ސިވިލް ކޯޓުގެ ދެ ގާޒީއެއް، ގާޒީ އަބްދުﷲ އިހުސާން އާއި ގާޒީ ހާފިޒާ އަބްދުއްސައްތާރުގެ ސުލޫކީ މައްސަލައެއް އެ ތަނުގެ މުވައްޒަފުން ޖުޑީޝަލް ސާވިސް ކޮމިޝަން (ޖޭއެސްސީ) އަށް މިދިޔަ ހަފުތާ ހުށަހަޅައިފި އެވެ.
ވީކިހިނެއް؟ - މުވައްޒަފުންގެ ފަރާތުން ޖޭއެސްސީއަށް ސިޓީއެއް ފޮނުވިކަން އެނގިފައިވެ އެެވެ. ކޮމިޝަނުން މައްސަލަ ބެލުމާ މެދު އަދި ގޮތެއް ނިންމި ކަމެއް ނޭނގެ އެވެ.
ތަފްސީލް - އެނގިފައިވާ ގޮތުގައި ސިވިިލް ކޯޓުގެ މުވައްޒަފުން ހުށަހެޅި މައްސަލަތަކަކީ:
ގާޒީ ހާފިޒާ މުވައްޒަފުންނަށް މުއާމަލާތްކުރާ ގޮތުގެ މައްސަލައެއް
ގާޒީ އަބްދުﷲ އިހުސާން މުވައްޒަފުންތަތަކަށް ފުރައްސާރަކުރާ ކަމަށް ތުހުމަތުކުރާ މައްސަލައެއް
ފާހަގަކޮށްލެވޭ - ސިވިލް ކޯޓުގެމުވައްޒަފުންނާ މެދު ތަފާތުކުރުމާއި، މުވައްޒަފުން ނެގުމުގައި ބައެއް ގާޒީން ނުފޫޒު ފޯރުވާކަމުގެ އަޑުތައް އަބަދުވެސް ގަދަ އެވެ. މުވައްޒަފުންގެ ބަޔަކު، އެ ކޯޓުގެ ގާޒީންނާ ގުޅޭ ގޮތުން މީގެ ކުރިން ވެސް ޖޭއެސްސީއަށް މައްސަލަތަކެއް ހުށަހަޅާފައިވެ އެވެ.
ގާޒީ ހާފިޒާއާ ގުޅޭ ގޮތުން ވެސް މިއީ މިފަދަ މައްސަލައެއް ހުށަހެޅުނު ދެވަނަ ފަހަރެވެ. ކުރިން ވީ ގޮތަކީ، މުވައްޒަފުން ބަޔާން ނުދިނުމުން މައްސަލަ ސާބިތުނުވާ ކަމަށް ޖޭއެސްސީން ނިންމީ އެވެ.
އެ ކޯޓުގެ އިސް ގާޒީ މަރިޔަމް ވަހީދާގެ މައްސަލަތަކެއް ވެސް ތަނުގެ މުވައްޒަފުން މީގެ ކުރިން ޖޭއެސްސީއަށް ހުށަހަޅާފައިވެ އެވެ. އެ މައްސަލައަށް ވީ ގޮތެއް އަދި ނޭނގެ އެވެ.