ރާއްޖޭގެ ކުޅިވަރު ކުރިއެރުވުމަށްޓަކައި، ތައިލެންޑްގެ ސަރުކާރާ އެކު، ރާއްޖޭން ފަހުމުނާމާ އެއްގައި ސޮއިކޮށްފި އެވެ.
ތައިލެންޑުގައި މި މަހު 27 ވަނަ ދުވަހު ކުރިއަށްދިޔަ ބައްދަލުވުމެއްގައި، ރާއްޖޭގެ ފަރާތުން މި ފަހުމުނާމާގައި ސޮއިކޮށްފައިވަނީ ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) އެވެ. އަަދި، ތައިލެންޑުގެ ފަރާތުން ސޮއިކޮށްފައިވަނީ، ތައިލެންޑްގެ ޓޫރިޒަމް އާއި ސްޕޯޓްސް މިނިސްޓަރު، އަތަހޯން ސިރިލައްތަޔަހޯން އެވެ.
މި އެއްބަސްވުމުގެ ދަށުން ރާއްޖެ އާއި ތައިލެންޑުން ގުޅިގެން ކުޅިވަރުތަކުގެ ކުރިއެރުމަށް ގިނަ މަަަސައްކަތްތަކެއް ކުރުމަށް ވަނީ އެއްބަސްވެފަ އެވެ.
އެ ގޮތުން، މައިގަނޑު ގޮތެއްގައި މި އެއްބަސްވުމުގެ ތެރެއިން، މަސައްކަތް ކުރުމަށް ހަމަޖެހިފައިވަނީ، ކުޅިވަރުގެ އެކި ފަރާތްތައް ޑިވެލޮޕް ކުރުމުގެ އެކްސްޗޭންޖް ޕްރޮގްރާމްތަކާއި ކުޅިވަރުގެ ޓްރެއިނިންތަކާއި ޔޫތު ސްޕޯޓްސް ޑިވެލޮޕްމަންޓް ޕްރޮގްރާމްތަކުގެ އިތުރުން ކުޅިވަރު ވަސީލަތްތަކާއި އިންފްރާސްޓްރަކްޗާ ޑިވެލޮޕްކުރުމުގެ އެކި މަަސައްކަތްތައް ކުރުމަށް ވަނީ ހަމަޖެހިފަ އެވެ.
މި އެއްބަސްވުމުގައި ހުރި ކަންތައްތައް ފުރިހަމަކުރުމަށް އެހީތެރިވުމަށްޓަކައި، ތައިލެންޑްގެ ޑިޕާޓްމަންޓް އޮފް ފިޒިކަލް އެޑިއުކޭޝަނުންނާއި ސްޕޯޓްސް އޮތޯރިޓީ އޮފް ތައިލެންޑް އަދި ނެޝަނަލް ސްޕޯޓްްސް ޔުނިވާސިޓީ އޮފް ތައިލެންޑުން ބައިވެރިވާނެ އެވެ.
މީގެ ކުރިން، މިނިސްޓަރު ރާފިއު ވަނީ މެލޭޝިއާ، ކިއުބާ، އުޒްބެކިސްތާން އަދި ފްރާންސުން ވެސް ރާއްޖޭގެ ކުޅިވަރަށް ހުރި ފުރުސަތުތައް ހޯދަން މަޝްވަރާތަކެއް ކުރިއަށްގެންދަވައިފަ އެވެ. އަދި، ރާއްޖޭގެ ކުޅިވަރަށް ފުރުސަތު ހޯދުމުގެ ގޮތުން، ސައުދީ އަަރަބިއްޔާ އާއި ޗައިނާއާ އެކު އެއްބަސްވުމެއްގައި ވެސް ސޮއިކޮށްފައިވެ އެވެ.