ޕީޕީއެމްގެ ރިޔާސީ ޕްރައިމަރީ ބާތިލްކުރެވެން ނެތް ކަމަށް ސިވިލް ކޯޓުން ހުކުމްކުރި ނަމަވެސް އެ މައްސަލަ އަލުން ބަލައި ދިނުމަށް އެ ކޯޓަށް މާދަމާ ހުށަހަޅުއްވަން ކުރިން ވެސް އެކަމުގައި ދައުވާ ކުރެއްވި އުމަރު ނަސީރު ނިންމަވައިފި އެވެ. އެހެން ނަމަވެސް ސިވިލް ކޯޓުން މިދިޔަ ބުރާސްފަތި ދުވަހު ކުރި ހުކުމްގައި ވަނީ މެމްބަރަކު އެހެން ޕާޓީއަކަށް ބަދަލުވި ނަމަވެސް އެމީހުން ޕީޕީއެމްގެ ދަފްތަރުން އުނި ނުކުރުމަށް ޕީޕީއެމުން ނިންމާފައިވަނީ ގާނޫނާ ހިލާފަށް ކަމަށެވެ. އެކަމަކު އެހެން ޕާޓީއެއްގެ މެމްބަރަކު ޕީޕީއެމްގެ ޕްރައިމަރީގައި ވޯޓުލިކަން އުމަރުގެ ފަރާތުން ސާބިތުކޮށް ނުދެވޭ ކަމަށް އެ ހުކުމްގައިވެ އެވެ. "ހަވީރާ" ވާހަކަ ދައްކަވަމުން އުމަރު މިއަދު ވިދާޅުވީ ގާނޫނާ ހިލާފުވި ބަޔަކު ޕީޕީއެމްގެ ރަޖިސްޓްރީގައި ތިބިކަން ހުކުމުން ސާފުކޮށް އެނގޭ ކަމަށާއި އެފަދަ ފަރާތްތަކުން ކޯޓުގައި ހެކިބަސް ދޭން ވެސް ތައްޔާރަށް ތިބި ކަމަށެވެ. އަދި އެ މައްސަލަ އަލުން ބަލައި ދިނުމަށް މާދަމާ ސިވިލް ކޯޓަށް ހުށަހަޅުއްވަނީ އެގޮތަށް ވޯޓު ލާފައިވާ ދެ ފަރާތެއްގެ ހެކިބަސް ހިމެނޭ ސިޓީއަކާ އެކުގައި ކަމަށް އޭނާ ވިދާޅުވި އެވެ. އެ މައްސަލަ ސިވިލްކޯޓުން ބަލައި ނުދީފި ނަމަ ހައި ކޯޓުގައި އިސްތިއުނާފު ކުރައްވާނެ ކަމަށް ވެސް އުމަރު ވިދާޅުވި އެވެ. "ލީގަލް ބޭފުޅުން އަޅުގަނަޑަށް ވަރަށް ސްޓްރޯންގްކަން އޮޕީނިއަން ދެއްވާ އަލުން މި މައްސަލަ ބަލަން ހުށަހެޅިދާނެ ކަމަށް. މިފަހަރު ހެކިންނާ އެކު އަޅުގަނޑު މި ހުށަހަޅަނީ އެ މައްސަލަ ސިވިލް ކޯޓަށް. އެހެންވީމާ ސާބިތުވާނެ ކަމުގެ ޔަގީންކަން ބޮޑު. މި މައްސަލަ އަޅުގަނޑު އެއްގޮތަކަށް ވެސް ދުލެއް ނުކޮށްލާނަން. މިއީ [ވޯޓު އޮޅުވާލުން] މިހާރު ރާއްޖޭގެ އެކަކުވެސް ގަބޫލުކުރާނެ ކަމެއް ނޫން،" އުމަރު ވިދާޅުވި އެވެ. ސިޔާސީ ޕާޓީތަކުގެ ގާނޫނުގެ ދަށުން ޕާޓީއެއްގެ މެންބަރަކަށް ވެވޭނީ ކިހާ ހިސާބަކުންކަން ކަނޑައަޅަން އެ ގާނޫނު މާނަ ކުރުމަށް މާދަމާ ސުޕްރީމް ކޯޓަށް މައްސަލައެއް ހުށަހެޅުމަށް ވެސް އުމަރު ވަނީ ނިންމަވައިފަ އެވެ. އޭނާ ވިދާޅުވި ގޮތުގައި ޕާޓީއެއްގެ މެންބަރަކަށް ވަނީ އިލެކްޝަންސް ކޮމިޝަންގެ ދަފްތަރުގައި ރަޖިސްޓްރީ ވުމަށް ފަހު ކަމަށް ނޫނީ ޕާޓީއަކަށް ސޮއިކުރާ ހިސާބަކުން ކަން މިހާރު ގާނޫނުން ސާފެއް ނުވެ އެވެ. "އެކަން އެބަޖެހޭ މާނަ ކުރެވެން. އެއީ މި މައްސަލައިގައި ވެސް ސުޕްރީމް ކޯޓުގެ މާނަ އަންނަ ގޮތަކުން އަޅުގަނޑުމެންނަށް ކޭސް ވިން ވާނެ،" އުމަރު ވިދާޅުވި އެވެ.