ގައުމީ އެޑެޕްޓޭޝަން ޕްލޭން އެކުލަވާލުމަށް މައުލޫމާތު އެއްކުރުމުގެ ވޯކްޝޮޕެއް ކާމިޔާބުކަމާއެކު ނިންމާލާފައިވާކަމަށް ފަތުރުވެރިކަމާއި ތިމާވެއްޓާއި ބެހޭ ވުޒާރާއިން ބުނެފިއެވެ.
މި ވޯކްޝޮޕް ބާއްވާފައި ވަނީ މޫސުމަށް އަންނަ ބަދަލުތަކުގެ ސަބަބުން ދިވެހިރާއްޖެއަށް ދިމާވެދާނެ ނުރައްކާތަކާއި ރާއްޖޭގެ ނާޒުކުކަމަށް ޚާއްސަކޮށްގެންނެވެ.
ފަތުރުވެރިކަމާއި ތިމާވެއްޓާއި ބެހޭ ވުޒާރާއިން ބުނީ މި ވޯކްޝޮޕަކީ ދިވެހިރާއްޖޭގެ ގައުމީ އެޑެޕްޓޭޝަން ޕްލޭން (އެން.އޭ.ޕީ) އެކުލަވާލުމަށްޓަކައި ބޭނުންވާ މައުލޫމާތު އެއްކުރުމަށްޓަކައި އެޅުނު މުހިންމު ފިޔަވަޅެއްކަމަށެވެ.
މި ވޯކްޝޮޕްގައި، މޫސުމަށް އަންނަ ބަދަލުތަކާ ގުޅުންހުރި މުއައްސަސާތަކުގެ ފަންނީ ވެރިންނާއި އެހެނިހެން ބައިވެރިން ވަނީ މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ކުރިމަތިވެދާނެ އަސަރުތަކާއި، ރާއްޖޭގެ ނާޒުކުކަމާއި، މޫސުމީ ނުރައްކާތަކުގެ އިތުރުން، މޫސުމަށް ތިމާވެށި ހޭނުމަށް (އެޑެޕްޓްވުމަށް) އަޅާނެ ފިޔަވަޅުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކޮށްފައިކަމަށް ވެސް އެ ވުޒާރާއިން ބުންޏެވެ.
މި މަޝްވަރާތަކުގައި، ގައުމީ ފެންވަރުގައި ދެނެގަނެފައިވާ މުހިންމު ކަންކަމަށް ހާއްސަ ސަމާލުކަމެއް ދެވުނުކަމަށާއި، މި މަޝްވަރާތަކުގެ މައިގަނޑު މަގުސަދަކީ ގައުމީ އެޑެޕްޓޭޝަން ޕްލޭން އެކުލަވާލުމަށް ބޭނުންވާ މައުލޫމާތު އެއްކޮށް، އެ މަސައްކަތަށް އިރުޝާދު ދިނުންކަމަށް ފަތުރުވެރިކަމާއި ތިމާވެއްޓާއި ބެހޭ ވުޒާރާއިން ވަނީ ބުނެފައެވެ.
އެޑެޕްޓޭޝަން ޕްލޭން (އެން.އޭ.ޕީ) އަކީ ރާއްޖެއަށް ކުރިމަތިވެދާނެ މޫސުމީ ގޮންޖެހުންތަކުން ރައްކާތެރިވުމަށްޓަކައި އެޅޭނެ މުހިންމު ފިޔަވަޅުތަކެއްގެ ތަފްސީލީ ގައުމީ ޕްލޭނެކެވެ. މިއީ ދިގު މުއްދަތަށް ރާއްޖޭގެ ދެމެހެއްޓެނިވި ތަރައްގީއަށް މަގުފަހިކޮށްދޭނެ އަދި މޫސުމީ ކާރިސާތަކުން ރައްކާތެރިކަން ފޯރުކޮށްދޭނެ މުހިންމު މަސައްކަތެކެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi