ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ ގޮތުގައި ބެލެވިފައިވާ އާޖެންޓީނާގެ ތަރި ލިއޮނަލް މެސީއަށް، އޭނާ ކުޅެމުންދާ އިންޓަ މިއާމީގެ މެޗެއްގެ ތެރެއިން އަނިޔާގެ ނިޝާންތަކެއް ފެނި، މެޗުގެ މެދުތެރެއިން ބަދަލުކުރަން ޖެހުމާއި އެކު މުޅި ފުޓްބޯޅަ ދުނިޔެއަށް ވަނީ ކަންބޮޑުވުން ވެރިވެފައެވެ. ފިލަޑެލްފިއާ ޔޫނިއަންއާ ދެކޮޅަށް ކުޅުނު މެޗުގެ 72 ވަނަ މިނެޓުގައި މެސީ އަމިއްލައަށް ބަދަލުވާން އެދުމުން، ކުރިއަށް އޮތް ފީފާ ވޯލްޑް ކަޕްގައި އޭނާއަށް ކުޅެވިދާނެތޯ މިހާރު ވަނީ ސުވާލު އުފެދިފައެވެ. އަދި ގިނަ ބަޔަކު ދަނީ އެކަމާއި ކަންބޮޑުވުން ވެސް ފާޅުކުރަމުންނެވެ. އާޖެންޓީނާގެ ކެޕްޓަން އަދި އިންޓަ މިއާމީގެ ކެޕްޓަން ލިއޮނެލް މެސީ.. މި މެޗުގައި ލިއޮނަލް މެސީ ދެ އެސިސްޓް ހަދައި މޮޅު ކުޅުމެއް ދެއްކި ނަމަވެސް، މެޗުގެ ފަހުކޮޅު އޭނާގެ ވާތު ފައިގެ ފަހަތު މަސްގަނޑަށް ތަދެއް އިހުސާސްވުމުގެ ސަބަބުން ބަދަލުކުރަން ޖެހުނެވެ. މެސީ ބަދަލުކުރި ވަގުތު އަނިޔާގެ މައްސަލަ ކުރިމަތިވެ، ގިނަ ބައެއްގެ ކަންބޮޑުވުން މިކަމުގައި އޮތް ނަމަވެސް، މެސީ ދަނޑުން ފޭބީ އެހެން މީހެއްގެ އެހީތެރިކަމަކާ ނުލައި އަމިއްލައަށެވެ. މިއީ އޭނާގެ އަނިޔާ މާ ސީރިއަސް ނޫންކަމަށް ބެލެވޭ އުންމީދީ ނިޝާނެކެވެ. މެޗުގެ ތެރެއިން މެސީއަށް އަނިޔާގެ މައްސަލަ ކުރިމަތިވެ ބަދަލުކުރުގެ ތެރެއިން.. އިންޓަ މިއާމީގެ ކޯޗު ގިލާމޯ ހޯޔޯސް ބުނި ގޮތުގައި، މެސީ ބަދަލުކުރީ މާބޮޑު އަނިޔާއެއް ވެގެން ނޫނެވެ. އޭނާ ބަދަލުކުރީ ރައްކާތެރިކަމުގެ ފިޔަވަޅެއްގެ ގޮތުންނެވެ. މެސީ ބަދަލުކުރުމަކީ ދަނޑުގެ ހާލަތާއި ކުޅުންތެރިޔާގެ ވަރުބަލިކަމަށް ބަލައި، އިތުރު އަނިޔާއަކަށް ފުރުސަތު ނުދިނުމަށް އެޅި ފިޔަވަޅެއް ކަމަށް އޭނާ ފާހަގަކުރިއެވެ. މެޑިކަލް ރިޕޯޓެއް ލިބުމުގެ ކުރިން މިއީ ސީރިއަސް އަނިޔާއެއް ކަމަށް ބުނަން އަދި މާ އަވަސް ކަމަށްވެސް ކޯޗު ވަނީ ބުނެފައެވެ. ގިނަ ބަޔަކު މެސީއަށް ވޯލްޑް ކަޕް ނުކުޅެވިދާނެ ކަމަށް ބުނެ އަޑުތައް ފަތުރަމުން ދާއިރު، މިއީ އަދި ގޮތް ނިންމަން ޖެހޭ ފުރުސަތު ނޫން ކަމަށް ވެސް ކޯޗު ބުންޏެވެ. އިންޓަ މިއާމީގެ މެޗެއްގެ ތެރެއިން މެސީ ކުޅެނީ.. މެސީ މީގެ ކުރިން ވެސް ބުނެފައި ވަނީ އޭނާ ވޯލްޑް ކަޕްގައި ކުޅޭނީ ފުރިހަމަ ސިއްހަތެއްގައި ހުރެވިއްޖެ ނަމަ ކަމަށެވެ. އުމުރުން 38 އަހަރުގެ މެސީއަކީ ފަހަކަށް އައިސް ފައިގެ މަސްގަނޑުގެ އަނިޔާތަކާ ގިނައިން ކުރިމަތިލާން ޖެހިފައިވާ ކުޅުންތެރިއެކެވެ. އެހެންކަމުން، މިފަހަރުގެ މި ހާދިސާއަކީ އޭނާގެ ވޯލްޑް ކަޕްގެ ހުވަފެނަށް އެޅުނު ހުރަހެއް ކަމަށް ބައެއް ފަރާތްތަކުން ބުނި ނަމަވެސް، މެޑިކަލް ޓީމުގެ ނިންމުމަށް އިންތިޒާރު ކުރުން މުހިންމެވެ. ޖުމްލަ ގޮތެއްގައި ބަލާއިރު، މެސީއަށް ލިބުނު އަނިޔާއަކީ ސީރިއަސް އަނިޔާއެއް ކަމެއް ނުވަތަ ނޫންކަމެއް އަދި ކަށަވަރެއް ނުވެއެވެ. މެސީއަށް އަނިޔާވެ ދަނޑުން ބޭލުން.... އޭނާ ދަނޑުން ފޭބި ގޮތާއި ކޯޗުގެ ވާހަކަތަކަށް ބަލާއިރު، މިއީ ހަމައެކަނި ވަރުބަލިކަމުގެ ސަބަބުން ދިމާވި ކަމަކަށް ވުމުގެ ފުރުސަތު ބޮޑެވެ. އެހެންކަމުން، އާޖެންޓީނާގެ ސަޕޯޓަރުންނާއި މުޅި ދުނިޔެ އުންމީދު ކުރަނީ މެސީ އަނިޔާއިން ރަނގަޅުވެ، އަވަހަށް ކުޅުުގެ ތެރެއަށް އެނބުރި އައިސް، ވޯލްޑް ކަޕްގައި އޭނާގެ ހުނަރު ފެނިގެންދާނެ ކަމަށެވެ.