ސިޔާސީ ލީޑަރުން ޒިންމާ އަދާކޮށް، މާލީ ހާލަތާ ގުޅޭ މައުލޫމާތު ސާފު ބަހުން ރައްޔިތުންނަށް ކިޔައިދޭން ކުރީގެ ރައީސް މުޙައްމަދު ނަޝީދު މިއަދު ގޮވާލައްވައިފި އެވެ.ނަޝީދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މިވަގުތު ހުރިހާ ސިޔާސީ ލީޑަރުންގެ ޒިންމާ ބޮޑުއިރު މާލީ ހާލަތާ ގުޅޭ ކަންކަން ރައްޔިތުންނަށް ސާފުކޮށް ދޭންޖެހޭ ކަމަށެވެ."މާލީ ހާލަތު މި ހިސާބަށް ދިޔަ ގޮތާއި، ދެން ވެދާނެ ކަމަށް ލަފާ ކުރެވޭ ގޮތާއި އަދި އަރައިގަތުމަށް އަމަލުކުރަން ރާވާފައި އޮތް ގޮތްތައް ސާފު ބަހުން ރައްޔިތުންނަށް ކިޔައިދޭންޖެހޭނެ،" ނަޝީދު ވިދާޅުވި އެވެ.ނަޝީދު މިހެން ވިދާޅުވެފައި މިވަނީ ރާއްޖޭގެ ގައުމީ ބޭންކު، ބޭންކު އޮފް މޯލްޑިވްސްއަށް ޑޮލަރު ލިބުން ދަތިވެ، ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް މިއަދު ކުޑަކޮށްފައިވާ ދަނޑިވަޅެއްގަ އެވެ.ބީއެމްއެލުން ނިންމައިފައިވަނީ، މިހާރު ދޫކޮށްފައިވާ ޑެބިޓް ކާޑުތަކުގެ ތެރެއިން ޕްރައިމަރީ އެކައުންޓަކީ ރުފިޔާ އެކައުންޓަކަށްވާނަމަ ބޭރު ފައިސާގެ ގޮތުގައި ދެން އެއްވެސް އަދަދެއް ނުދިނުމަށާއި މިއަދުން ފެށިގެން ދޫކުރާ ޑެބިޓް އަދި ކްރެޑިޓް ކާޑުތަކަށް ވެސް ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ ބޭރު ފައިސާގެ ގޮތުގައި އެއްވެސް އަދަދެއް ނުދިނުމަށެވެ.މީގެ އިތުރުން، މިހާރު ދޫކޮށްފައިވާ ސްޓެންޑާޑް އަދި ގޯލްޑް ކްރެޑިޓް ކާޑުތަކަށް ވެސް މަހެއްގެ މައްޗަށް ލިބޭނީ 100 ޑޮލަރު ކަމަށް ބޭންކުން ވަނީ ނިންމައިފަ އެވެ.ވަކި މުއްދަތެއް ނެތް ގޮތަށް އިއުލާންކޮށްފައިވާ އެ ކުއްލި ނިންމުމާއެކު، ބޭރުގައި ތިބި ދިވެހިންނަށް ޑޮލަރު ލިބުން ދަތިވެ، އާންމު ދިރިއުޅުމަށް ނޭދެވޭ އަސަރު ކުރާނެ ކަމުގެ ކަންބޮޑުވުން ގިނަ ބަޔަކު ވަނީ ފާޅުކޮށްފަ އެވެ.