ތިއްބަވާ ބޭފުޅުންނާއި އިންތިޚާބީ މަގާމުތަކުގައި ތިއްބަވާ ބޭފުޅުން ހިމެނޭހެން، ކޮންމެ މީހަކަށްވެސް އަމިއްލައަށް އީފާސް މެދުވެރިކޮށް ޕާޓީން ވަކިވެވޭނެއެވެ.
އިލެކްޝަންސް ކޮމިޝަނުން އިތުރަށް ބުނީ، ސިޔާސީ ޕާޓީތަކާއި އާންމުންނާ ގުޅިގެން މިހާރު ހުރި މައްސަލަތައް ދެނެގަނެ، ގާނޫނީ އޮނިގަނޑުގެ ތެރެއިން އިތުރު ކުރިއެރުންތައް ގެނައުމުގެ މަސައްކަތް ކުރަމުންދާނެ ކަމަށެވެ.