ވަޒީރުންނަށް ރުހުން ދިނުމުގެ މައްސަލައިގައި "އުނބަށް ޖެހި ވަޒީރުން" ގެ ނަމުގައި އިދިކޮޅު ޑީއާރުޕީން މުޒާހަރާއެއް ބާއްވާތީ އެކަމަށް ފާޑު ވިދާޅުވެ އެ މުޒާހަރާގައި ބައިވެރިވެ ވަޑައިނުގަންނަވާނެ ކަމަށް މާފަންނު ހުޅަނގު ދާއިރާގެ ޑީއާރުޕީ މެމްބަރު އަބްދުﷲ އަބްދުއް ރަހީމް މިއަދު ވިދާޅުވެއްޖެ އެވެ.
މިދިޔަ އޯގަސްޓް 27 ވަނަ ދުވަހުގެ ރޭ ސަރުކާރު ހިންގާ އެމްޑީޕީ އަށް ސޮއިކުރެއްވުމަށް ފަހު 24 ގަޑިއިރު ނުވަނީސް ސޮއި އަނބުރާ ގެންދެވި އަބްދުﷲ އަބްދުއް ރަހީމް "ހަވީރަ" ށް ވިދާޅުވީ ސުޕްރީމް ކޯޓުގެ ނިންމުމާ ދެކޮޅަށް ކުރާ އެއްވެސް ކަމެއްގައި ބައިވެރިވެވަޑައިގަންނަވަން ބޭނުން ނުވާ ކަމަށެވެ.
"ސުޕްރީމް ކޯޓުގެ ނިންމުމާ ދެކޮޅަށް ކުރާ ކަމެއްގައި އަޅުގަނޑު ބައިވެރިއެއް ނުވާނަން. އިންސާފު ހޯދަން ދާން ހުރި ތަނަކީ އެއީ. އެއީ ރާއްޖޭގެ އެންމެ މަތީ ކޯޓު. އެ ތަނާ ދެކޮޅަށް ނުކުމެގެން ކޮން އިންސާފެއްތޯ ލިބޭނީ؟ އަޅުގަނޑު ގަބޫލެއް ނުކުރަން ވަޒީރުންނަށް ރުހުން ދިނުމާ ގުޅޭ ގޮތުން މަގުމައްޗަށް ނުކުމެގެން އިންސާފު ލިބޭނެ ކަމަކަށް،" އޭނާ ވިދާޅުވި އެވެ. "ސުޕްރީމް ކޯޓާ ދެކޮޅަށް ނުކުތުމަކީ ހެޔޮވާ ވަރުގެ ކަމެއް ނޫން."
އަބްދުﷲ އަބްދުއްރަހީމް ވިދާޅުވީ ވަޒީރުންނަށް ރުހުން ދިނުމުގެ މައްސަލަ އަށް ވުރެ މާ މުހިންމު ކަންތައްތައް ކުރިމަތިވެފައިވާ އިރު އެކަންކަމާ ގުޅިގެން މުޒާހަރާއެއް ނުބާއްވައި މިފަހަރު މުޒާހަރާ ބާއްވަނީ "ޕޮޕިއުލަރިޓީ ކޮންސެޕްޓެއްގެ ވިސްނުމެއްގެ ތެރެއިން" ކަމަށް ގަބޫލުކުރައްވާ ކަމަށެވެ.
"އުނބަށް ޖެހި ވަޒީރުން" ގެ ނަމުގައި ޑީއާރުޕީން ބާއްވާ މި މުޒާހަރާގައި ބައިވެރިވެ ވަޑައިނުގެންނެވުމުގެ ފަހަތުގައި ޕާޓީއާ ދޭތެރޭ ހިތްހަމަނުޖެހުމެއް އޮތީތޯ ދެންނެވުމުން އޭނާ ވިދާޅުވީ "މިކަމުގައި ހިޔާލު ތަފާތުވުމެއް އުޅެނީ" ކަމަށެވެ.
ޑީއާރުޕީން ބުނެފައި ވަނީ މިރޭ އެ ޕާޓީން މުޒާހަރާ އަށް ނުކުންނަނީ ސުޕްރީމް ކޯޓާ ދެކޮޅަށް ނޫން ކަމަށާއި ވަޒީރުންނަށް ރުހުން ދިނުމަށް ސަރުކާރުން އެކި ގޮތްގޮތުން ހުރަސް އަޅާތީ ކަމަށެވެ.
"ވަޒީރުން މަޖިލީހަށް ހާޒިރު ނުވާތީ ރައްޔިތުންނާ ގުޅޭ އެތައް ކަމެއް އެހެރީ ހުއްޓިފައި. އޭގެ ސަބަބުން އެތައް މައްސަލަތަކެއް އެބަ ކުރިމަތިވޭ. އަޅުގަނޑުމެންގެ ދާއިރާގައި ހުންނަ ފުރުގާން މިސްކިތް އިމާރާތް ނުކުރެވި އެތައް ދުވަހެއް ވީއިރު އެކަމާ ސުވާލު ކޮށްލަން ވެސް ވަޒީރަކު މަޖިލީހަށް ހާޒިރު ކުރެވޭނެ ގޮތެއް ނެތް،" ގަލޮޅު ދެކުނު ދާއިރާގެ އަހުމަދު މަހުލޫފް ވިދާޅުވި އެވެ. "އެ މިސްކިތް 13 މަސް ތެރޭގައި ނިމޭނެ ކަމަށް ކުރިން ބުނެފައި އޮތީމަ އެ މުއްދަތު ހަމަވާން ތިން މަހަށް ވުމުން އެކަމާ ގުޅޭ ސުވާލުތައް ފޮނުވިތަނާ ވަޒީރުން އިސްތިއުފާ ދެއްވައިފި. ދެން މި އުޅެނީ ވަޒީރަކު މަޖިލީހަށް ހާޒިރު ކުރެވޭނެ ގޮތެއް ނެތިގެން. މި މައްސަލަތައް މިހެން ހުރީމަ މުޒާހަރާ މި ކުރަނީ."
އޭނާ ވިދާޅުވީ ސުޕްރީމް ކޯޓުން ރައްޔިތުންގެ މަޖިލީހުގެ މައްޗަށް ނެރުނު އަމުރަށް ޑީއާރުޕީން އިހުތިރާމް ކުރާ ކަމަށެވެ.