ޑިމޮކްރެޓިކް ރިޕަބްލިކް އޮފް ކޮންގޯގެ އިރުމަތީގައި ހުންނަ ކިގޮންޒޭ ރެފިއުޖީ ކޭމްޕެއްގައި އެބޯލާ ޖެހިގެން 30 އަށްވުރެ ގިނަމީހުން މަރުވެއްޖެ ކަމަށް ރިޕޯޓުތައް ބުނެފިއެވެ.
ބޫނިއާ ސިޓީގައި ހުންނަ، ގެދޮރު ގެއްލިފައިވާ މީހުން ދިރިއުޅޭ މި ކޭމްޕުން މިދިޔަ މެއި މަހުގެ ކުރީކޮޅުން ފެށިގެން މަރުވި މީހުންގެ ކިބައިން ފެނިފައިވަނީ ބޮލުގައި ރިއްސުމާއި، ބާރަށް ހުންއައުމާއި، އަދި ހޮޑުލުން ފަދަ އެބޯލާ ބަލީގެ ސާފު އަލާމާތްތަކެއް ކަމަށް ކޭމްޕުގެ އިސްވެރިންނާއި ހަވާލާދީ ބައިނަލްއަގުވާމީ މީޑިއާތަކުން ބުނެއެވެ.
ރޮއިޓާސް އިން ރިޕޯޓްކޮށްފައިވާ ގޮތުގައި މި ބަލީގެ ނުރައްކާ ބޮޑުވެފައިވާއިރު، ބަލިޖެހޭ މީހުންނާއި މަރުވާ މީހުންގެ ޓެސްޓުތައް ހެދުމަށް އެމީހުންގެ އާއިލާތަކުން ފުރަތަމަ ވަރަށް ބޮޑަށް ދެކޮޅު ހެދުމުގެ ސަބަބުން، މަރުވި ސީދާ ސަބަބު ދެނެގަތުމަށް ސިއްހީ އިދާރާތަކަށް ބޮޑެތި ހުރަސްތަކެއް ކުރިމަތިވިއެވެ. ނަމަވެސް، ކޭމްޕުގެ އޮފިޝަލުން ހާމަކުރި ގޮތުގައި މިހާރު ވަނީ މަރުވި ފަސް މީހެއްގެ ހަށިގަނޑުން ސާމްޕަލް ނަގައި، ޓެސްޓުގެ ނަތީޖާ ކަށަވަރުކުރުމުގެ މަސައްކަތް ފަށާފައެވެ.
އެހީދޭ ޖަމާއަތްތަކުން ފާހަގަކުރާ ގޮތުގައި މިފަދަ ނުރައްކާތެރި ބަލިތައް ފެތުރެން މެދުވެރިވި މައިގަނޑު ސަބަބަކީ، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ކޮންގޯގެ ފެނާއި ސާފުތާހިރުކަމުގެ މަޝްރޫއުތަކަށް ދެމުންދިޔަ އެހީތައް ވަރަށް ބޮޑަށް ކަނޑާލުމެވެ.
ޑިމޮކްރެޓިކް ރިޕަބްލިކް އޮފް ކޮންގޯއަކީ ވޭތުވެދިޔަ ދިހަވަރަކަށް އަހަރުގެ ތެރޭގައި އެބޯލާ ވައިރަހުގެ ކޭސްތައް އެކި ފަހަރު މަތިން ފެނި، އޭގެ ނުރައްކާ އެންމެ ބޮޑަށް ތަހައްމަލު ކުރަން ޖެހިފައިވާ އެއް ގައުމެވެ. ޖިސްމާނީ ދިޔާ އެއްޗެހީގެ ޒަރީއާއިން ފެތުރޭ މި ނުރައްކާތެރި ބަލި ކޮންޓްރޯލް ކުރުމަށްޓަކައި ސާފު ބޯފެނާއި، ރަނގަޅު ފާޚާނާ ނިޒާމާއި، އަދި އަތްދޮވުމުގެ ވަސީލަތްތައް ފަދަ އަސާސީ ހައިޖީންގެ ކަންކަން ފުރިހަމަވެފައި ހުރުމަކީ ކޮންމެހެން ބޭނުންތެރި ކަމެކެވެ. ނަމަވެސް އެ ގައުމުގައި ހިނގަމުންދާ ދާޚިލީ ހަމަނުޖެހުންތަކުގެ ސަބަބުން 5 މިލިއަނަށްވުރެ ގިނަ މީހުންގެ ގެދޮރު ގެއްލި، ތޮއްޖެހިފައިވާ ރެފިއުޖީ ކޭމްޕުތަކުގައި ދިރިއުޅެން ޖެހުމަކީ ބަލި ފެތުރުމަށް އޮތް އެންމެ ބޮޑު ގޮންޖެހުމެވެ.
މިފަދަ ނާޒުކު ދަނޑިވަޅެއްގައި، ބައިނަލްއަގުވާމީ މާލީ އެހީތެރިކަން ކުއްލިއަކަށް މަދުވުމަކީ ކޮންގޯގެ ސިއްހީ ނިޒާމަށް ލިބުނު ބޮޑު ހީނަރުކަމެކެވެ. އދ. ގެ ހިސާބުތަކުން ދައްކާ ގޮތުގައި އެ ގައުމުގެ ފެނާއި ސާފުތާހިރުކަމުގެ މަޝްރޫއުތަކަށް ލިބުނު ފަންޑިންގ ވަނީ ފާއިތުވި އަހަރުތަކުގައި ދެބައިކުޅަ އެއްބަޔަށްވުރެ ބޮޑަށް ދަށްވެފައެވެ. މީގެ އިތުރުން އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބޭރު ގައުމުތަކަށްދޭ އެހީގެ ސިޔާސަތަށް ގެނައި ބަދަލުތަކާއެކު، ޔޫއެސްއެއިޑް މެދުވެރިކޮށް ކޮންގޯގައި ހިންގަމުންދިޔަ ސާފުތާހިރުކަމުގެ ގިނަ މަޝްރޫއުތަކެއްގެ ބަޖެޓު ވަނީ ވަރަށް ބޮޑަށް ކަނޑާލާފައެވެ.
މި ބަދަލުތަކުގެ ސަބަބުން މާސީ ކޯޕްސް ފަދަ ބައިނަލްއަގުވާމީ އެހީދޭ ޖަމާއަތްތަކުން ކޭމްޕުތަކުގައި ދެމުންދިޔަ ޚިދުމަތްތައް ވަނީ އިންތިހާއަށް ދަށްކުރަން ޖެހިފައެވެ. ކުރިން ލައްކައަކަށްވުރެ ގިނަ މީހުންނަށް ފެނާއި ފާޚާނާގެ ވަސީލަތްތައް ފޯރުކޮށްދިން ނަމަވެސް، ފަންޑިންގ ކަނޑާލުމުގެ ސަބަބުން މިހާރު އެ ޚިދުމަތް ލިބެނީ މަދު ބަޔަކަށެވެ. މިކަމުގެ ސަބަބުން ކޭމްޕުތަކުގައި ހުރި ފާޚާނާތައް ފުރިގެން ބޭރުވުމާއި، އާންމުން އަމިއްލަ އަތުން ނަޖިސް ސާފުކުރަން ޖެހުމުގެ ސަބަބުން އެބޯލާ ފަދަ ނުރައްކާތެރި ވައިރަސްތައް މުޅި ކޭމްޕަށް ފެތުރިގެންދިއުމުގެ ބިރު ވަނީ ކުރިއަށްވުރެ ބޮޑުވެފައެވެ.