ދުންފަތް ކޮންޓްރޯލްކުރުމާބެހޭ ޤާނޫނަށް 1 ވަނަ އިސްލާޙު ގެނައުމުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަސްދީޤުކުރެއްވެވުމާއި ގުޅިގެން، މާދަމާއިން ފެށިގެން ރާއްޖެއަށް ވޭޕް އެތެރެކުރުން މަނާވެގެންދާނެއެވެ.މި ޤާނޫނުގެ ދަށުން، މާދަމާއިން ފެށިގެން ވޭޕް އެތެރެކުރާ ފަރާތްތައް 50,000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ އާލާތަކަށް 10,000 ރުފިޔާގެ އިތުރު ޖޫރިމަނާއެއް ކުރެވޭނެއެވެ.މީގެ އިތުރުން، އަންނަ މަހުގެ 15 ވަނަ ދުވަހުން ފެށިގެން ވޭޕް ވިއްކުމާއި، ހިލޭ ބެހުމާއި އަދި ބޭނުންކުރުންވެސް މަނާވެގެންދާނެއެވެ. މި ކަންކަމާ ޚިލާފުވާ ފަރާތްތައް 20,000 ރުފިޔާއިން ޖޫރިމަނާކުރެވޭނެއެވެ. އަދި ވިއްކާ ކޮންމެ އާލާތަކަށް 10,000 ރުފިޔާ، ބޭނުންކުރުމަށް 5,000 ރުފިޔާ، އަދި ހިލޭ ބެހުމަށް 10,000 ރުފިޔާގެ އިތުރު ޖޫރިމަނާއެއް ކުރެވޭނެއެވެ.ޚާއްޞަކޮށް ކުޑަކުދިންނަށް ވޭޕް ވިއްކުމާއި ހިލޭ ބެހުމަށް ސަރުކާރުން ވަނީ ހަރުކަށި ފިޔަވަޅުތަކެއް އަޅާފައެވެ. މިފަދަ ޢަމަލެއް ހިންގާ ފަރާތްތަކަށް އިތުރު 50,000 ރުފިޔާގެ ޖޫރިމަނާއެއް ކުރެވޭނެއެވެ.މި ނިންމުމަކީ ޞިއްޙަތަށް ގެއްލުންހުރި ވޭޕްގެ ބޭނުންކުރުން ހުއްޓުވުމަށް އެޅޭ މުހިންމު ފިޔަވަޅެއްގެ ގޮތުގައި ޞިއްޙީ ދާއިރާގެ މާހިރުންނާއި ބެލެނިވެރިން ވަނީ ތަޢުރީފުކޮށްފައެވެ.