ޖުމްހޫރީ ޕާޓީގެ ލީޑަރު ޤާސިމް އިބްރާހީމް މިހާރު ބަހައްޓަމަުން ގެންދާ ބަންދާއިމެދު ގޮތެއް ނިންމަން ބާއްވާ ޝަރީއަތުގެ މަޖިލީސް މާދަމާ ހަވީރު 4:30 އަށް ކްރިމިނަލް ކޯޓުގައި ތާވަލުކޮށްފައިވާ ކަމަށް ޖޭޕީގެ ސެކެޓްރީ ޖެނެރަލް އަޙްމަދު ސަމީރު ވިދާޅުވެއްޖެއެވެ.
އެޕްރިލް މަހުގެ 20 ވަަނަ ދުވަހުގެ ރޭ އިރާކޮޅު ކުއްލި ގޮތަކަށް ކޯޓު އަމުރެއްގެދަށުން ފުލުހުން އެމަނިކުފާނު ހައްޔަރުކޮށް 6 ފޫޓް 8ފޫޓުގެ "ހޫނު" ގޮޅީގައި ބަހައްޓާފައި އެހުންނަަނީ އެޕްރިލް މަހުގެ 21 ވަނަ ދުވަހު އެމަނިކުފާނުގެ ބަންދަށް 15 ދުވަހުގެ މުއްދަތެއް ޖަހައިދިނުމުންނެވެ.
ބަންދުގައި ބަހައްޓަންޖެހި މުއްދަތާއި ގުޅިގެން ޤާސިމް އިބްރާހީމްގެ ވަކީލުން ހައިކޯޓަށް ހުށަހެޅި އިސްތިއުނާފްގެ މައްސަލައިގެ ޝަރީއަތުގެ މަޖިލިސް ފުރަތަމަ ބޭއްވީ އެޕްރިލް މަހުގެ 27 ވަނަ ދުވަހުއެވެ. އެދުވަހުގެ ޝަރީއަތް ނިންމައިލީ ބަންދާއިމެދު ގޮތެއް ނުނިންމައެވެ. މިއީ ހައިކޯޓުން މިފަދަ މައްސަލައެއްގައި ގޮތެއް ނުނިންމައި ފުރަތަމަ ނިންމައިލި ޝަރީއަތުގެ މަޖިލީހެވެ.
ހައިކޯޓުން ޝަރީއަތުގެ ދެވަނަ މަޖިލީހެއް ބޭއްވީ އެޕްރިލް މަހުގެ 30 ވަނަ ދުވަހު އެވެ. އެދުވަހުގެ މަޖިލީހުގައި ވަނީ ކްރިމިނަލް ކޯޓުން އެމަނިކުފާނު ބަންދުގައި ބަހައްޓަން ކުރި ޙުކުމަށް ތާއީދުކޮށްފައެވެ.
ޤާސިމް އިބްރާހީމް 6ފޫޓް 8ފޫޓް ގޮޅިއެއްގައި ބަންދުގައި ބަހައްޓާފައި ހުންނާތީ ރާއްޖޭގެ ގިނަ އަދަދެއްގެ ރައްޔިތުން ގެންދަނީ ކަންބޮޑުވުން ފާޅުކުރަމުންނެވެ. ގިނަ ބައަކު ބުނަމުން ދަނީ ތަޙްޤީޤަށް ކަމަށް ބުނެ ޤާސިމް އިބްރާހީމް ފަދަ ޤައުމީ ބަޠޮލަކު އެފަދަ ގޮޅިއެއްގައި ބަހެއްޓުމަކީ އިންސާނިއްޔަތާއިވެސް ޚިލާފަށް ސަރުކާރުން ކުރާ ވަރަށް އަނިޔާވެރި ކަމެއް ކަމަށެވެ.