ދިވެހި ކުންފުންޏެއް ކަމަށްވާ ކިންގްސްޓަންގެ ޝޯ ރޫމުގައި ޑިސްޕްލޭ ކުރަން އެހެން ކުންފުންޏަކުން ހަވާލުކުރި ސައިކަލުތަކެއް، ކިންގްސްޓަންއިން ވިއްކާލި މައްސަލައިގައި އެ ކުންފުނީގެ މައްޗަށް 1.2 މިލިއަން ރުފިޔާގެ ހުކުމެއް ކޮށްފިއެވެ. ޓްރޭޑް މިނިސްޓްރީގެ ބިޒްނަސް ޕޯޓަލްއިން ދައްކާ ގޮތުގައި ކިންގްސްޓަން ހޯލްޑިންގްސް މޯލްޑިވްސްގެ މެނޭޖިން ޑިރެކްޓަރަކީ އަހުމަދު އާތިފް ހަސަން ކިޔާ މީހެކެވެ. އަދި ޑިރެކްޓަރުންގެ ބޯޑުގައި އޭނާގެ އިތުރުން ހަސަން ހުސައިން ކިޔާ މީހަކު ހިމެނޭއިރު، އެ ކުންފުނީގެ ދަށުން އެކި ނަން ނަމުގައި ވިޔަފާރިތައް ހިންގާ ކަމަށް ދައްކައެވެ. މިއީ، އާންމުންނަށް ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތުކުރެވޭ މައްސަލައެއްގައި، ގެއްލުން ލިބުނު މީހުން ހޯދަން ފުލުހުން ކުރިން އިއުލާންވެސްކޮށްފައިވާ ކުންފުންޏެކެވެ. ސިވިލް ކޯޓުން މިދިޔަ ހަފުތާގައި ހުކުމް ކުރި މި މައްސަލައަކީ، އެ ކުންފުނިން، ނިއު ޓްރޭޑާސް ކިޔާ ކުންފުންޏަކާއެކު ރަޖިސްޓްރީކޮށްފައިވާ ކިންގްސްޓަން ޝޯރޫމްގައި ޑިސްޕްލޭކޮށްފައި ބެހެއްޓުމަށް ހަވާލުކޮށްފައިވާ ސައިކަލުތަކެއް ވިއްކާލި މައްސަލައެވެ. މި މައްސަލައިގައި ނިއު ޓްރޭޑާސްއިން އެދުނީ، 1،219،650 ރުފިޔާ އެކީ އެއް ފަހަރާ ހޯދުމަށެވެ. މި މައްސަލައިގެ ޝަރީއަތަށް ކިންގްސްޓަން ކުންފުނިން ހާޒިރު ނުވާތީ މައްސަލަ ނިންމާފައިވަނީ އެ ކުންފުނީގެ ޣައިރު ހާޒިރުގައެވެ. https://sun.mv/195204 ސިވިލް ކޯޓުގެ ގާޒީ އަހްމަދު އަބްދުލްމަތީން އިއްވެވި ހުކުމުގައި، ސައިކަލުތައް އަގުގެ ގޮތުގައި 1،219،650 ވަގުތުން ދައްކަން، ކިންގްސްޓަން ކުންފުންޏާއި އެ ކުންފުނީގެ އެމްޑީ އަހްމަދު އާތިފް ހަސަންގެ މައްޗަށް ވަނީ ހުކުމްކޮށްފައެވެ. މި ކުންފުންޏާ ގުޅޭ މަކަރާއި ހީލަތުގެ މައްސަލައެއް ފުލުހުން މިދިޔަ އަހަރު ބަލަން ފެށިއެވެ. އޭރު، "ސަން" އާ ވާހަކަ ދެއްކި ބައެއް މީހުން ބުނިގޮތުގައި ސައިކަލް ގަތުމަށް ކިންގްސްޓަންއަށް އެ މީހުން ފައިސާ ދެއްކިތާ ގިނަ މަސްތަކެއް ވެފައިވީ ނަމަވެސް ސައިކަލް ހަވާލުކޮށްފައެއް ނުވެއެވެ. އަދި ސައިކަލް ދޭނެ ކަމަށް ބުނެ އެކި ތާރީޚުތައްދީ އޮޅުވާލާފައިވާ ކަމަށް ބައެއް މީހުން ބުންޏެވެ. އެ މައްސަލަ ބޮޑުވެ ގިނަ ބަޔަކު ކިންސްޓަންގެ ފިހާރަތައް ކުރިމަތީ އެއްވެ އޭރު ނުރުހުންވެސް ފާޅު ކުރިއެވެ.