ރައްޔިތުންގެ މަޖިލީހުގެ މެމްބަރުންނަށް ލިބޭ 20،000ރ. ގެ ލިވިން އެލަވަންސް އުވާލައި އެއީ އަސާސީ މުސާރައިގެ ބައެއްގެ ގޮތުގައި ހަމަޖައްސަން ބައެއް މެމްބަރުން މަސައްކަތް ކުރައްވަނީ މަޖިލީހުގެ އިމްތިޔާޒުތަކާއި ބާރުތަކުގެ ބިލުގައި އޮތް މާއްދާއެއްގެ މަންފާ ނެގުމަށް ކަމަށް ކުޅުދުއްފުށީ ދެކުނު ދާއިރާގެ މެމްބަރު މުހަންމަދު ނަޝީދު މިއަދު ވިދާޅުވެއްޖެ އެވެ.
މިދިޔަ ބުރާސްފަތިދުވަހު ބޭއްވި މަޖިލީހުގެ އާންމު ކޮމިޓީގެ ބައްދަލުވުމުގައި ނިންމާފައި ވަނީ މެމްބަރުންގެ 20،000ރ ގެ ލިވިން އެލަވަންސް އުވާލައި އެއީ އަސާސީ މުސާރައިގެ ބަޔަކަށް ހަމަޖައްސަން މާލިއްޔަތު ކޮމިޓީ އަށް ލަފާ ދިނުމަށެވެ. މިހާރު މެމްބަރުންގެ އަސާސީ މުސާރަ އަކީ 42،500ރ. އެވެ. އަދި އަސާސީ މުސާރައިގެ ތެރެއަށް ލިވިން އެލެވަންސް ލައިފި ނަމަ މުސާރައަކަށް ވާނީ މަހަކު 62،500ރ. އެވެ.
ނަޝީދު އޭނާގެ ބްލޮގްގައި ލިޔުއްވާފައިވާ ގޮތުގައި އާންމު ކޮމިޓީގެ ނިންމުމާ އޭނާ ދެކޮޅެވެ. ސަބަބަކީ އިމްތިޔާޒުގެ ބިލުގައި އޮތް މާއްދާއެއް ފާސްވެ އަދި އާންމު ކޮމިޓީން ބޭނުންވާ ގޮތަށް މުސާރަ އަށް ބަދަލު ގެނެސްފި ނަމަ، މެމްބަރުކަން ކުރައްވާ ބޭފުޅުންނަށް ލިބިވަޑައިގަންނަވާ އިނާޔަތްތަކަށް ބޮޑު އިތުރުވުމެއް އަންނާނެތީ ކަމަށް އޭނާ ވިދާޅުވި އެވެ.
"މިހާރު މަޖިލީހުގެ ކޮމިޓީއެއްގައި ނިމެމުންދާ މަޖިލީހުގެ އިމްތިޔާޒުތަކާއި ބާރުތަކުގެ ބިލުގައި އޮތް މާއްދާއެއްގައި މިވަގުތަށް އޮންނަނީ، މަޖިލީހުގެ މެމްބަރަކު އެއް ދައުރު އަދާކޮށްފި ނަމަ، އޭނާގެ މުސާރައިގެ 30 އިން ސައްތަ މާލީ އިނާޔަތުގެ ގޮތުގައި ލިބޭނެ ކަމަށާއި ދެ ދައުރު އަދާކޮށްފި ނަމަ، މުސާރައިގެ 45 އިން ސައްތަ އިނާޔަތެއްގެ ގޮތުގައި ލިބޭނެ ކަމަށް ކަމުގައި ވާތީ، މުސާރަ އަށް މިވަގުތު މި ބަދަލު ގެނައުމުގެ އެއް ބޭނުމަކީ، އެ މާއްދާގެ މަންފާ ނެގުމަށް ކުރެވޭ ކަމެއް ކަމަށް ބެލެވުން. އަދި މި ދެންނެވި އިމްތިޔާޒު ބިލުގެ އެ މާއްދާ އެހެން އޮވެ ފާސްވެއްޖެ ނަމަ، އަދި މުސާރަ އަށް ގެންނަން އެ އުޅޭ ބަދަލު ގެނެސްފި ނަމަ، މެމްބަރުކަން ކޮށްފައި ދާ މީހުންނަށް ލިބޭ އިނާޔަތަށް ބޮޑު އިތުރުވުމެއް އަންނާނެކަން،" ނަޝީދު ވިދާޅުވި އެވެ.
އޭނާ ވިދާޅުވީ އިމްތިޔާޒު ބިލުގެ މާއްދާ ފާސްވެ އަދި މެމްބަރުންގެ 20،000ރ. ގެ ލިވިން އެލަވަންސް އަސާސީ މުސާރައިގެ ތެރޭގައި ހިމަނަން ފާސްކޮށްފި ނަމަ، މަޖިލީހުގެ ރައީސްގެ މުސާރަ ވެސް 53،000ރ. އިން 73،000ރ. އަށް ބޮޑުވާނެ ކަމަށެވެ. އަދި އޭގެ ފައިދާ އަކީ މަޖިލީހުގެ ރައީސްކަން ކުރެއްވީތީ މާލީ އިނާޔަތެއް ހަމަޖެހި، އެއީ މުސާރައިގެ 30 ޕަސެންޓަށް ވާނެ ކަމަށް ވެސް ނަޝީދު ލިޔުއްވި އެވެ.
އިމްތިޔާޒު ބިލުގައި މިހާރު އޮތް ގޮތުން މަޖިލީހުގެ ރައީސްކަން އެއް ދައުރު އަދާކޮށްފި ނަމަ މުސާރައިގެ 30 ޕަސެންޓް މާލީ އިނާޔަތުގެ ގޮތުގައި ލިބޭނެ އެވެ.
އާންމު ކޮމިޓީގެ ނިންމުން މާލިއްޔަތު ކޮމިޓީން ފާސްކޮށްފި ނަމަ މަޖިލީހުގެ ނާއިބު ރައީސްގެ މުސާރަ ވެސް ބޮޑުވެ، އެއް ދައުރު އެ މަގާމު ފުރުއްވައިފި ނަމަ 30 ޕސެންޓްގެ މާލީ އިނާޔަތް ލިބިވަޑައިގަންނަވާނެ ކަމަށް ނަޝީދު ވިދާޅުވި އެވެ.
އޭނާ ވިދާޅުވީ އެފަދަ މާލީ އިނާޔަތްތައް މަޖިލީހުގެ ރައީސުންނަށާއި މެމްބަރުންނަށް ދޭން ޖެހޭ ކަމަށް ގަބޫލުނުކުރައްވާ ކަމަށެވެ. އަދި އެ އިނާޔަތް "ތަންކޮޅެއް ރަނގަޅަށް ލިބޭނެ ގޮތެއް ހެދުމުގެ ބޭނުމުގައި" އަސާސީ މުސާރަ ބޮޑުކުރުމަކީ، އަމުދުން ގަބޫލުކުރައްވާނެ ކަމެއް ނޫން ކަމަށް ވެސް އޭނާ ލިއުއްވި އެވެ.
އޭނާ ވިދާޅުވީ އެކި މަގާމުތައް ފުރާ މީހުން އިސްތިއުފާ ދިނުމުން ނުވަތަ ރިޓަޔާ ކުރުމުން ލިބޭ މާލީ އިނާޔަތްތަކާއި އާންމު ޕެންޝަން ނިޒާމުގެ ތެރެއިން ލިބިދޭން ޖެހޭ ފައިސާ އަށް ދައުލަތުން ކުރާ ހޭދަ ދުވަހުން ދުވަހަށް ބޮޑުވާ ކަމަށެވެ.
"...ޕެންޝަނާއި މާލީ އިނާޔަތް ދިނުމަކީ މީގެ އަހަރުތަކެއް ފަހުން ދައުލަތަށް އުފުއްލޭވަރުގެ ބުރަޔަލަށް ވެދާނެ ކަމާ މެދު ޝައްކު އުފެދިފައިވާ ދަނޑިވަޅެއްގައި، އެ ބުރައިގެ މައްޗަށް އަނެއްކާ އިތުރު އެހެން މާލީ ބުރައެއް އުފަންކުރުމަކީ، އެއްގޮތަކަށް ވެސް ޒިންމާދާރު ގޮތެއް ކަމަށް ނުފެންނަ ކަމަށް" ނަޝީދު ވިދާޅުވި އެވެ.
މުސާރައިގެ ތެރެއަށް ލިވިން އެލަވަންސް ލާން ހުށަހެޅުއްވީ ކޮން މެމްބަރެއް ކަމެއް ނަޝީދުގެ ލިއުމުން ވެސް އެނގޭކަށް ނެތެވެ. އަދި އެގޮތަށް ހުށަހެޅީ ކޮން އަސާސަކަށް ބިނާކުރައްވާކަން ވެސް އެނގިވަޑައިނުގަންނަވާ ކަމަށް އޭނާ ލިއުއްވި އެވެ.