ކުޅަދާނަ ފިލްމު ޑައިރެކްޓަރުން ކަމަށްވާ ރާޖް އާއި ޑީކޭގެ ކުރިއަށް އޮތް ފިލްމުގައި ބޮލީވުޑް އެކްޓަރު ސަލްމާން ޚާން ފެންނާނީ ރިޓަޔަ ކުރަން އުޅޭ ސުޕަހީރޯއެއްގެ ރޯލްއިން ކަމަށް ރިޕޯޓުތަކުން ބުނެފިއެވެ. މި އަހަރުގެ ނޮވެމްބަރު މަހުތެރޭ ފިލްމުގެ މަސައްކަތް ފަށާނެ ކަމަށް ބެލެވޭއިރު ވޭތުވެދިޔަ ތިން މަސްދުވަހު ސަލްމާން ޚާން އާއި ޑައިރެކްޓަރުން ކަމަށްވާ ރާޖް އަދި ޑީ.ކޭ އާ ދެމެދު ފިލްމާ ގުޅޭގޮތުންގިނަ މަޝްވަރާތަކެއް ވަނީ ކުރެވިފައެވެ. ފިލްމީ ޚަބަރުތައް ގެނެސްދޭ ބޮލީވުޑް ހަންގާމާގެ ރިޕޯޓެއްގައި ބުނެފައިވާ ގޮތުން، މި ދެ ޑައިރެކްޓަރުން ތައްޔާރު ކުރަމުންދަނީ ސަލްމާން ތަފާތު ގޮތަކަށް ފެންނާނެ ސުޕަހީރޯ ފިލްމެކެވެ. އެގޮތުން ބައެއް ފިލްމީ ޚަބަރުތައް ބުނާގޮތުން މި ފިލްމަކީ ހޮލީވުޑްގެ މަޝްހޫރު ފިލްމު "ހެންކޮކް" ގެ ފޯމެޓަށް ތައްޔާރުކުރާ ފިލްމެކެވެ. މި ފިލްމުގެ ސްކްރިޕްޓް ސަލްމާންއަށް ވަރަށް ބޮޑަށް ކަމުގޮސްފައިވާ ކަމަށާއި ސްކްރިޕްޓްގެ މަސައްކަތް ނިމޭނެ ދުވަހަކަށް ސަލްމާން އިންތިޒާރުކުރަމުން އަންނަ ކަމަށް ވެސް ރިޕޯޓުތަކުން ބުނެއެވެ. ހަމައެއާއެކު މާބޮޑު ބަޖެޓަކުން އުފައްދާ ސުޕަހީރޯ ފިލްމެއްގެ ކެރެކްޓާ ކުޅެން ސަލްމާން ބޭނުންނުވާތީ ރާޖް އާއި ޑީކޭ މި ފިލްމަށް ކަނޑައަޅާ ބަޖެޓާ ބެހޭ މައުލޫމާތު ހޯދުމަށް ސަލްމާންގެ ޓީމުން ރާޖް އާއި ޑީކޭއަށް އަންގާފައިވާ ކަމަށްވެސް ރިޕޯޓުތައް ބުނެއެވެ. ސަލްމާން ޚާން ފިލްމު "ބެޓްލް އޮފް ގަލްވާން'ގެ މަންޒަރެއްގައި--ފޮޓޯ/ސިނެމާއެކްސްޕްރެސް މައިތްރީ ޕްރޮޑަކްޝަންސް އާއި ރީލް ލައިފް އެންޓަޓެއިންމަންޓް ގުޅިގެން އުފައްދާ މި ސުޕަހީރޯ ފިލްމަކީ ސަލްމާން ރާޖް އާއި ޑީކޭއާ އެކު މަސައްކަތްކުރާނެ ފުރަތަމަ ފިލްމެވެ. އިތުރު ފިލްމަކަށް ސަލްމާން ތައްޔާރުވަމުން އަންނައިރު އޭނާގެ އެންމެ އަވަހަށް ރިލީޒްވާނީ އަންނަ މަހުގެ 17 ވަނަ ދުވަހު ސިނަމާތަކަށް ގެންނަން ތާވަލްކޮށްފައި އޮތް "ބެޓްލް އޮފް ގަލްވާން"އެވެ.