"ހަވީރު" ނޫސް އުފެދުނީއްސުރެ މިހާތަނާ ޖެހެންދެން ވެސް އިތުރު އެއްވެސް ފަރާތެއްގެ ނަމުގައި ހިންގާފައި ނުވާނެ ކަމަށާއި ނޫހުގެ ތަރައްގީ އަށް ހުރިހާ ހޭދައެއް ވެސް ކުރެއްވީ އަމިއްލަ އަށް ކަމަށް ޗެއާމަން ޑރ. މުހައްމަދު ޒާހިރު ހުސައިން މިއަދު ސިވިލް ކޯޓުގައި ވިދާޅުވެއްޖެ އެވެ.
"ހަވީރު"ގައި މީގެ ތިރީހަކަށް އަހަރު ކުރިން މަސައްކަތްކުރެއްވި ދެ ބޭފުޅުން ކަމަށްވާ އިބްރާހީމް ރަޝީދު މޫސާ އާއި އަބްދުﷲ ފާރޫގު ސިވިލް ކޯޓަށް ހުށަހަޅާފައިވާ މައްސަލައިގެ ޝަރީއަތުގެ އަޑު އެހުމުގައި ދެއްވި ބަޔާނުގައި ޒާހިރު ވިދާޅުވީ ހަވީރު ނިއުސް އެޖެންސީ އަކީ ނޫސް ހިންގަން އުފެއްދި ތަނެއް ނޫން ކަމަށެވެ. އަދި އެއީ ވިޔަފާރީގެ އެއްބަސްވުމެއް ނޫން ކަމަށާއި އެއީ މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އެއް ކަމަށް ވެސް ޒާހިރު ވިދާޅުވި އެވެ.
އެ އެއްބަސްވުމާއި އަސާސީ ގަވާއިދުގެ އަސްލު ހުށަހަޅާފައި ނުވާތީ އެކަމާ މެދު ސުވާލު އުފައްދަވައި ޑރ. ޒާހިރު ވިދާޅުވީ 1979 އިން ފެށިގެން "ހަވީރު" ނެރެމުން އަންނަނީ އޭނާގެ މަސްއޫލުވެރިކަމުގައި ރަޖިސްޓްރީކޮށްގެން ކަމަށާއި މިހާތަނަށް އެ ނޫހުގެ މިލްކުވެރިކަން އެހެން އެއްވެސް ފަރާތަކަށް ބަދަލުކޮށްފައި ނުވާ ކަމަށެވެ.
"ހަވީރު" ނެރެން ފެށިތާ ހަތަރު އަހަރު ފަހުން ހަވީރު ނިއުސް އެޖެންސީ އުފެއްދުމަށް އޭޕްރީލް 1، 1983 ގައި އިބްރާހީމް ރަޝީދާއި ފާރޫގު އަދި މުހައްމަދު ނައީމް ހިމެނޭ ގޮތަށް ޒާހިރާ އެކު ހައްދަވާފައިވާ އެއްބަސްވުމަކީ އޭގެ ޒާތުގައި ވަރަށް ބަލިކަށި އެއްބަސްވުމެއް ކަމަށް ޒާހިރު ވިދާޅުވި އެވެ. ހަވީރު ނިއުސް އެޖެންސީގެ އަސާސީ ގަވައިދުގެ ދަށުން ހަދަން ޖެހޭ ހިންގާ ގަވާއިދެއް ވުޖޫދުގައި ނެތް އިރު އެއީ ދެމި އޮތް އެއްބަސްވުމެއް ނޫން ކަމަށް ވެސް ވިދާޅުވި އެވެ. އަދި އެ އެޖެންސީ އުފެއްދީ ވިޔަފާރީގެ މުއާމަލާތްކުރުމަށް ނޫން ކަމަށް ވެސް ޒާހިރު ވިދާޅުވި އެވެ.
"ހަވީރު" ނޫހާއި ޗާޕްހާނާ އަކީ ހަވީރު ނިއުސް އެޖެންސީގެ ދަށުން ހިންގާ ތަންތަން ކަމަށް ދައުވާކުރާ ފަރާތުން ބުނާ އިރު އެ ތަންތަން އުފެއްދުމާއި ތަރައްގީކުރުމުގައި މިހާތަނާ ޖެހެންދެން ވެސް އެހެން ފަރާތަކުން އެއްވެސް ހޭދައެއް ކޮށްފައި ނުވާ ކަމަށް ޒާހިރު ވިދާޅުވި އެވެ. އަދި މިހާތަނަށް ވެސް ހަވީރު ނޫސް ތަރައްގީކޮށްފައި ވަނީ އަމިއްލަ ނަމުގައި ލޯން ނަންގަވައި ގެ އާއި މުދާ މޯގޭޖްކުރައްވައިގެން ކަމަށް ވެސް ޒާހިރު ވިދާޅުވި އެވެ.
ނިއުސް އެޖެންސީ ހިންގުމާ ބެހޭ ގޮތުން ވެފައިވާ އެއްބަސްވުމަކީ "ހަވީރު" ނޫހާއި ޗާޕްހާނާ ހިންގަން ވެފައިވާ އެއްބަސްވުމެއް ކަމަށް ދައުވާކުރާ ފަރާތުން ވިދާޅުވާ އިރު އެ އެއްބަސްވުމުގެ ދަށުން ވިޔަފާރީގެ އެއްވެސް މުއާމަލާތެއް ކޮށްފައި ނުވާ ކަމަށާއި އެޖެންސީގެ ނަމުގައި ވެސް އަދި ދައުވާކުރާ އެއްވެސް ފަރާތަކާ ގުޅިގެން އެއްވެސް ބޭންކެއްގައި ޖޮއިންޓް އެކައުންޓެއް ނޯންނާނެ ކަމަށް ވެސް ޒާހިރު ވިދާޅުވި އެވެ.
އޭނާ ވިދާޅުވީ އެކަން ސާބިތުކުރެވޭނެ ކާފީ ހެކި އެބަހުރި ކަމަށާއި "ހަވީރު"ގެ އެއްވެސް ކަމެއްގައި އެއްވެސް ޗެކެއްގައި ސޮއިކުރުމުގެ ހައްގު ދުވަހަކު ވެސް ދައުވާކުރާ ފަރާތްތަކަށް ލިބިދީފައި ނުވާ ކަމަށެވެ.
ޑރ. ޒާހިރު ވިދާޅުވި ގޮތުގައި މަގާމާއި ނުފޫޒު ބޭނުންކުރައްވައިގެން "ހަވީރު"ގެ މިލްކިއްޔާތު ބަދަލުކުރައްވާފައިވާ ކަމަށް ދައުވާކުރާ ފަރާތުން ތުހުމަތުކުރައްވަނީ އޭނާ ބަދުނާމު ކުރެއްވުމުގެ މަގުސަދުގަ އެވެ. "ހަވީރު" ރަޖިސްޓްރީކޮށް އެކި ކަން ކަމަށް ހުއްދަތައް ނަގާފައި ވަނީ އެ އިރެއްގައި އޮންނަ އުސޫލްތަކާއި ގަވާއިދުތަކުގެ ދަށުން ކަމަށް ވެސް ވިދާޅުވި އެވެ.
ނިއުސް އެޖެންސީ އުފެއްދުމަށް ވި އެއްބަސްވުމުގައިވާ ގޮތުން މުއައްސިސުންގެ މެދުގައި މައްސަލަ ޖެހިއްޖެ ނަމަ އެ ކަމެއް ހައްލުކުރަން ޖެހެނީ ބޯޑުގައި މަޝްވަރާކޮށްގެން ކަމަށް ބުނެފައިވާ އިރު ކަންކަން ހައްލުނުކުރެވޭ ވަރަށް މައްސަލަ ޖެހިގެން ދިޔަ ފަހުން ފާއިތުވި 30 އަހަރުގެ ތެރޭގައި އެ މައްސަލަތައް ހައްލުކުރުމަށް އެއްވެސް ފަރާތަކުން މަސައްކަތްކޮށްފައި ނުވާ ކަމަށެވެ. އަދި ބޯޑުގެ ހަތަރު މެންބަރުން މެދުގައި ކަންކަން ނިންމުމަށް ބުނެފައިވާ އިރު އެކަން ގެންދާނެ އުސޫލެއް އަދި ހިންގާ ގަވާއިދެއް ވުޖޫދުގައި ނެތް ކަމަށް ވެސް ޑރ. ޒާހިރު ވިދާޅުވި އެވެ.
އޭނާ ވިދާޅުވީ ދައުވާކުރާ ފަރާތުން ބުނާ ނިއުސް އެޖެންސީގެ ދަށުގައި އެއްވެސް މުވައްޒަފަކު ވެސް ނުހުންނާނެ ކަމަށާއި ރަޝީދާއި ފާރޫގަކީ ވެސް ހަވީރުގެ ދެ މުވައްޒަފުން ކަމަށެވެ.
ހަވީރު ނިއުސް އެޖެންސީ އުފެދެން މެދުވެރިވި ގޮތާއި މައްސަލަ ޖެހުނު ގޮތާއި އެ ނޫން ވެސް ގިނަ ތަފްސީލުތަކެއް ހިމެނޭ ގޮތަށް ޒާހިރު ބަޔާން ދެއްވި އިރު ޒާހިރުގެ ވަކީލު ހުސްނުއް ސުއޫދު ވެސް ވަނީ ދައުވާ އަށް ޖަވާބު ދެއްވައިފަ އެވެ.
ސުއޫދު ވިދާޅުވީ "ހަވީރު" ނޫސް ނެރުމުގައި އިތުރު އެއްވެސް ފަރާތެއް ބައިވެރިވުމެއް ނުވާ ކަމަށާއި ނިއުސް އެޖެންސީ އުފެއްދުމަށް ވެފައިވާ އެއްބަސްވުމަކީ ތަންފީޒުނުކުރެވި އުވިފައިވާ އެއްބަސްވުމެއް ކަމަށެވެ. އަދި މިލްކުވެރިކަން ސާބިތުކުރުމުގެ މައްސަލަތަކުގައި ދައުލަތުގެ މުއައްސަސާތަކުން ދޫކޮށްފައިވާ ރަޖިސްޓްރީ އޮއްވައި އޭގެ މައްޗަށް އެހެން ލިޔުންތަކެއް އިސްކޮށް އެއަށް ރިޔާއަތްކުރެވިގެން ނުވާނެކަން ރާއްޖޭގެ ޝަރުއީ ކޯޓުތަކުން ނިންމާފައިވާ ގަޒިއްޔާތަކުން އެނގެން އޮތް ކަމަށް ވެސް ވަކީލް ވިދާޅުވި އެވެ. އަދި ނިއުސް އެޖެންސީ އުފެއްދުމަށް ވެފައިވާ އެއްބަސްވުމުގެ އަސްލު ހުށަހެޅުމަށް އެ ފަރާތަށް އަންގަވާދެއްވުމަށް ސުއޫދު ވަނީ ފަނޑިޔާރު މަރިޔަމް ނިހާޔަތުގެ ކިބައިން އެދިވަޑައިގެންފަ އެވެ.