ބައިނަލްއަގްވާމީ އެކުވެރިކަމުގެ މެޗުގައި ބަންގްލަދޭޝް ކޮޅަށް އަލީ ފާސިރު (ސެންޓޭ) ވައްދާލި ހަމައެކަނި ލަނޑާއެކު ރާއްޖެއިން ތާރީހީ މޮޅެއް ހޯދައިފިއެވެ.
މިއީ ވަޅުޖެހިފައި އޮތް ރާއްޖޭގެ ފުޓުބޯޅައިގެ ކުރިމަގަށް ލިބުނު ބޮޑު އުންމީދެކެވެ. ރާއްޖޭގެ ލީގު މެޗެއް ނުކުޅޭތާ އަހަރެއްހާ ދުވަސްވަނީ އެވެ. އަނެއްކޮޅުން ގައުމީ ފުޓުބޯޅަ ޓީމުވެސް މެޗެއް ކުޅެފައިވަނީ ގާތްގަނޑަކަށް މީގެ އަހަރެއްހާ ކުރިންނެވެ. އެންމެ ފަހުންވެސް ރާއްޖެ ކުޅުނީ ބަންގްލަދޭޝް އާއެވެ. ވޯލްޑްކަޕް ކޮލިފައިން އިން ރާއްޖެ އެފަހަރު ކެޓީ ބަންގްލަދޭޝް އަތުން 2-1 އިން ބަލިވުމުންނެވެ.
ބަންގްލަދޭޝްގެ ވެރިރަށް ޑާކާގެ ބަޝުންދަރާ އެރީނާގައި މިއަދު ކުޅުނު މެޗު ރާއްޖެ ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މިއީ ބަންގްލަދޭޝްގައި ކުޅެގެން އެ ޓީމު އަތުން ރާއްޖޭން މޮޅުވި ފުރަތަމަ ފަހަރެވެ.
ރާއްޖެއިން މި މެޗަށް ނެރުނީ ވަރުގަދަ ސްކޮޑެކެވެ. ތަޖުރިބާކާރު ގިނަ ކުޅުންތެރިންތަކެއް މި ސްކޮޑުގައި ހިމެނޭއިރު، މި މެޗުގައި ބަންގްލަދޭޝް ޓީމުގެ ހަލުވި ކުޅުން ދެއްކޭތޯ މަސައްކަތްކުރި އެވެ. ނަމަވެސް ދިވެހި ކުޅުންތެރިންނަށް ލިބުނު ދަނޑިވަޅުތަކުގައި ވަނީ ތަފާތު ދައްކާފައެވެ.
މެޗުގައި ރާއްޖޭގެ ހަމައެކަނި ލަނޑު ފެނިގެންދިޔައީ މެޗުގެ 18 ވަނަ މިނެޓުގައެވެ. އަލީ ފާސިރު (ސެންޓޭ) މި ލަނޑު ކާމިޔާބުކުރީ އޭރިއާބޭރުން ލިބުނު ހިލޭޖެހުމަކުން، ހަމްޒާ މުހައްމަދު (ހަމްޕު) ނަގައިދިން ބޯޅަ ގޯލުގެ ތެރެއަށް ފޮނުވާލައިގެންނެވެ.
ނަތީޖާ ހަމަހަމަކުރަން ބަންގްލަދޭޝް އިން ކުރި އެޓޭކްތަކުގެ ތެރެއިން އެންމެ ރަނގަޅު ހަމަލާއެއް މެޗުގެ 43 ވަނަ މިނެޓުގައި ފޮނުވާލީ ސޮހޭލް ރާނާއެވެ. އޭރިއާބޭރުން އޭނާ ޖެހި ބޯޅަ އަމާޒުވީ ގޯލުގެ ދަނޑިއަށެވެ.
މިއީ ބަންގްލަދޭޝާ ދެކޮޅަަށް ކުުޅުނު 19 މެޗުގެ ތެރެއިން ރާއްޖެ މޮޅުވި ހަތްވަނަ މެޗެވެ. މިހާތަނަށް ބަންގްލަދޭޝްގައި ރާއްޖެއިިން ކުޅުނު ފަސް ފަހަރުވެސް ވަނީ ބަލިވެފައެވެ. މިއީ އެ ގައުމުގައި ރާއްޖެއަށް ލިބުނު ފުރަތަމަ މޮޅެވެ.
ރާއްޖެއާއި ބަންގްލަދޭޝް ބައްދަލުކުރާ އެކުވެރިކަމުގެ ދެވަނަ މެޗު ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ހަވީރެވެ.