ވޯލްޑް ކަޕް މެޗުތަކުގެ ނަތީޖާ ލަފާކޮށްގެން އަގުހުރި އިނާމުތަކެއް ހޯދުމުގެ ފުރުސަތު "ހަވީރު"ން ހުޅުވާލައިފި އެވެ.
"ހަވީރު" އޮންލައިންގައި މިހާރު ކުރިއަށް ގެންދާ މި ލަފާކުރުންތަކުގައި މުޅި މުބާރާތުގައި އެންމެ ގިނަ ނަތީޖާ ދިމާކޮށްގެން އެއް ވަނަ އަށް އަންނަ ފަރާތަކަށް "އީ ލައިފް" އިން ހުށަހަޅާފައި ވަނީ 46 އިންޗީގެ ތްރީޑީ ޓީވީއެކެވެ. އަދި ދެ ވަނަ އަށް އަންނަ ފަރާތަކަށް ސީހައުސް އިން ދެނީ ލ. އަތޮޅު ގަމުގައި އެތަނުން ހިންގާ ގެސްޓު ހައުސް، ސީހައުސް ޓޮޕްޑެކް ލާމުގައި ދެ މީހަކަށް އެއް ހަފުތާގެ ޗުއްޓީއެއް ހޭދަކޮށްލުމުގެ ޕެކޭޖެކެވެ. ތިން ވަނަ އިނާމަކަށް "އެކްސީޑު"ން ހުށަހަޅާފައި ވަނީ ޕްލޭސްޓޭޝަން ތިނެކެވެ.
"ނަތީޖާ ލަފާކުރުން އޮންލައިންގައި މިހާރު ވެސް މިދަނީ ޖަހަމުން. މިހާރު ވެސް ކިއުންތެރިންގެ ޝަގުވެރިކަން ބޮޑު،" 'ހަވީރު'ގެ އޮފިޝަލަކު ވިދާޅުވި އެވެ.
"ހަވީރު"ގައި ވޯލްޑް ކަޕަށް ޚާއްސަކޮށްފައިވާ ޕޭޖަށް ދިއުމުން ކިއުންތެރިންގެ ލަފާކުރުންތައް ކޮންމެ މެޗަކާ ދިމާލުން ފެންނާނެ އެވެ. އަދި ހަވީރު އޮންލައިންގެ ކޮންމެ ލިއުމަކަށް ކްލިކްކޮށްލުމުން ވާތް ފަރާތުގައި، މެޗުގެ ނަތީޖާ ލަފާކުރަން ޚާއްސަކޮށްފައިވާ ބައި ފެންނާނެ އެވެ. އަދި އެސްއެމްއެސް ލިއަން ވާ ގޮތް ވެސް އޭގައި ބުނެފައި އޮންނާނެ އެވެ.
އެސްއެމްއެސް ފޮނުވާނީ ހަމައެކަނި ދިރާގުގެ ނަންބަރުތަކުން، 505 އަށެވެ.
ދިރާގާ ގުޅިގެން "ހަވީރު" އޮންލައިނުން ވޯލްޑް ކަޕަށް ޚާއްސަކޮށްފައިވާ ޕޭޖްގައި ދުނިޔޭގެ އެންމެ ބޮޑު އެއް ނިއުސް އެޖެންސީ، އޭއެފްޕީގެ ފޮޓޯތަކާއި ޚަބަރު އަދި ތަފާސްހިސާބުތައް ވަގުތުން ވަގުތަށް ފެންނާނެ އެވެ.
"މިއީ ކިއުންތެރިންނަށް ވަރަށް ފަސޭހައިން އަދި ކުރުކޮށް ގިނަ މައުލޫމާތުތަކެއް ލިބޭނެ ޕޭޖެއް. އަޅުގަނޑުމެން ގަބޫލުކުރަނީ ނަތީޖާ ދިމާކުރަން ގިނަ ކިއުންތެރިން ޝައުގުވެރިވާނެ ކަމަށް. މެޗު ޝެޑިއުލަށް ދިއުމުން ކިއުންތެރިންގެ ލަފާކުރުންތައް ވެސް ފެންނާނެ،" އޮފިޝަލް ވިދާޅުވި އެވެ. * ސްކޯ ލަފާކުރުމަށް އެސްއެމްއެސް ކުރާނެ ގޮތް: MATCH (MATCH ID) (TEAM CODE): (TEAM CODE):