ރާއްޖޭގައި މިހާރު އޮތް އެންމެ ބޮޑު ސިޔާސީ ޕާޓީ ކަމަށްވާ، ވެރިކަން ކުރާ ޕީއެންސީގެ ފަރާތުން އަންނަ ލޯކަލް ކައުންސިލް އިންތިޚާބުގައި ވާދަކުރުމުގެ ފުރުސަތު މާދަމާ ހުޅުވާލާނެކަން އެ ޕާޓީން މިއަދު ހާމަކޮށްފިއެވެ. ޕީއެންސީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ޕާޓީގެ ކެމްޕެއިން މެނޭޖަރު އަދި ޕާލަމެންޓަރީ ގްރޫޕްގެ ލީޑަރު އިބްރާހީމް ފަލާހު ވިދާޅުވީ، ޕާޓީގެ ޕްރައިމަރީގައި ވާދަކުރަން ބޭނުންވާ މެންބަރުންނަށް މާދަމާއިން ފެށިގެން ފުރުސަތު އޮންނާނެ ކަމަށެވެ. ފަލާހު ވިދާޅުވީ، މިފެށޭ ޑިސެމްބަރު މަހުގެ 15ވަނަ ދުވަހު އިރުއޮއްސި ހައެއް ޖަހަންދެން، ޕާޓީގެ ވެބްސައިޓް މެދުވެރިކޮށް ކުރިމަތިލުމުގެ ފުރުސަތު މެންބަރުންނަށް އޮންނާނެ ކަމަށެވެ. ޕީއެންސީން ބޭއްވި ދިވެހީންގެ ރާއްޖެ ޖަލްސާގެ ތެރެއިން އެ ޕާޓީގެ މެންބަރުން -- ސަން ފޮޓޯ/ މޫސާ ނަދީމް އެ މަހުގެ 27ވަނަ ދުވަހު ވޯޓުލުން އޮންނާނެ ކަމަށް ވިދާޅުވެ، ޕީއެންސީގެ މި ޕްރައިމަރީއަކީ ރާއްޖޭގައި މިހާތަނަށް ބޭއްވޭ އެންމެ ބޮޑު ޕްރައިމަރީއަށް ވާނެ ފަލާހު ވިދާޅުވިއެވެ. އެ ޕާޓީގެ މެންބަރުންގެ އަދަދު މިހާރު 68،665އަށް އަރާ ކަމަށް އިލެކްޝަންސް ކޮމިޝަން (އީސީ)ގެ ދަފުތަރުން ދައްކާއިރު، އެ ޕާޓީއާ އަލަށް ގުޅޭ މެންބަރުންނަށް ވެސް އިންތިޚާބުގައި ވާދަކުރެވޭނެ ކަމަށް އޭނާ ވިދާޅުވިއެވެ. ފަލާހު ވިދާޅުވިގޮތުގައި ޕްރައިމަރީގައި މެންބަރުންނަށް ވޯޓުލެވޭނީ މެންބަރުން ރަޖިސްޓްރީވެފައިވާ ރަށްރަށުގައި އެކަންޏެވެ. މި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ، ޕީއެންސީގެ ވެބްސައިޓުގައިވާ ޕޯޓަލް މެދުވެރިކޮށް ކައުންސިލް އިންތިޚާބުގެ ޕްރައިމަރީގައި ވާދަކުރުމަށް ކުރިމަތިލުމާ ގުޅޭގޮތުން އެ ޕާޓީގެ ޕާލަމެންޓަރީ ގްރޫޕްގެ މެންބަރުންނަށާއި ދާއިރާތަކުގެ ރައީސުންނަށް މިރޭ މައުލޫމާތު ދޭނެ ކަމަށެވެ. އަމީން ވިދާޅުވިގޮތުގައި ޕޯޓަލްއާ އެކީ، ޕްރައިމަރީގައި ވާދަކުރާ މެންބަރުންނަށް 24 ގަޑިއިރުގެ ހެލްޕްލައިނެއް ތައާރަފުކުރަން ވަނީ ނިންމައިފައެވެ. ސަރުކާރަށް ދެ އަހަރު ފުރުން ފާހަގަކޮށް ޕީއެންސީން މި މަހުގެ 14ވަނަ ދުވަހު ބޭއްވި ޖަލްސާގެ ތެރެއިން -- ސަން ފޮޓޯ/ އަހުމަދު ފިރިޔާލް "އެއީ އެގޮތަށް ގެންދަން ބޭނުންވާ މައިގަނޑު އެއް ސަބަބަކީ އަޅުގަނޑުމެންގެ ހުރިހާ ކެނޑިޑޭޓެއްގެ އެޕްލިކޭޝަންވެސް އިލެކްޝަން ކޮމިޝަނަށް ބޭނުންވާ ހުރިހާ މައުލޫމާތަކާއި ފޯމުތަކާއި އެޑްމިނިސްޓްރޭޓިވް ހުރިހާ ކަމެއް ނިމޭ ގޮތަށް އިންތިޒާމްކުރެވިފަވާނީ،" އަމީން ވިދާޅުވިއެވެ. "ގަނޑުތައް ގެއްލިގެން ނޫނީ އެޕްލިކޭޝަން ފޯމުތައް ގެއްލިގެން ދިމާވެދާނެ މައްސަލަތައް [މަދުވެ] އިރާދަކުރެއްވިއްޔާ ވަރަށް ފަސޭހަވެގެން ދާނެ." ރޭ 'ސަން' އާ ވާހަކަދެއްކެވި ޕީއެންސީގެ އިސް މެންބަރަކު ވިދާޅުވީ، އެ ޕާޓީގެ ވިސްނުމަކީ ހުރިހާ ދާއިރާއަކަށް ވާދަކުރުން ކަމަށާއި، އެއްވެސް އިތުރު ޕާޓީއަކާ ކޯލިޝަން ހެދުމުގެ ވިސްނުމެއް ނެތް ކަމަށެވެ. މި ސަރުކާރު ފެށުމާއެކު ވެސް، ރާއްޖޭގެ އެންމެ ބޮޑު ސިޔާސީ ޕާޓީއަށް ޕީއެންސީ ހެދުމުގެ މަސައްކަތް އެ ޕާޓީގެ އިސް ވެރިން ފެށިއެވެ. އެ މަސައްކަތުގެ ތެރެއިން، ދައުލަތުގެ ވަސީލަތްތައް ބޭނުންކޮށްގެން މެންބަރުން އިތުރުކުރި ކަމުގެ ތުހުމަތުތައް އެ ޕާޓީއަށް އަމާޒުވިއެވެ. ނަމަވެސް އެ ޕާޓީން ތުހުމަތުތައް ދޮގުކޮށްފައިވެއެވެ. ވެރިކަންކުރާ ޕީއެންސީގެ ޕްރައިމަރީގައި ވާދަކުރުމުގެ ފުރުސަތު މާދަމާ ހުޅުވާލާއިރު، އިދިކޮޅު އެމްޑީޕީން ލޯކަލް ކައުންސިލް އިންތިޚާބުގައި އެ ޕާޓީގެ ފަރާތުން ވާދަކުރަން ޝައުގުވެރިވާ މެންބަރުންނަށް ޕާޓީގެ ޕްރައިމަރީގައި ވާދަކުރުމުގެ ފުރުސަތު ހުޅުވާލީ މިދިޔަ އޮގަސްޓް މަހުގެ 28ވަނަ ދުވަހުން ސެޕްޓެމްބަރު މަހުގެ ނިޔަލަށެވެ. އެ ޕާޓީގެ ކައުންސިލް ޕްރައިމަރީގައި މިހާތަނަށް ވާދަކުރައްވާނެ ކަން ޔަގީންވެފައިވަނީ މިހާރުވެސް ރާއްޖޭގެ ފަސް ސިޓީގެ މޭޔަރުންނެވެ. އިލެކްޝަންސް ކޮމިޝަންގެ ރައީސް މުހައްމަދު ޒާހިދު މިދިޔަ އޮކްޓޯބަރު މަހުގެ 18ވަނަ ދުވަހު ދައުލަތުގެ މީޑިއާ 'ޕީއެސްއެމް'ގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން ވިދާޅުވީ، ލޯކަލް ކައުންސިލް އިންތިޚާބު ބޭއްވުމަށް ހަމަޖެހިފައިވަނީ އަންނަ މާޗް މަހުގެ 28ވަނަ ދުވަހު ކަމަށެވެ. ފާހަގަކުރެވޭ ގޮތުގައި މި ހަފުތާގައި ސަރުކާރުގެ ސާފު އަޣުލަބިއްޔަތު އޮންނަ ރައްޔިތުންގެ މަޖިލީހުން ވަނީ އަތޮޅު ކައުންސިލްތައް އުވާލުމަށާއި، އާބާދީ ކުޑަ ރަށްރަށުގައި ތިބޭ ކައުންސިލަރުން މަދުކުރުމަށް ފާސްކޮށް، ގާނޫނުއަސާސީއާއި ކަމާ ގުޅުންހުރި ގާނޫނުތަކަށް އިސްލާހު ގެނެސްފައެވެ.