ސްވިޓްޒަލެންޑްއާ 1-1 އިން އެއްވަރުކޮށް ވޯލްޑް ކަޕްގެ ތާރީހީ ފުރަތަމަ ޕޮއިންޓް ހޯދައިގެން ގަތަރުން ފަހުރުވެރިވީ މިދިއަ ހަފުތާގަ އެވެ. ނަމަވެސް ރޭ ކެނެޑާ އަތުން 6-0އިން ހަމައެކަނި ބަލިވީކީ ނޫނެވެ. ދެ ރަތް ކާޑު ވެސް ހޯދީ އެވެ.
މި ފަހަރުގެ ވޯލްޑް ކަޕް ބާއްވާ ތިން ގައުމުގެ ތެރޭގައި ހިމެނޭ ކެނެޑާއަށް މިއީ ވޯލްޑް ކަޕްގެ ތާރީހުގައި ވެސް ފުރަތަމަ މޮޅެވެ. ވެންކޫވާގެ ބީސީ ޕެލެސް ސްޓޭޑިއަމްގައި، 52،000 މީހުންގެ ކުރިމަތީގައި، ކެނެޑާގެ ޖޮނަތަން ޑޭވިޑް ހެޓްރިކެއް ވެސް ހެދީ އެވެ.
މި ފަހަރުގެ ވޯލްޑް ކަޕްގެ ފުރަތަމަ ހެޓްރިކް ހެދީ އާޖެންޓީނާގެ ތަރި ލިއޮނެލް މެސީ އެވެ. އޭނާގެ ސަޕޯޓަރުން އެ ހެޓްރިކް ފާހަގަކުރީ މުޅި ވޯލްޑް ކަޕްގެ ތާރީހުގައި ވެސް ކުޅުންތެރިޔަކު ހެދި ފުރަތަމަ ހެޓްރިކް ފަދައިންނެވެ.
ކެނެޑާގެ ތާރީހީ ހެޓްރިކްގައި ޑޭވިޑްގެ ލަނޑުތައް ގަތަރުގެ ގޯލަށް ވައްދާލީ 29، 3+45 އަދި 2+90 މިނިޓްގަ އެވެ.
ކެނެޑާގެ ހަ ލަނޑުގެ ތެރޭގައި ގަތަރުގެ މުހައްމަދު އަލް-މަންނާއީގެ އަތުން ބައި ކޮޅަށް ވަން ލަނޑެއް ވެސް ހިމެނެ އެވެ.
ގްރޫޕް ބީގައި ރޭ ބޮސްނިއާ 4-1 އިން ބަލިކޮށް ސްވިޓްޒަލެންޑް ވެސް ބޮޑު މޮޅެއް ހޯދި އެވެ. މިހާރު ކެނެޑާ އާއި ސްވިޓްޒަލެންޑް ވަނީ ހަތަރު ޕޮއިންޓުން އެއްވަރުވެފަ އެވެ. ލަނޑުގެ ތަފާތުން އެއްވަނާގައި ކެނެޑާ އެވެ.
ކޮންކަފާ ސަރަހައްދުގެ ގައުމަކުން ވޯލްޑް ކަޕްގެ މެޗެއްގައި ޖެހި އެންމެ ގިނަ ލަނޑު
ޖޮނަތަން ޑޭވިޑަކީ 1930ގެ ވޯލްޑް ކަޕްގައި އެމެރިކާގެ ބާޓް ޕެޓަނައުޑޭ ހެދި ހެޓްރިކަށް ފަހު ކޮންކަފާގެ ގައުމެއްގެ ކުޅުންތެރިއެއްގެ ފުރަތަމަ ހެޓްރިކް
މިއީ 1982ގެ ވޯލްޑް ކަޕްގައި ބްރެޒިލްއާ ދެކޮޅަށް އިޓަލީގެ ޕައުލޯ ރޮސީ ހެޓްރިކް ހެދި ފަހުން ޔުއެންޓަސްގެ ކުޅުންތެރިޔަކު ވޯލްޑް ކަޕްގައި ހެދި ފުރަތަމަ ހެޓްރިކް
ގަތަރަކީ ވޯލްޑް ކަޕްގެ މެޗެއްގައި ދެ ރަތް ކާޑު ހޯދި އޭޝިއާގެ ފުރަތަމަ ގައުމު
މި މުބާރާތުގައި މިހާތަނަށް ދެއްކި ހަ ރަތް ކާޑަކީ 2014ގެ ވޯލްޑް ކަޕް (10 ރަތް ކާޑު)އަށް ފަހު އެންމެ ގިނަ ރަތް ކާޑު ފެނުނު ވޯލްޑް ކަޕް