އެމްޑީޕީގެ ހުސްވެފައިވާ ޗެއާޕާސަންގެ މަގާމަށް ވަގުތީ ގޮތުން މީހަކު ހޮވުމަށް ބޭއްވި އިންތިހާބު "ކާމިޔާބުކުރި" އެ ޕާޓީގެ ދިއްދޫ ދާއިރާގެ ރައީސް މުހައްމަދު ވަހީދު އޭނާގެ ނަން އަނބުރާ ގެންގޮސްފި އެވެ.
ވީ ކިހިނެއް؟ - ޗެއާޕާސަންގެ މަގާމުގައި ކުރިން ހުންނެވި ފައްޔާޒު އިސްމާއީލް ކުއްލި ގޮތަކަށް އިސްތިއުފާ ދެއްވުމުން، ވަގުތީ ޗެއާޕާސަނަކަށް އައްޔަންކުރަން ހުޅުވާލި ފުރުސަތުގައި ތިން ނަމެއް ހުށަހަޅަން ނިންމައި ޝައުގުވެރިކަން ފާޅުކުރި އެވެ.
އެއީ:
ރައްޔިތުންގެ މަޖިލީހުގެ ކުރީގެ ރައީސް މުހައްމަދު އަސްލަމް 
ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ
ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު
އެކަމަކު މިދިޔަ ހުކުރު ދުވަހު ބޭއްވި ވޯޓުގައި ހުށަހެޅީ، ވަހީދުގެ ނަން އެކަންޏެވެ. އެކަމަކު އެ ބައްދަލުވުމުގައި ވޯޓު ގުނި ގޮތުން އޮޅުންތަކެއް އަރައި ބައްދަލުވުން ހޫނުވެ، އެ ރޭގެ ބައްދަލުވުން ނިންމާލީ އެ މަގާމަށް މީހަކު އައްޔަންނުކޮށެވެ.
އެމްޑީޕީން މިހާރު ފައިނަލްކޮށްފައިވާ ނަތީޖާގައިވާ ގޮތުން:
އެ ރޭ ނެގި ވޯޓުގައި 48 މެންބަރުންގެ ވޯޓާ އެކު ވަހީދު ވަނީ އެ މަގާމަށް ހޮވިފައި 
އެކަމަކު އެ ވޯޓު ގުނުމުގައި ހިތްހަމަނުޖެހުންތަކެއް އުފެދިފައިވާތީ، އެ މަގާމަށް އޭނާ ހޮވިފައިވާކަން އަދި ރަސްމީކޮށް ހާމައެއް ނުކުރޭ
ބުނީ ކީކޭ؟ - މިކަން މިހެން އޮއްވައި ވަހީދު އޭނާގެ ނަން އަނބުރާ ގެންދިޔައީ އެ ޕާޓީގެ ރައީސް އަބްދުﷲ ޝާހިދު އަދި އެ ޕާޓީގެ އެޑްވައިޒަރު، ކުރީގެ ރައީސް އިބްރާހިމް މުހައްމަދު ސޯލިހު "ކަންކުރެއްވި" ގޮތާ މެދު ހިތްހަަމަނުޖެހި އެކަން ފާހަގަކުރައްވައި ޝާހިދަށް ފޮނުއްވި ސިޓީއެއްގަ އެވެ.
ދިއްދޫ ދާއިރާގެ ކުރީގެ މަޖިލިސް މެމްބަރުކަން ވެސް ކުރައްވާފައިވާ ވަހީދު ޝާހިދަށް ފޮނުއްވި ސިޓީގައި ވިދާޅުވީ، އެ މަގާމަށް އޭނާ ކުރިމަތިލެއްވީ ޕާލިމެންޓްރީ ގްރޫޕުން މެންބަރަކު އޭނާއަށް ގުޅުއްވައި އެކަމަށް އެދިވަޑައިގަތުމުން، އެކަމުގެ މަޝްވަރާ ޕާޓީގެ ރައީސް އަދި އެޑްވައިޒަރާ ވެސް ކުރެއްވުމަށް ފަހު އެ ބޭފުޅުންގެ ތާއީދާ އެކު ކަމަށެވެ.
"ގައުމީ މަޖިލީހުގެ އަގުލަބިއްޔަތުގެ ތާއީދާ އެކު ނަން ފާސްވާ އަދަދަށް ވޯޓު ލިބި އަޅުގަނޑު ވަނީ އިންތިހާބުވެފަ އެވެ. އެކަމަކު، އަޅުގަނޑަށް ތާއީދުކުރައްވާ އެ މަގާމަށް ނުކުތުމަށް ހިތްވަރު ދެއްވި ޕާޓީގެ ރައީސް [އަބްދުﷲ ޝާހިދު] އާއި ޕާޓީގެ އެޑްވައިޒަރު [އިބްރާހިމް މުހައްމަދު ސޯލިހު] އަދި ޕާލިމަންޓްރީ ގްރޫޕުގެ މެންބަރުން އެ ވޯޓާ ހަމައަށް ދިޔައިރު އަމަލުކުރެއްވި ގޮތުންނާއި އަދި އެ ވޯޓަށް ފަހު އަމަލުކުރައްވަމުން ގެންދަވާފައިވާ ގޮތުން އަޅުގަނޑު އެ މަގާމު ފުރުމުގައި ބޮޑެތި ހުރަސްތަކެއް ކުރިމަތިވާނޭ ކަމީ ޝައްކުކުރާ ކަމެއް ނޫނެވެ،" އޭނާ ވިދާޅުވި އެވެ.
ވަހީދު ވިދާޅުވީ:
މިވަގުތު ގަސްތުކުރަނީ އެ އިންތިހާބު ކާމިޔާބުވީ ނަމަވެސް، އެ އިންތިހާބުގައި ވާދަކުރެއްވި ކުރުން އަނބުރާ ގެނައުމަށް
އެ މަގާމަށް ދެން އިންތިހާބުވާ ބޭފުޅަކާ އެކު ކުރިއަށް ދިއުމަށާއި ފުރިހަމައަށް އެއްބާރުލުން ދެއްވުމަށް ހުންނެވީ ތައްޔާރަށް
މި ނިންމުމަކީ ޕާޓީގެ ބަދަހިކަން ދެމެހެއްޓުމަށް މިވަގުތު ނިންމެވި ނިންމުމެއް
"ޕާޓީގެ ރައީސް އާއި އެޑްވައިޒަރުގެ ކިބައިން އަޅުގަނޑު އެދެނީ ކުރިއަށް އޮތް ތަނުގައި ވެސް މިފަދަ ކަންކަން މިމޭރުމުން ތަކުރާރު ނުވާނެހެން ކަންކަމުގައި އެ ބޭފުޅުން އަމަލުކޮށްދެއްވުމަށެވެ. އަދި ޕާޓީގެ ޔުނިޓީ ހިފެހެއްޓުމަށް އެ ބޭފުޅުން ވެސް މަސައްކަތް ކޮށްދެއްވުމަށެވެ،" ވަހީދުގެ ސިޓީގައިވެ އެވެ.
އެ ބައްދަލުވުމުގައި ވޯޓުލުމުގެ ހައްގު ލިބޭ 96 މެންބަރަކު ތިއްބެވިއިރު، 47 މެންބަރަކު ވޯޓެއް ނުލަ އެވެ. ވޯޓުނުލާ ބޭފުޅުންގެ ތެރޭގައި ސޯލިހާއި ޝާހިދު ވެސް ހިމެނެ އެވެ. 
އެ ރޭގެ ބައްދަލުވުމުގެ ރިޔާސަތު ބެލެހެއްޓި، އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު އިއްޔެ ޝާހިދަށް ފޮނުއްވި ސިޓީއެއްގައި ވަނީ، ވަގުތީ ޗެއާޕާސަން ހޮވުމުގެ ބައްދަލުވުމުގެ އުފެދިފައިވާ ހަމަނުޖެހުންތަކަށް ބޭނުންވަނީ "ސިޔާސީ ހައްލެއް"ކަން ފާހަގަކުރައްވައި އެ ކަމަށް ހައްލެއް ހޯއްދަވައިދެއްވުމަށް އެދިވަޑައިގެންފަ އެވެ.