މާލޭގައި ދިރިއުޅޭ ރަށްރަށުގެ މީހުންނަށް ކުރިއަށް އޮތް ލޯކަލް ކައުންސިލް އިންތިހާބުގެ ޕީއެންސީ ޕްރައިމަރީގައި ވޯޓުލުމުގެ އިންތިޒާމު މާލޭގައި ހަމަނުޖައްސާނެ ކަމަށް އެ ޕާޓީގެ ކެމްޕޭނު މެނޭޖަރު، އިބްރާހިމް ފަލާހު ވިދާޅުވެއްޖެ އެވެ.
ޕީއެންސީގެ ލޯކަލް ކައުންސިލް ޕްރައިމަރީއާ ގުޅޭގޮތުން މައުލޫމާތު ދިނުމަށް މިއަދު އެ ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވެއްގައި ވާހަކަދައްކަވަމުން ފަލާހު ވިދާޅުވީ ޕީއެންސީގެ ކައުންސިލް ޕްރައިމަރީގައި ވޯޓު ލެވޭނީ އެމީހެއްގެ ރެޖިސްޓްރީ އޮންނަ ރަށަށް ކަމަށެވެ.
"އަޅުގަނޑުމެން ޕްރައިމަރީގައި ވޯޓުލުން މިފަހަރު މި ޕާޓީގެ ފަރާތުން ނިންމާފައި މި ވަނީ އެ ބޭފުޅަކު ނިސްބަތްވާ ރަށެއްގައި ބެހެއްޓިފައި ހުންނަ ވޯޓު ފޮށްޓަށް ކޮންމެ ބޭފުޅަކަށް ވެސް ވޯޓު ލެވޭނީ. އޭގެ މާނައަކީ ރ. އަތޮޅުުގައި މިސާލަކަށް އުނގޫފާރުގައި، އުނގޫފާރު ފޮށްޓަށް ރެޖިސްޓްރީ ކޮށްފައި އޮންނަ ވޯޓު. މާލޭގައި އަޅުގަނޑުމެންގެ އެއްވެސް ވޯޓު ފޮށްޓެއް ޕްރައިމަރީގައި ވޯޓުލާކަށް މި ފަހަރު ނުބެހެއްޓޭނެ،" ފަލާހު ވިދާޅުވި އެވެ.
"ހުރިހާ ވޯޓު ފޮށްޓަކަށް ވެސް ވޯޓު ލެވޭނީ އެ ބޭފުޅަކު އެ ރެޖިސްޓްރީ އޮންނަ ރަށެއްގައި ހުންނަ، އެ ރަށަކަށް ވޯޓުލުމުގެ ފުރުސަތު އަޅުގަނޑުމެން ހުޅުވާލައިފައި މި ވަނީ."
ފަލާހު ވިދާޅުވީ އެގޮތަށް ހަމަޖެއްސީ އިދާރީ ކަންކަން ވީހާވެސް ފުރިހަމައަށް ހަމަޖައްސައި އިންތިހާބުގެ ސައްހަކަން ކަށަވަރު ކުރުމުގެ ގޮތުން ކަމަށެވެ. މީގެ ކުރިން، ރަށްރަށުގެ ވޯޓު ފޮށި މާލޭގައި ބަހައްޓާފައި ހުރުމުން، ރަށަށް ވޯޓުލުމަށްފަހު މާލެއަށް އައިސް ވެސް މީހުން ވޯޓުލުން ފަދަ ކަންކަން ހިނގާފައިވާ ކަމަށް ފަލާހު ވިދާޅުވި އެވެ.
ފަލާހު އެހެން ވިދާޅުވި ނަމަވެސް، ރާއްޖޭގެ ރަށްރަށުގެ ގިނަ ރައްޔިތުން ދިރިއުޅެނީ މާލޭގަ އެވެ. މީގެ ކުރިން ބާއްވާ ޕާޓީތަކުގެ އެތެރޭގެ ޕްރައިމަރީތަކުގައި ވެސް ރަށްރަށުގެ ވޯޓު ފޮށި މާލޭގައި ބަހައްޓަނީ އެ ސަބަބާ ހުރެ އެވެ. ޕީއެންސީގެ މި ނިންމުމާއެކު މާލޭގައި ދިރިއުޅޭ ރަށްރަށުގެ އެތައް ރައްޔިތުންނެއްގެ ހައްގު ގެއްލިގެން ދާނެ އެވެ.
ޕީއެންސީގެ ޕްރައިމަރީ އޮންނާނީ އަންނަ ޑިސެމްބަރު 27، ގައި ކަމަށް ފަލާހު ވިދާޅުވި އެވެ. އަދި ޑިސެމްބަރު 15، އާ ހަމައަށް އެ ޕާޓީގެ މެންބަރުންގެ ގޮތުގައި ތިއްބަވާ ބޭފުޅުންނަށް ޕްރައިމަރީގައި ވޯޓުލުމުގެ ފުރުސަތު ލިބޭނެ ކަމަށް ވެސް އޭނާ ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ޓްރާންސްޕޯޓު މިނިސްޓަރު، މުހައްމަދު އަމީން ވިދާޅުވީ ޕީއެންސީގެ ޕްރައިމަރީއަކީ ރާއްޖޭގައި މިހައިތަނަށް ބާއްވާ އެންމެ ބޮޑު ޕްރައިމަރީއަށް ވާނެ ކަމަށެވެ. ޕްރައިމަރީގައި 1400 އެއްހައި ކެންޑިޑޭޓުން ވާދަކުރާނެ ކަމަށް އޭނާ ވިދާޅުވި އެވެ.
ޕީއެންސީގެ ޕްރައިމަރީގައި ވާދަކުރަން ހުށަހެޅުމުގެ ފުރުސަތު ހުޅުވައިލަން ނިންމާފައި ވަނީ މާދަމާ އެވެ. އެކަމަށް ޝައުގުވެރިވާ މީހުންނަށް ހާއްސަ ޕޯޓަލްއެއް ހުޅުވާލާނެ ކަމަށް އެ ޕާޓީން ބުންޏެވެ.