ހޯމް މިނިސްޓަރު ކަމަށް މިއަދު އައްޔަންކުރެއްވި އުމަރު ނަސީރު ފުލުހުންގެ އެގްޒެކެޓިވް ބޯޑުގެ މެމްބަރުންނާ މިއަދު ބައްދަލު ކުރައްވައިފި އެވެ.މިއަދު ހަވީރު ޕޮލިސް ހެޑްކުއާޓާޒަށް އުމަރު ވަޑައިގަތުމުން މަރުހަބާ ދެންނެވީ ޑެޕިއުޓީ ކޮމިޝަނަރު އޮފް ޕޮލިސް ހުސައިން ވަހީދެވެ. ފުލުސް އޮފީހުން ބުނީ ފުލުހުންގެ އެއްވެސް މަސައްކަތަކަށް ހޯމް މިނިސްޓަރު އުމަރުގެ ނުފޫޒު ނުފޯރާނެ ކަމަށާއި ފުލުހުންގެ ހިދުމަތް މިނިވަންކަމާއެކު ކުރިއަށް ގެންދިއުމަށް އެއްބާރުލުން ދެއްވާނެ ކަމަށް އުމަރު ވިދާޅުވި ކަމަށެވެ. އަދި ފުލުހުންގެ މަސައްކަތްތައް ގާތުން ތަޖުރިބާކޮށް ފުލުހުންގެ މަސައްކަތްތަކުގެ ހާލަތު ދެނެގަތުމަށް ފުލުހުންގެ މަރުކަޒުތަކަށް ވަރަށް އަވަހަށް ޒިޔާރަތް ކުރައްވާނެ ކަމަށް އުމަރު ވިދާޅުވި ކަމަށް ވެސް ފުލުހުން އޮފީހުން ބުންޏެވެ.އެ ބައްދަލުކުރެއްވުމަކީ ހޯމް މިނިސްޓަރުކަމުގެ މަގާމަށް އުމަރު އައްޔަންކުރެއްވި ފަހުން ފުލުހުންނާއެކު ފުރަތަމަ ބޭއްވި ބައްދަލުވުމެވެ. އުމަރު އެ މަގާމަށް އައްޔަން ކުރެއްވިތާ ކުޑަ އިރުކޮޅެއް ފަހުން ޕޮލިސް ކޮމިޝަނަރު އަބްދުﷲ ރިޔާޒް ވަނީ މަގާމުން އިސްތިއުފާ ދެއްވައިފަ އެވެ.