ޝަރުއީ ދާއިރާގެ ރަސްމީ މަސައްކަތު ގަޑިއަކީ ހެނދުނު 8:00އިން މެންދުރުފަހު 3:00އަށް ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން މިއަދު ނިންމައިފި އެވެ. އެ ޑިޕާޓްމަންޓުން ނެރުނު ބަޔާނުގައި ބުނީ އަންނަ އަދިއްތަ ދުވަހުން ފެށިގެން އެ ބަދަލުގެންނާނެ ކަމަށާއިި އެކަން ކޯޓުތަކަށް ވެސް އަންގާފައިވާނެ ކަމަށެވެ. ހުސް ވަގުތުގެ ގޮތުގައި ޝަރުއީ ދާއިރާގެ މުވައްޒަފުންނަށް ލިބޭނީ އެއް ގަޑިއިރުގެ ހުސް ވަގުތުކޮޅެއް ކަމަށް ބަޔާނުގައިވެ އެވެ. އެ ވަގުތު ދެވޭނީ މެންދުރު 12:00 އާ މެންދުރު 2:00 އާ ދެމެދު ކަމަށް ޑީޖޭއޭއިން ބުންޏެވެ. މަސައްކަތު ގަޑިއަށް ބަދަލު ގެނައި ނަމަވެސް ޝަރުއީ ދާއިރާގައި ޑިއުޓީ އުސޫލުން މަސައްކަތް ކުރާ މުވައްޒަފުންގެ ރަސްމީ ގަޑިއަކީ، އެ މުވައްޒަފަކު ޑިއުޓީ ކުރަން ހަމަޖެހިފައިވާ ގަޑި ކަމަށް އެ ބަޔާނުގައިވެ އެވެ. އަދި ހުސް ވަގުތު ދިނުމުގައި ކޯޓުތައް ނުވަތަ އެ އިދާރާއެއްގެ މަސައްކަތް މެދުނުކެނޑި ހިނގާނެ ގޮތަކަށް ހަމަޖެއްސުމަށް ބަޔާނުގައި އަންގާފައިވެ އެވެ. ޕްރޮސެކިއުޓާ ޖެނެރަލް (ޕީޖީ) އޮފީހުގެ ރަސްމީ ގަޑި ވެސް ވަނީ ހެނދުނު 8:00އިން މެންދުރުފަހު 3:00އަށް ބަދަލުކޮށްފަ އެެވެ. ސަރުކާރުގެ ވަޒީފާގެ އިތުރުން ޕްރައިވެޓް ސެކްޓަރުގައި ވަޒީފާ އަދާކުރުމަށް ފުރުސަތު ދިނުމަށް ސަރުކާރުގެ ރަސްމީ ގަޑި ހެނދުނު 8:00އިން މެންދުރުފަހު 2:00އަށް މިދިޔަ ސެޕްޓެމްބަރު މަހު ވަނީ ބަދަލުކޮށްފަ އެވެ.