އިސްރާއީލުގެ ހަރުކަށި ޓެރަރިސްޓް ޔަހޫދީން ފަލަސްތީނުގެ މުސްލިމުންނަށް ދެމުންގެންދާ ލާއިންސާނީ ހަމަލާތައް ކުށްވެރިކޮށް ފަލަސްތީނުގެ ރައްޔިތުންނަށް އިންސާފު ހޯދައިދިނުމަށް އިސްރާއީލާ ދެކޮޅަށް ދައުވާ ކުރުމުގެ ބާރު ރާއްޖެއަށް ލިބޭކަމަށް ގާނޫނީ ވަކީލް އަދި ބާ ކައުންސިލުގެ ކުރީގެ ރައީސް މައުމޫން ހަމީދު ވިދާޅުވެއްޖެ އެވެ.
މައުމޫން ކުރެއްވި އެކްސް ޕޯސްޓެއްގައި ވަނީ ބައިނަލްއަގުވާމީ ގާނޫނުތަކާ ހިލާފުވާ ކަންކަމުގެ މައްޗަށް ރާއްޖޭގެ ގާނޫނުލް އުގޫބާތުގައި ރާއްޖޭގެ އިހުތިސާސް ކަނޑައަޅާފައިވާ ކަމަށް ވިދާޅުވެ ބައިނަލްއަގުވާމީ މުޖުތަމައު އިސްނަގަންދެން މަޑުކުރުމުގެ ބަދަލުގައި ފަލަސްތީނަށް ދެމުންގެންދާ ބޮޑެތި ގެއްލުންތަކާއި ޖަރީމާތަކާ ދެކޮޅަށް ފަލަސްތީނަށް އެހީވުމަށް ފިޔަވަޅު އެޅުމުގެ ފުރުސަތު ރާއްޖެއަށް އެބައޮތްކަން ހާމަކުރައްވާފައެވެ.
އެގޮތުން ބަލާއިރު ގާނޫނުލް އުގޫބާތުގެ 13 ވަނަ މާއްދާގައި ބުނެފައިވަނީ ކުށްކުރީ ކޮންމެ ތަނެއްގައި ކަމުގައިވީ ނަމަވެސް އަދި އެ ކުށްކުރި މީހުންގެ ދިރިއުޅުން ބިނާވެފައިވަނީ ކޮންމެ ގައުމެއްގައި ކަމުގައިވީ ނަމަވެސް، ބައިނަލްއަގްވާމީ ގާނޫނާ ކަނޑައެޅިގެން ހިލާފަށް ކުރެވޭ ކޮންމެ ކުށެއް އަދި ރާއްޖެއިން ބައިވެރިވެފައިވާ ބައިނަލްއަގްވާމީ މުއާހަދާއެއްގެ ސަބަބުން އެ ކުށުގެ އަމަލުގެ މައްޗަށް ގާނޫނު ހިންގުމުގެ ބާރު ދައުލަތަށް ލިބިދޭ ބާވަތުގެ ކުށްތަކުގެ މައްޗަށް ދަައުވާ އުފުލުމުގެ ބާރު ދިވެހި ދައުލަތަަށް ލިބިގެންވާ ކަމަށެވެ.
އިސްރާއީލުގެ ހައްދުފަހަނައަޅާފައިވާ ޔަހޫދީން ފަލަސްތީނުގެ މުސްލިމުންނާ ދެކޮޅަށް މިހާރު ހިންގަމުންދާ ގަތުލު އާއްމު ރާއްޖެއިން ކުށްވެރިކޮށްފައިވާއިރު ފަލަސްތީނަށް އެހީވުމަށް ފަންޑުފޮށިތައް ހުޅުވުމާއި ފަލަސްތީނުގެ މުސްލިމުންނާއި މުޖާހިދުންނާއެކު ތިބިކަން އަންގައިދިނުމަށް ގައުމީ ފެންވަރުގައި އެއްވުންތައްވެސް އަންނަނީ ބާއްވަމުންނެވެ. އަދި އިސްރާއީލާއި އޮންނަ ގުޅުން ކަނޑާލައި އިސްރާއީލުގެ ތަކެއްޗާއި އެގައުމާއި ގުޅުން އޮންނަ ކުންފުނިތަކުގެ ތަކެތި ބޮއިކޮޓް ކޮށް އަދި އިސްރާއީލުގެ ޔަހޫދީ ފަތުރުވެރިންނަށް ރާއްޖެ އެތެރެނުވެވޭ ގޮތް ހެދުމަށް ވެސް ދިވެހިން އަންނަނީ ސަރުކާރަށް ގޮވާލަމުންނެވެ.
އިސްރާއީލުގެ ޓެރަރިސްޓު ޔަހޫދީން ހިންގަމުންދާ އުދުވާނުގައި ޣައްޒާ އާއި ހުޅަނގު އައްސޭރިން ޝަހީދުވި މީހުންގެ ޖުމްލަ އަދަދު 9،000 އިން މައްޗަށް ގޮސްފައިވާއިރު މިހާރު އެއްގަމު މަގުން ޣައްޒާއަށް ވަދެ ޔަހޫދީން ދަނީ ގިނަ އަދަދެއްގެ މުސްލިމުން ޝަހީދުކުރަމުންނެވެ.
ހަމާސްގެ މުޖާހިދުންނާ ކުރިމަތިލުމަށް ވުރެ ބޮޑަށް، ޣައްޒާގެ އާންމު ރައްޔިތުން މަރައި ހުސްކުރުމަށް އަމާޒު ހިފައި، ހޮސްޕިޓަލުތަކާއި ސުކޫލްތަކާއި ކާބޯތަކެއްޗާއި ބޭސް ރައްކާ ކޮށްފައިވާ ގުދަންތަކާއި ސޯލާ ޕެނަލްތަކަށާއި ފެން ޕްލާންޓުތަކަށް ދޭ ހަމަލާތައް އިތުރުކޮށްފައިވާކަމަށް ރިޕޯޓްތައް ބުނެއެވެ.
ހަމާސްއަކީ އިސްރާއީލުގެ ލޮލަށް ހެރިފައިވާ ތޫނު ކަށްޓަކަށް ވެފައިވާއިރު އިސްރާއީލުގެ ސަލާމަތަށް އިހުމާލުވެފައިވާ ކަމަށްބުނެ އިސްރާއީލުގެ ހަރުކަށި ޔަހޫދީ ބޮޑު ވަޒީރު ބެންޖަމިން ނަތަންޔާހޫއަށް އޮންނަ ތާއީދު ޔަހޫދީންގެ މެދުގައި ކުޑަވެފައިވާކަމަށް ފަހުގެ ރިޕޯޓްތައް ބުނެއެވެ.