ހަވީރު މުވައްޒަފުންގެ މެދުގައި އިޖްތިމާއީ ގުޅުން ބަދަހިކުރުމަށާއި މަސައްކަތުގެ ދާޢިރާގައި ލިބޭ ނަފްސާނީ ހާސްކަމާއި ވަރުބަލިކަން ފިލުވައި މުނިފޫހިފިލުވުމާއި މައުލޫމާތު ތަނަވަސްކުރުމުގެ ފުރުސަތު ހޯދައިދިނުމުގެ މަގްސަދުގައި އުފެއްދި "ހަވީރު ޕްރެސް ކްލަބް" ބުދަ ދުވަހުގެ ރޭ ހުޅުވައިފި އެވެ.
ޒަމާނީ ޖިމަކާއި ތަފާތު ކުޅިވަރުތަކާއި އިންޓަނެޓާއި މަލްޓިމީޑިއާ ލައިބްރަރީއެއް ހިމެނޭ މި ޕްރެސް ކްލަބު، ހަވީރުގެ ޗެއާމަން ޑރ. މުހައްމަދު ޒާހިރު ހުސެއިންގެ އެދިވަޑައިގަތުމުގެ މަތިން ހުޅުއްވައިދެއްވީ، އެޓޯލްސް މިނިސްޓަރު މުހައްމަދު ވަހީދުއްދީނެވެ. ޕްރެސް ކްލަބު ހުޅުއްވައިދެއްވުމަށް ފަހު ބައެއް ކުޅިވަރުތަކުގައި އެ މަނިކުފާނު ބައިވެރިވެވަޑައިގަތެވެ.
ބައިނަލްއަގުވާމީ ނޫސްވެރިންގެ ދުވަހާ ދިމާކޮށް ހުޅުވި މި ޕްރެސް ކްލަބުގެ މެމްބަޝިޕް ދިނުމަށް އަދި ހަމަޖެހިފައި ވަނީ ހަވީރުގެ މުވައްޒަފުންނަށް އެކަންޏެވެ. ނަމަވެސް މުވައްޒަފުންގެ އާއިލާގެ މެންބަރުންނަށް ވެސް މުވައްޒަފުންނާއެކު ކްލަބަށް އައިސް ކްލަބްގެ ހަރަކާތްތަކުގައި ބައިވެރި ވުމުގެ ފުރުސަތު ހުޅުވާލާފައިވެ އެވެ.
މި ޕްރެސް ކްލަބު ހިނގަމުން ދަނީ ގ. ރެންޑަވޫޒްގަ އެވެ.