ރާއްޖެއަށް ބޭރުގެ ނުފޫޒު ވަރަށް ބޮޑަށް ފޯރާފައިވާ ކަމަށާއި އެހެންކަމުން މިގައުމުގެ ހިމާޔަތުގައި ރާއްޖޭގެ ރައްޔިތުން ނިކުތުމަކީ ކިފާޔަތުގެ ފަރުޟެއް ކަމުގައި ޕީޕީއެމްގެ ޕްރައިމަރީގައި ވާދަކުރެއްވި އުމަރު ނަސީރު މިއަދު ވިދާޅުވެއްޖެ އެވެ.
ނަސަންދުރާ ޕެލެސް ހޮޓަލުގައި ޕީޕީއެމާއި ގުޅިފައިވާ ފަރާތްތަކާއިއެކު ބޭއްވި ނޫސްވެރިންގެ ބައްދަލުވުމުގައި އުމަރު ނަސީރު ވިދާޅުވީ ނުފޫޒު ގަދަ ގައުމުތައް ވަނީ ދިވެހިރާއްޖެ މިވަގުތު ވަށާލާފައި ކަމަށާއި އެގޮތުން ރޭ ރައީސް މުހައްމަދު ވަހީދު އިސްތިއުފާދެއްވުމަށް ނުފޫޒުގަދަ ގައުމުތަކުން އެންގެވި ކަމަށެވެ.
ނަމަވެސް ރައީސް ވަރަށް ސާބިތުކަމާއިއެކު ހުންނެވީތީ ޝުކުރު އަދާކުރައްވާ ކަމަށް އުމަރު ނަސީރު ވިދާޅުވި އެވެ.
"މި ނުރައްކާތެރި ވަގުތުގައި، އަޅުގަނޑުމެންގެ އިސްލާމް ދީނުގެ ހިމާޔަތުގައި، ގައުމުގެ ހިމާޔަތުގައި، ތެދުވުން އެއީ ކޮންމެ ދިވެހި ފަރުދަކަށް ވާޖިބު ކަމެއް، އެހެންވީމަ އެ ވާޖިބު އަދާކުރުމުގައި އަޅުގަނޑުމެންގެ އަމިއްލަ ނަފްސަށްވުރެ ކުރިއަށް އަޅުގަނޑުމެންގެ ގައުމު ނެރުން އެއީ ކޮންމެހެން ކުރަން ޖެހޭ ކަމެއް." އުމަރު ވިދާޅުވި އެވެ.
އުމަރު ވަނީ އޭނާއަށް ތާއީދުކުރާ ހުރިހާ އެންމެނާއި އެމްޑީޕީ އާއި ނުރުހޭ ހުރިހާ އެންމެންނާއި މިގައުމުގެ އިސްލާމް ދީން ހިމާޔަތްކުރަން ބޭނުންވާ އެންމެން ނިކުމެ ޕީޕީއެމްގެ ކެންޑިޑޭޓު ޔާމިނަށް ވޯޓުދީ މި ނުރައްކަލުން ސަލާމަތްކޮށްދިނުމަށް ގޮވާލާފައެވެ. އަދި މިގައުމު ސަލާމަތްނުކޮށްފިނަމަ ރައްޔިތުން ފަހުން ހިތާމަކުރާނެ ކަމަށް ވެސް އޭނާ ވިދާޅުވި އެވެ.
އުމަރު އިތުރަށް ވިދާޅުވީ މިގަޑީގައި ވޯޓު ނުދެއްވުމަކީ އެމްޑީޕީ އަށް ލިބޭ ވަރަށް ބޮޑު ކުރިއެރުމެއް ކަމަށާއި މިވަގުތު ރާއްޖޭގައި އޮތް އިސްލާމް ދީނަށް މީގެ ކުރިން ކުރިމަތިނުވާ ވަރަށް ގޮންޖެހުންތަކާއި ދިމާވެފައިވާ ކަމަށާއި އެހެންކަމުން މިގައުމުގެ ހިމާޔަތުގައި ތެދުވުން އެއީ އެންމެންގެ މައްޗަށް އޮތް ކިފާޔަތުގެ ފަރުޟެއް ކަމަށެވެ.
އޭނާ ވިދާޅުވީ މަސައްކަތް މިކުރަނީ އެއްވެސް ވަޒީފާއެއް ހޯދުމަށް ނޫން ކަމަށާއި ޕީޕީއެމާއި ގުޅުނީ އިންތިހާބު ޕީޕީއެމަށް ކާމިޔާބުކޮށްދިނުމަށް ކޮށްދެވެން ހުރި ހުރިހާ ކަމެއް ކޮށްދިނުމަށް ކަމަށެވެ.
"ގޭގައި ތިބި ހުރިހާ އެންމެން ވެސް ވޯޓުދިނުމަށް ނެރެންވީ، މިއީކީ ޕީޕީއެމަށް ދޭ ވޯޓެއް ނޫން، މި ވޯޓަކީ މިގައުމުގެ މިނިވަންކަމަށް އަޅުގަނޑުމެން ދޭ ވޯޓެއް، މިގައުމުގައި އިސްލާމް ދީން ބޭއްވުމަށް އަޅުގަނޑުމެންދޭ ވޯޓެއް،" އުމަރު ވިދާޅުވި އެވެ.
ނޫސްވެރިންގެ ބައްދަލުވުމުގައި ރައީސް ވަހީދު ރޭ ނިންމެވި ނިންމެވުމަށް ސިޔާސީ އެކި އެކި ޕާޓީތަކުން ވަނީ މަރުހަބާ ދަންނަވާފައެވެ.