ކުރިއަށް އޮތް ލޯކަލް ކައުންސިލް އިންތިހާބުގައި ވެރިކަންކުރާ ޕީއެންސީގެ ފަރާތުން ކުރިމަތިލާނެ މީހުން ހޮވުމަށް ބާއްވާ ޕްރައިމަރީއަށް ކުރިމަތިލާން މާދަމާ ހުޅުވާލަން ނިންމާފައިފި އެވެ.
ވީ ކިހިނެއް؟ - ކައުންސިލް އިންތިހާބު އޮތީ އަންނަ މާޗު މަހު އެވެ. މި އިންތިހާބަށް ކުރިމަތިލާން ހުޅުވާލާ ގޮތަށް އޮތީ އަންނަ ޖެނުއަރީގަ އެވެ. 
ތަފްސީލް - ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ކެމްޕެއިން މެނޭޖަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވީ، މި ޕްރައިމަރީގެ ވޯޓުލުން އޮންނަނީ އަންނަ މަހުގެ 27ގައި ކަމަށެވެ. ޕްރައިމަރީގައި ވާދަކުރުމުގެ ފުރުސަތު އޮންނާނީ މާދާމާއިން ފެށިގެން އަންނަ މަހުގެ 15ގެ ނިޔަލަށް ކަމަށް އޭނާ ވިދާޅުވި އެވެ.
ފަލާހު ވިދާޅުވި ގޮތުން:
ޕްރައިމަރީއަށް ހުޅުވާލާފައިވާ މުއްދަތުގައި ޕާޓީއަށް އަލަށް ގުޅޭ މީހުންނަށް ވެސް އެ ޕްރައިމަރީގައި ކުރިމަތިލެވޭނެ
ވަރަށް ގިނަ ރަށްރަށުން ޕީއެންސީގެ ޓިކެޓުގައި ކައުންސިލް އިންތިހާބަށް ނުކުންނަން ދަނީ ޝައުގުވެރިކަން ފާޅުކުރަމުން
ޕްރައިމަރީގައި ވޯޓުލެވޭނީ އެ މީހަކު ނިސްބަތްވާ ރަށެއްގައި ބަހައްޓާފައި ހުންނަ ވޯޓު ފޮއްޓަށް؛ މާލޭގައި ރަށްރަށުގެ ވޯޓު ފޮށިތަކެއް ނުބަހައްޓާނެ
މި ޕްރައިމަރީގައި 1400އަށް ވުރެ ގިނަ މީހުން ކުރިމަތިލާން ޝައުގުވެރިކަން ފާޅުކޮށްފައިވޭ 
ޕްރައިމަރީއަށް ކުރިމަތިލުމުގެ ކަންކަން ކުރިއަށްދާނީ އެކަމަށް ހާއްސަކޮށް ހަދާފައިވާ ޕޯޓަލެއްގެ ތެރެއިން
"އަޅުގަނޑުމެންގެ މި ޕްރައިމަރީއަކީ ވަރަށް ބޮޑު ޕްރައިމަރީއަކަށްވާނެ. މިހާ ގިނަ މެންބަރުންތިބި ޕާޓީއެއްގައި ރާއްޖޭގެ ހުރިހާ ރަށަކުންވެސް މިހާރު މިތިބީ ވާދަކުރަން ފުރުސަތަކަށް އެދި، އެބޭފުޅުން އެކަމުގެ ޝައުގުވެރިކަން ފާޅުކޮށްފައި. އެހެންވީމާ ވަރަށް ބޮޑު ޕްރައިމަރީއަކަށް ވެގެންދާނެ. އުންމީދު މިކުރަނީ މިހާތަނަށް ރާއްޖޭގައި ބޭއްވޭ އެންމެ ބޮޑު ޕްރައިމަރީ އަށޭ މި ޕްރައިމަރީ ވާނީ،" ފަލާހު ވިދާޅުވި އެވެ.