އެމެރިކާ އާއި އީރާނާ ދެމެދު ދެ ހަފުތާގެ މުއްދަތަށް ހަމަލާ ބަދަލުކުރުން ހުއްޓާލުމަށް މިއަދު އެއްބަސްވުމާ ގުޅިގެން، ހޮރްމޫޒް ކަނޑުއޮޅި މެދުވެރިކޮށް ތެލާއި ގޭސް އުފުލުމުގެ މަސައްކަތް އަލުން ފެށޭނެ ކަމުގެ އުންމީދު ބޮޑުވެ، ދުނިޔޭގެ ބާޒާރުތަކަށް ބޮޑު ކުރިއެރުމެއް ލިބިއްޖެ އެވެ.
މި އެއްބަސްވުމާ އެކު ތެލުގެ އަގު ވަނީ ވަރަށް ބޮޑަށް ދަށަށް ގޮސްފަ އެވެ. އެގޮތުން، އެމެރިކާގެ ސާފުނުކުރާ ތެލުގެ އަގު ގާތްގަނޑަކަށް %16.5 ދަށަށް ގޮސް، ފީފާއެއްގެ އަގު މިހާރު ހުރީ 94 ޑޮލަރުގަ އެވެ.
ހަމަ އެއާ އެކު، ހިއްސާގެ ބާޒާރު ވަނީ ވަރުގަދަވެ، ބޮންޑުގެ އަގުތައް މައްޗަށް ގޮސްފަ އެވެ. އެސްއެންޑްޕީ 500 ފިއުޗާސް %2އަށް ވުރެ މައްޗަށް ޖެހިލާފައިވާއިރު، އިންވެސްޓަރުން ރައްކާތެރި އެސެޓްތަކަށް ކުރާ އިންވެސްޓްމަންޓްތައް ބަދަލުކުރުމާ ގުޅިގެން އެމެރިކާ ޑޮލަރުގެ އަގު ވަނީ ދަށްވެފަ އެވެ.
ބާޒާރަށް މި ބަދަލު އައީ، އީރާނަށް ދެމުންދާ ހަމަލާތައް ދެ ހަފުތާއަށް މެދުކަނޑާލިކަން އެމެރިކާގެ ރައީސް ޑޮނަލްޑް ޓްރަމްޕް އިއުލާން ކުރެއްވުމާ ގުޅިގެންނެވެ. މީގެ އިތުރުން، ދާއިމީ ސުލްހައިގެ އެއްބަސްވުމަކަށް ދިއުމަށްޓަކައި ކުރިއެރުންތަކެއް ލިބެމުންދާކަން ވެސް ވަނީ ފާހަގަކޮށްފަ އެވެ.
އީރާނުން ބުނެފައިވަނީ އެގައުމަށް ދޭ ހަމަލާތައް ހުއްޓާލައިފި ނަމަ، އެ ގައުމުން ކުރިއަށްގެންދާ އަސްކަރީ ހަރަކާތްތައް ހުއްޓާލާނެ ކަމަށެވެ. އަދި ހަމަލާ ބަދަލުކުރުން ހުއްޓާލާފައިވާ މުއްދަތުގައި ހޮރްމޫޒް ކަނޑުއޮޅިން އަމާންކަމާ އެކު ދަތުރުފަތުރު ކުރެވޭނެކަން އެ ގައުމުން ވަނީ ކަށަވަރުކޮށްދީފަ އެވެ.
ދުނިޔޭގެ ތެލާއި ގޭހުގެ ސަޕްލައިގެ ފަސްބައިކުޅަ އެއްބައި އުފުލާ ހޮރްމޫޒް ކަނޑުއޮޅި، މިދިޔަ ފެބްރުއަރީ މަހުގެ ފަހުކޮޅު ހަމަނުޖެހުންތައް ފެށުނީއްސުރެ އޮތީ ބަންދުވެފަ އެވެ. މީގެ ސަބަބުން ހަކަތައިގެ އަގުތައް ވަނީ އިންތިހާއަށް މައްޗަށް ގޮސްފަ އެވެ.
އޮފިޝަލުން ވިދާޅުވާ ގޮތުގައި، ހަމަލާ ބަދަލުކުރުން ހުއްޓާލުމަކީ މި މައްސަލައަށް ލިބުނު ބޮޑު ކުރިއެރުމެކެވެ. ހެރިސް ފައިނޭންޝަލް ގްރޫޕްގެ ޖޭމީ ކޮކްސް ވިދާޅުވި ގޮތުގައި، ޓްރަމްޕް އީރާނުގެ މައްސަލައިގައި ސުލްހަވެރި ހައްލެއް ހޯއްދަވަން މަސައްކަތް ކުރައްވާނެ ކަމަށް ބާޒާރުން ކުރިން ވެސް އޮތީ ލަފާކޮށްފަ އެވެ.
ނަމަވެސް، މައްސަލައަށް ދާއިމީ ހައްލެއް ލިބުމާ މެދު އަދިވެސް ވަނީ ނުތަނަވަސްކަން އުފެދިފަ އެވެ. އައިޖީ އެނަލިސްޓް ޓޯނީ ސައިކަމޯ ވިދާޅުވީ، މިއީ ރަނގަޅު ފެށުމެއް ކަމުގައި ވިޔަސް، ދާއިމީ ހައްލަކަށް ދިއުމުގެ ކުރިން އަދިވެސް ގިނަ ކަންތައްތަކެއް ނިންމަންޖެހޭ ކަމަށެވެ.
މި އެއްބަސްވުން މި އައީ ތެލުގެ އަގުތައް ވަރަށް ބޮޑަށް އުފުލިފައި އޮތް ދުވަސްވަރެއްގަ އެވެ. އެގޮތުން މިދިޔަ މަހުގެ ތެރޭގައި ތެލުގެ އަގު ވަނީ %50އަށް ވުރެ ބޮޑުވެ، ތާރީހީ ގޮތުން ބަލާއިރު މަހެއްގެ ތެރޭގައި އެންމެ ބޮޑަށް އަގު އުފުލުނު ފަހަރު ކަމުގައި ރެކޯޑު ކުރެވިފަ އެވެ.