ޖުމްހޫރީ ޕާޓީ އަށް ނިސްބަތްވާ ރައްޔިތުންގެ މަޖިލީހުގެ އެއްވެސް މެމްބަރަކު ޕީޕީއެމާ ނުގުޅޭނެ ކަމަށާއި އެކަމަކު މަޖިލިސް މެމްބަރުންތަކެއް ޖޭޕީއާ ވަރަށް އަވަހަށް ގުޅިވަޑައިގަންނަވާނެ ކަމަށް، އެ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ. ޖޭޕީ އަށް ބައެއް މީހުން ސޮއިކުރުމަށް އެ ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ގާސިމް ވިދާޅުވި ގޮތުގައި ޕީޕީއެމާ އެކު ހަދާފައިވާ ކޯލިޝަނުން ވަކިވެފައިވާކަން ޖޭޕީން މިދިޔަ ހަފުތާގައި އިއުލާން ކުރުމާ އެކު، އެ ޕާޓީއާ ގުޅެން ބޭނުންވާ ގިނަ ބަޔަކު ދަނީ ޝައުގުވެރިކަން ފާޅުކުރަމުންނެވެ. އޭގެ ތެރޭގައި ޕީއެޗްޑީ ހައްދަވާފައިވާ ބޭފުޅުންނާއި މެޑިކަލް ޑޮކްޓަރުންގެ އިތުރުން، މަޖިލިސް މެމްބަރުން ވެސް ހިމެނޭކަން އޭނާ ފާހަގަކުރެއްވި އެވެ. ގާސިމް މިއަދު ނޫސްވެރިންނާ ވާހަކަދައްކަވަނީ: ޖޭޕީއާ ގުޅެން ބޭނުންވާ ގިނަ ބަޔަކު ޝައުގުވެރިކަން ފާޅުކުރަމުންދާ ކަމަށް ވިދާޅުވި.-- ހަވީރު ފޮޓޯ: ނިޝާން އަލީ ޕީޕީއެމުން މިރޭ ބާއްވާ ޖަލްސާގައި ޖޭޕީގެ ދެ މެމްބަރަކު އެ ޕާޓީ އަށް ސޮއިކުރައްވާނެ ކަމަށް ފެތުރިފައިވާ އަޑުތައް، ގާސިމް ސިފަކުރެއްވީ، ސަރުކާރުން ފަތުރާ ޕްރޮޕެގެންޑާގެ ގޮތުގަ އެވެ. "އެއީ މިރޭ ބާއްވަން އުޅޭ ޖަލްސާ އަށް މީހުން އެއްކުރަން ކުރާ ކަމެއް. އަޅުގަނޑުމެން ޖުމްހޫރީ ޕާޓީއަކުން އަޅުގަނޑަށް ކަށަވަރުކުރެވޭ ގޮތުގައި އެއްވެސް މެމްބަރަކު ހަމަ ގައިމު ވެސް ޕީޕީއެމަށް ސޮއިކުރާކަށް ނެތް، ޕާލިމެންޓް މެމްބަރެެއް،" މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމް ވިދާޅުވި އެވެ. ކޯލިޝަންގެ ޖަލްސާއެއްގައި ރައީސް ޔާމީނާއި ޖޭޕީގެ ލީޑަރު ގާސިމް ސަލާމް ކުރައްވަނީ: ކޯލިޝަން ރޫޅި، ޕީޕީއެމް އާއި ޖޭޕީގެ މެދުގައި ވަނީ ވަރަށް ބޮޑަށް މައްސަލަ އުފެދިފައި--ހަވީރު ފައިލް ފޮޓޯ މަޖިލީހުގައި ޖޭޕީ ތަމްސީލުކުރައްވާ 12 މެމްބަރުންގެ ތެރެއިން އެއްވެސް ބޭފުޅަކު އެ ޕާޓީ ދޫކުރައްވައި ވަޑައިނުގަންނަވާނެ ކަމުގެ ޔަގީންކަން ގާސިމް ދެއްވާފައި މިވަނީ، ޖޭޕީގެ މަޖިލިސް ދެ މެމްބަރަކު ޕީޕީއެމަށް ސޮއިކުރައްވަން ނިންމަވާފައިވާ ކަމަށް، އެ ޕާޓީގެ އޮފިޝަލުން ވެސް ބައެއް މީޑީއާތަކުގައި ވިދާޅުވެފައި ވަނިކޮށެވެ. ޖޭޕީގެ އެ ދެ މެމްބަރުންނާ އެކު، ވެލިދޫ ދާއިރާގެ އެމްޑީޕީ މެމްބަރު އަބްދުﷲ ޔާމީން ވެސް، މިރޭ ކާނިވާ ސަރަހައްދުގައި އޮންނަ ޖަލްސާގައި ޕީޕީއެމަށް ސޮއިކުރައްވާނެކަން "ހަވީރަ"ށް ވަނީ ކަށަވަރުވެފަ އެވެ. ޖޭޕީ އަށް މިއަދު ސޮއިކުރެއްވި ބޭފުޅުންގެ ތެރޭގައި ދުވާފަރު ދާއިރާގެ ކުރީގެ މަޖިލިސް މެމްބަރު މުހައްމަދު ޒުބައިރު ހިމެނިވަޑައިގަންނަވަ އެވެ. މީގެ އިތުރުން ވެސް، ބައެއް ދާއިރާތަކުން ގިނަ އަދަދެއްގެ ފޯމް ޕާޓީގެ ލީޑަޝިޕާ މިއަދު ހަވާލުކޮށްފައިވެ އެވެ.