ގާނޫނު އަސާސީ ހިމާޔަތްކޮށް ދިވެހި ރައްޔިތުންނަށް ސަލާމަތްތެރިކަމާއި އަމާންކަން ހޯދައިދޭން ކުރައްވާ މަސައްކަތާ ދެކޮޅަށް ފިއްތުންތައް ކުރިމަތިކުރުވައި، ކިތަންމެ ބިރުދެއްކިޔަސް ޖެހިލުން ނުވާނެ ކަމަށާއި ގާނޫނު އަސާސީ ހިމާޔަތް ކުރުމުގައި ސާބިތުކަމާ އެކު ދެމިހުންނަވާނެ ކަމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް މިއަދު ވިދާޅުވެއްޖެ އެވެ.
ގާސިމް ދިރިއުޅުއްވާ މާފަންނުވިލާ ކައިރީގައި ނޫސްވެރިންނާ ވާހަކަ ދައްކަވަމުން ވިދާޅުވީ ގާނޫނު އަސާސީ ހިމާޔަތްކުރުމަށްޓަކައި ވާން ޖެހުނު ކޮންމެ ގުރުބާނީއެއް ވާން އެ ޕާޓީގެ ޕާލިމެންޓްރީ ގްރޫޕުން ނިންމާފައިވާ ކަމަށެވެ. އެކަމާ ދެކޮޅަށް ބިރުދެއްކިޔަސް، ފިއްތުންތައް ކުރިމަތިކުރިޔަސް އެކަން ބަދަލު ނުވާނެ ކަމަށް އޭނާ ވިދާޅުވި އެވެ. އަދި ވެރިކަމުގައި ތިބޭ ބަޔަކު ބޭނުންވާ ގޮތަށް "މޮޑޭ ފުށްގަނޑެއްހެން ގާނޫނު އަސާސީ މޮޑުނައެއް ނުދޭނެ" ކަމަށް ވެސް ވިދާޅުވި އެވެ.
"[ގާނޫނު އަސާސީ ހިމާޔަތް ކުރަން] އަރަން ޖެހުނު ކޮންމެ އޮޑިއަކަށް ނަމަވެސް އަޅުގަނޑުމެން އަރާނަން. އަޅުގަނޑުމެންގެ އަނބިދަރިންނާއި ޅަކުދިންނާއި ޒުވާނުންނާއި ޅަ ކުދިންނާއި މުސްކުޅިންނާއި އެންމެންގެ ހުރުމަތް، އެމީހުންގެ ރައްކާތެރި ކަމަށް ގާނޫނު އަސާސީން ކަށަވަރުކޮށްދީފައިވާ ކަންތައްތައް ވެރިކަމުގައި ހުންނަ މީހަކު ބޭނުންވީމަ އައިސް ބޭނުންވާހާ ގޮތަކަށް ކުޅެނުލެވޭނެ އެއްޗަކަށް ވާން ބޭނުމެއް ނުވޭ،" ގާސިމްގެ ގެ ފާސްކުރަން ކޯޓް އަމުރެއް ނެރުނު ކަމަށް ފެތުރުނު އަޑާ ގުޅިގެން ގެއަށް ވަޑައިގެން ނޫސްވެރިންނާ ވާހަކަ ދައްކަވަމުން ވިދާޅުވި އެވެ.
ގާސިމް ވިދާޅުވި ގޮތުގައި ރައްޔިތުންނަށް ސަލާމަތްތެރިކަމާއި އަމާންކަން އޮތީ ވެސް ގާނޫނު އަސާސީ ހިމާޔަތްކޮށްގެންނެވެ. ވެރިކަމަށް ވަޑައިގަންނަވާ ބޭފުޅަކު، ވެރިކަމަކީ އެ ބޭފުޅެއްގެ އަމިއްލަ މިލްކަކަށް ހަދައި، "ދަރިދަރި މުނިމުންޏަށް ދާގޮތަށް ކަންތައްތަކެއް ނުކުރެވޭނެ" ކަމަށް ގާސިމް ވިދާޅުވި އެވެ.
"ޖާނުން ކިތަންމެ ބިޔަ ބޭފުޅަކު ވިދާޅުވިޔަސް އަޅުގަނޑުމެން ތުރުތުރެއް ނާޅާ، އެއްގޮތަކަށް ވެސް ތުރުތުރެއް ނާޅާ. އަޅުގަނޑުމެން މިތިބީ ވަރަށް ސާބިތުކަމާ އެކުގައި، ގާނޫނީ ހުދޫދުގެ ތެރޭގައ،ި އިމުގެ ތެރޭގައި،" ގާސިމް ވިދާޅުވި އެވެ.
ގާސިމްގެ ގެ ފާސްކުރުމަށް ކޯޓު އަމުރު ނެރުނު ކަމަށް ދެކެވުނު ވާހަކަތަކާ ގުޅިގެން ނޫސްވެރިއަކު ސުވާލު ދެންނެވުމުން ވިދާޅުވީ ގެ ބަލައި ފާސްކުރިޔަސް މައްސަލައެއް ނެތް ކަމަށާއި "ފުލުހުން އަވަހަށް، ބާރަށް ކުރިއަށް ވަޑައިގަންނަވަންވީ" ކަމަށެވެ. އަދި "އަނބިދަރިން ޗެކްކުރިޔަސް" މައްސަލައެއް ނެތް ކަމަށާއި ކޯޓު އަމުރު ނެރެ ފުލުހުން "ބަލަން ބޭނުންވާ އެއްޗެއް ބަލަންވީ" ކަމަށް އޭނާ ވިދާޅުވި އެވެ.
ވީޓީވީ އަށް ހުޅުމާލެ އިން 25 އަހަރަށް ކުއްޔަށް ދޫކޮށްފައިވާ ބިން އަތުލި މައްސަލާގައި ގާސިމް ވިދާޅުވީ އެ ބިން ދޫކުރި ޝަރުތުތަކާ އެއްގޮތަށް އަމަލުކުރަމުން އަންނަނިކޮށް، އެތަން ނެގީ ސަރުކާރަށް ފެނިގެން ކަމަށެވެ. ކޮންމެ ކަމެއް ކުރިއަސް "ސާބިތުކަމާ އެކު އަޅުގަނޑުމެން ތިބޭނަން، ފަހަތަކަށް ނުޖެހޭނަން" ކަމަށް ގާސިމް ވިދާޅުވި އެވެ.
އޭނާ ވިދާޅުވި ގޮތުގައި ވެރިކަން ކުރަން ޖެހެނީ ރައްޔިތުންނަށް ބިރުދައްކައިގެން ނޫނެވެ. އަދި އެއީ ވަރަށް އިހްލާސްތެރިކަމާ އެކު ހައްގުތަކަށް ހުރުމަތްތެރިކޮށް ހިތައިގެން ކުރަންޖެހޭ ކަމެއް ކަމަށެވެ. އަދި ވެރިކަމުގައި ހުންނަ ބޭފުޅަކީ އެއްވެސް ރައްޔިތަކު ތަފާތުކުރުމެއް ނެތި ހަމަހަމަކަމާއި އިންސާފުން ކަންތައްކޮށްދެއްވަން ޖެހިވަޑައިގަންނަވާ ބޭފުޅެއް ކަމަށް ވެސް ގާސިމް ވިދާޅުވި އެވެ.
އޭނާ ވިދާޅުވި ގޮތުގައި ރައްޔިތުންނަށް ހިދުމަތްކޮށްދޭން ޖެހެނީ ވޯޓުދިން މީހުންނަށް ބަލައިގެންނެއް ވެސް ނޫނެވެ. މި ގައުމުގައި ބޭއިންސާފުން އެއްވެސް ކަމެއް ހިނގުމުގެ ފުރުސަތު ނުދެއްވާނެ ކަމަށް ގާސިމް ވިދާޅުވި އެވެ.