ޕީޕީއެމްގެ ވެރިކަމެއްގައި މަރަށް މަރުހިފާނެ ކަމަށް ޕީޕިއެމްގެ ވަގުތީ ނައިބު ރައީސް އުމަރު ނަސީރު ވިދާޅުވެއްޖެ އެވެ.
އެމްޑީޕީން ފުލުހުންނާއި ސިފައިންނަށް ހަމަލާދިނުމަށް ގޮވާލާފައިވާތީ ކަމަށް ބުނެ "ސަލާމަތީ ބާރުތަކާއެކު ޕީޕީއެމް" ގެ ނަމުގައި ރޭ އާޓިފިޝަލް ބީޗް ގައި ބޭއްވި އެއްވުމުގައި ވާހަކަފުޅު ދައްކަވަމުން އުމަރު ވިދާޅުވީ 2013 އިގެ ރިޔާސީ އިންތިހާބު ޕީޕީއެމަށް ކާމިޔާބު ވުމުން، މިހާރު މީހުން މަރާ ގޮތަށް ރާއްޖޭގައި މީހުން މާރާ، ވަޅިހަރައި މީހުންގެ އިތްފަތްތެރިކަން ފޭރިގަނެގެން ރާއްޖޭގައި އެވެސް ބަޔަކަށް ނޫޅެވޭނެ ކަމަށެވެ. މީހުން މަރާ މީހުންގެ މަރަށް މަރު ހިފާނެ ކަމަށެވެ.
"އަޅުގަނޑުމެން މި ގައުމުގައި އަމަންއަމާންކަން ގާއިމުކުރާނަން. ހއ. އަތޮޅުގެ ތުރާކުނުން ފެށިގެން ސ. އަތޮޅާއި ހަމައަށް. [ރާއްޖޭގައި] މީހުންނެއް ނުމެރޭނެ، ވަޅިއެއް ނުހެރޭނެ، މީހުންގެ އިތްފަތްތެރިކަމެއް ފޭރިއެއް ނުގަނެވޭނެ، [މީހުން މަރައިފިނަމަ] މަރަށް މަރުވެސް ހިފާނެ، ޕީޕިއެމްގެ ވެރިކަމެއްގައި ﷲ އިރާދަކުރެއްވިއްޔާމު މި ގައުމުގެ ރައްޔިތުން އިޖުތިމާއި އިގުތިސާދީ ސިއްހީ ސިޔާސީ ބަދަލުތަށް އަޅުގަނޑުމެން ގެންނާނަން،" އުމަރު ވިދާޅުވި އެވެ.
އުމަރު ވިދާޅުވީ ޕީޕިއެމްގެ ވެރިކަމެއްގައި މާލޭގެ މަގުތަކާއި މުޅިރާއްޖެ އަމާންކަމަށް ގެންނާނެ ކަމުގެ ފުރިހަމަ ޔަގީންކަން އޮތްކަމަށާއި މިއަދު އަނެއްކާވެސް ހިރަފުސް ފޮޅާލުމަށްފަހު ހުރިހާ ފަހުލަވާނުން ނުކުންނަންވީ 2013 ވަނަ އަހަރުގެ އިންތިހާބު ކާމިޔާބު ކުރުމަށް ކަމަށެވެ.
"ޕީޕީއެމުން އިރާދަކުރެއްވިއްޔާ މިގައުމުގެ ރިޔާސަތާ ހަވާލުވުމަށްފަހު މަގުމަތީގައި ވައްވައްޖަހާ އެކިވައްތަރުގެ ޖަނަވާރުތަކަށް މަގުތަކުގައި ނޫޅެވޭނެ. ކުރީގެ ރައީސް އިބްރާހިމް ނާސިރުގެ ވެރިކަމުގައި މާލޭގެ މަގުމަތީގައި އުޅުނު ބަކަރިތަކާއި ރާމާމަކުނުތައް ވެސް މާލެއިން ބޭރުކޮށްފައި ވަނީ. އެހެންވީމަ މާލޭގައި މުޅިން މަނާވާނެ ސިއްހީ ކަންތައް ތައް ގޯސްވެދާނެތީ އެކަމަށްޓަކައި މާބާރަށް ހަޅެއްލަވާ ބައެއް ވައްތަރުގެ ޖަނަވާރު ރަށުތެރޭގައި އުޅުން،" އުމަރު ވިދާޅުވި އެވެ.
އޭނާ ވިދާޅުވީ ނަޝީދު ވެރިކަމަށް ވަޑައިގެންފަހުން ކުރެއްވި މަސައްކަތް ކާމިޔާބުވީ ފެބުރުއަރީ ހަތްވަނަ ދުވަހު ކަމަށާއި އެދުވަހު ރަންގޯލު ކާމިޔާބުކުރެއްވުމަށް ފަހު ގެއަށް އެނބުރި ވަޑައިގެންނެވި ކަމަށެވެ. ނަމަވެސް އެމްޑީޕީން މަގުމަތީގައި ކިތައްމެ ވަރަކަށް ހަޅޭއްލެވިޔަސް މިހާރުގެ ވެރިކަން ވައްޓައި ނުލެވޭނެ ކަމަށެވެ.
މާ ގިނަ ބަޔަކާ ނުލައި ޕީޕީއެމުން އާޓިފިޝަލް ބީޗްގައި ބޭއްވި އެއްވުން ހިނގަމުން ދަނިކޮށް އެމްޑީޕީގެ ސީދާ ހަރަކާތުގެ މުޒާހަރާގެ ހިނގާލުމެއް އެހިސާބާ ހަމަވެ ދެ ބައިމީހުންގެ މެދު ހަޑިހުތުރު ބަސް ބޭނުންކޮށް ޒުވާބެއް ވަނީ ކޮށްފައެވެ. އެ ޒުވާބުގެ ތެރޭގައި ބިހާއި ކުލަފަދަ ތަކެތި އެމްޑީޕީގެ މުޒާހަރާގެ ބައިވެރިން ގެތެރެއިން އާޓިފިޝަލް ބީޗްގައި އެއްވެ ތިބި މީހުންގެ ތެރެއަށް އުކި އިރު އާޓިފިޝަލް ބީޗްތެރެއިން އެމްޑީޕީގެ މުޒާހަރާގެ ތެރެއަށް ވެސް އެއްޗެހި އުކި އެވެ. ނަމަވެސް ބޮޑު ހަމަނުޖެހުމަކަށް ނުދަނީސް ރަޔަޓް ފުލުހުން ވަނީ ދެބައިމީހުން ކޮންޓްރޯލް ކޮށްފައެވެ.
ޕީޕިއެމުން ބުނެފައި ވަނީ އެފަދަ ބސިލްސިލަ އެއްވުމެއް ކޮންމެ ހޮނިހިރު ދުވަހުއްގެ ރޭ ބާއްވާނެ ކަމަށެވެ.