ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން ބޭރުގެ ކުންފުނިތަކުން ވިޔަފާރިކުރަމުން ދިޔަ ހަސަން ޝިފާއުގެ މައްޗަށް 16 ދައުވާއެއް ސާބިތުވާ ކަމަށް ކްރިމިނަލް ކޯޓުން މިއަދު ނިންމައިފި އެވެ.
ވީ ކިހިނެއް؟ - ޝިފާއުގެ މައްޗަށް ތުހުމަތު ކުރެވެނީ އިތުރު މީހަކާ ބައިވެރިވެގެން އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ ވިޔަފާރިއެއް ކަމުގައިވާ 'ކިންގްޑަމް އޮފް ފުރުޓްސް' މެދުވެރިކޮށް ރާއްޖެއިން ބޭރުގެ ކުންފުނިތަކެއްގެ މުދާ ރާއްޖެ އެތެރެކޮށް އެ މުދަލަށް ބޭރު ކުންފުނިތަކަށް ދައްކަން ޖެހޭ ފައިސާ ދެއްކުމުގައި މަކަރާއި ހީލަތް ހެދި ކަމަށެވެ.
އެ މައްސަލާގައި އޭނާގެ މައްޗަށް ދައުލަތުން 23 ދައުވާއެއް އުފުލި އެވެ. އޭގެ ތެރެއިން މިއަދު ކްރިމިނަލް ކޯޓުން ގޮތެއް ނިންމީ ވެސް 16 ދައުވާއާ ގުޅޭ ގޮތުންނެވެ. ބާކީ ދަައުވާތަކާ ގުޅޭ ގޮތުން އަދި ގޮތެއް ނުނިންމަ އެވެ.
ތަފްސީލް - ޝިފާއުގެ މައްޗަށް ސާބިތުވާ ކަމަށް ކޯޓުން ކަނޑައެޅީ:
އެނގި ހުރެ ސައްހަ ނޫން ލިޔުމެއް ދިނުމުގެ ކުށުގެ 9 ދައުވާ
މަކަރާއި ހީލަތް ހެދުމުގެ ކުށުގެ 7 ދައުވާ
ބާކީ 7 ދައުވާއަކީ މަނީ ލޯންޑަރިންގެ ކުށުގެ 7 ދައުވާ އެވެ. އެ ދައުވާތަކާ ގުޅޭ ގޮތުން ގާޒީ މިއަދު ގޮތެއް ނުނިންމަވަ އެވެ.
މީގެ އިތުރުން، އަދަބާއި ގުޅޭ ގޮތުން ވާހަަކަ ދެއްކުމާއި ހުކުމްކުރުމަށް އަންނަ ހަފުތާގެ ހޯމަ އަޑުއެހުމެއް ތާވަލުކުރުމަށް ނިންމި އެވެ. އަދި މިއަދުން ފެށިގެން ހުކުމް ކުރެވެން ދެން ޝިފާއު ބަންދުގައި ބެހެއްޓެވުމަށް ވެސް ގާޒީ މިއަދު އަމުރުކުރެއްވި އެވެ.
ފާހަގަކޮށްލެވޭ - ޝިފާއުގެ މައްޗަށް އުމުރު ދުވަހުގެ ޖަލު ހުކުމެއް އަންނަން އޮތް ސީރިއަސް މައްސަލައެއްގައި ދައުލަތުން، އޭނާ ޖަލު ހުކުމެއް ތަންފީޒުކުރަން ނުޖެހޭ ގޮތަށް އިއުތިރާފު އެއްބަސްވުމެއް ވެސް ގާއިމުކުރި އެވެ. ނަމަވެސް ކޯޓުން ވަނީ އެ އެއްބަސްވުން ބަލައިނުގަތުމަށް ނިންމައިފަ އެވެ.
މި އިއުތިރާފުގެ އެއްބަސްވުމުގައި ވަނީ:
ޝިފާއުގެ މައްޗަށް އުފުލި 23 ދައުވާގެ ތެރެއިން މަކަރާއި ހީލަތް ހެދުމުގެ ހަތް ދައުވާ ފިޔަވައި އެހެން ހުރިހާ ދައުވާތަކެއް އަނބުރާ ގެންދަން
އަނބުރާ ގެންދާ ދައުވާތަކަކީ މަނީލޯންޑަރިންގެ ދައުވާއެއް؛ އަދި އެނގިހުރެ ސައްހަ ނޫން ލިއުމެއް ދިނުމުގެ ދައުވާއެއް
މި އެއްބަސްވުމުގެ ދަށުން، ޝިފާއުގެ މައްޗަށް ކުރާ ދައުވާތައް ހަތް ދައުވާއަށް މަދުކުރުމުން، އޭނާގެ މައްޗަށް އަންނާނީ 88 ދުވަހުގެ ޖަލު ހުކުމަކާ އެކު، 184،000ރ.ގެ ޖޫރިމަނާގެ އަދަބެެއް
ބަންދުގައި ހުރި މުއްދަތު އުނިކުރުމުން މި ހަތް ދައުވާ ސާބިތުވިޔަސް، ޝިފާއު މިނިވަންވާނެ؛ އޭރުން ދައްކަންޖެހޭނީ ހަމައެކަނި ޖޫރިމަނާ
އެނގުން މުހިންމު - ޝިފާއުގެ މައްޗަށް ދައުލަތުން ކޮށްފައިވާ ދައުވާތަކުގައި ބުނެފައިވާ ގޮތުން، އޭނާ ކުށުގެ އަމަލު ހިންގާފައިވަނީ ރާއްޖެއިން ބޭރުގެ އެކި ކުންފުނިތަކުން ގަނެފައިވާ ތަކެއްޗަށް ފައިސާ ދިން ކަމަށް ދެއްކުމުގެ ގޮތުން ސައްހަ ނޫން ލިޔުން އުފައްދައި ހުށަހަޅައިގެންނެވެ.
މި މައްސަލާގައި:
27 އޭޕްރީލް 2023 - ދައުލަތުން އޭނާގެ މައްޗަށް 23 ދައުވާއެއް އުފުލައި ކްރިމިނަލް ކޯޓަށް ހުށަހެޅި
28 އޭޕްރީލް 2023 - ކުށުގެ ތުހުމަތުގައި ހައްޔަރުކުރި
27 މޭ 2023 - ކޯޓުން އޭނާ ދޫކޮށްލުމުން ރާއްޖެއިން ބޭރަށް ފުރި
29 އޯގަސްޓު 2023 - އޭނާ ހޯދަން އިންޓަޕޯލް ރެޑް ނޯޓިސް ނެރުނު
28 ސެޕްޓެމްބަރު 2023 - އަނބުރާ ރާއްޖެ އައުމުން އޭނާގެ ޕާސްޕޯޓު ހިފެހެއްޓުމަށް ފަހު ދޫކޮށްލި
ދައުލަތުން މީގެ ކުރިން ބުނެފައިވާގޮތުގައި މި މައްސަލައިގައި ހިމެނޭ ފައިސާގެ އަދަދަަކީ 123،800އަށް ވުރެ ގިނަ ޑޮލަރެވެ. އެއީ 1.9 މިލިއަނަށް ވުރެ ގިނަ ރުފިޔާ އެވެ. މި މައްސަލާގައި ޝިފާއުގެ މައްޗަށް މިހާރު ކޮށްފައިވާ 23 ދައުވާ ސާބިތުވެއްޖެ ނަމަ މަދުވެގެން 38 އަހަރުގެ ޖަލު ހުކުމެއް އަންނާނެ އެވެ.
ޝިފާއުގެ މައްޗަށް 16 ދައުވާއެއް ސާބިތުވެއްޖެ؛ ހުކުމްކުރުން އަންނަ ހަފްތާގެ ހޯމަ ދުވަހު
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ