މާލޭގެ އުސް އިމާރާތަކުން ފުރާޅެއްގެ މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު އެތަނުން ވެއްޓުނީ އަމިއްލައަށް ނޫން ކަމަށާއި ވެއްޓުނު ވަގުތު އޭނާއާއެކު ބަޔަކު މީހުން ކަމަށް ޔުމްނުއާ ހަވާލާދީ އޭނާގެ އާއިލާއިން މިރޭ ބުނެފި އެވެ.
ކަރާއި އުނަގަނޑުގެ އޮޕަރޭޝަނެއް ކުރުމަށްފަހު ރިކަވާ ވަމުން އަންނަ ޔުމްނު، 21، ހޭ އަރައިގެން، އޭޕްރީލް 18، ވަނަ ދުވަހު ހިނގި ހާދިސާގެ ބައެއް ވާހަކަތަކެއް މިއަދު އާއިލާއަށް ކިޔައިދީފައިވާ ކަމަށް ޔުމްނުގެ ދައްތަ ރާއްޖެ ޓީވީއަށް ދިން އިންޓަވިއުއެއްގައި ބުންޏެވެ.
ޔުމްނުގެ ދައްތަގެ ނަމެއް އޭނާގެ އިންޓަވިއުގައި މިރޭ ހާމައެއް ނުކުރެ އެވެ. އަދި އާއިލާއިން މީޑިއާއަށް މައުލޫމާތު ދޭ ފޯކަލް ޕޮއިންޓުން ފޯނު ނުނަގާތީ، މި ހަބަރު ޝާއިއު ކުރިއިރު ވެސް އިންޓަވިއު ދިން މީހާގެ ނަން އޮޅުންފިލުވިފައެއް ނުވެ އެވެ.
ލައިވް ބްރޯޑްކާސްޓެއްގައި ވާހަކަ ދައްކަމުން ޔުމްނުގެ ދައްތަ ބުނީ ހ. ފެންޓެނޯއީ ގެއިން ޔުމްނު ވެއްޓުނީ އަމިއްލައަށް ނޫން ކަމަށް ބުނެފައިވާ ކަމަށެވެ. އަދި ވެއްޓުނު ވަގުތު، އެ މައްސަލައިގައި މިވަގުތު ހަމައެކަނި ހައްޔަރުކޮށްފައި ހުރި ރައުދު އަހުމަދުގެ އިތުރުން ތިން މީހަކު ހުރި ކަމަށް ޔުމްނުއާ ހަވާލާދީ އާއިލާއިން ބުންޏެވެ.
"އެ ގޭގައި ހިނގި ހާދިސާ، އެ ވީ ކަމަކީ، ޔުމްނުގެ އަނގައިން ބުނެފައި ވަނީ އެފަދަ ކަމެއް އަމިއްލައަކަށް ނުކުރަމޭ. އަޅުގަނޑު އަމިއްލައަކަށް ނުވެއްޓެމޭ އެތަނަކުންނެއް،" އޭނާ ބުންޏެވެ. "އެތާނގައި ރައުދުގެ އިތުރުން ވެސް ހަތަރު މީހަކު ހިމެނޭ."
ހ. ފެންޓެނޯއީއަކީ ޔުމްނު ކުރިން ވެސް ގޮސް އުޅުނު ގެއެއް ކަމަށް އޭނާ ބުނެފައިވާ ކަމަށް އާއިލާއިން ބުންޏެވެ. އަދި ވެއްޓުނު ދުވަހު އެ ގެއަށް ދިޔައީ މައްސަލައިގައި ހިމެނޭ އިތުރު މީހެއް ކަމަށްވާ ޔޫސުފް ޔައްސާރު އަބްދުލްގަފޫރުގެ ދައުވަތަކަށް ކަމަށް ޔުމްނު ބުނި ކަމަށް އާއިލާއިން ބުނެ އެވެ.
"ޔުމްނު އަޅުގަނޑުމެންނަށް ކިޔައިދީފި މިއަދު އެ ގެއަކީ ޔުމްނު ކުރިން ވެސް ގޮސް އުޅުން ގެއެއް ކަމަށް. އަދި އެ ގެއަށް އިންވައިޓްކޮށްފައި ވަނީ ޔައްސާރު ކަމަށް. ގޭގެ ލޮކޭޝަން ވެސް ފޮނުވީ ޔައްސާރު. ދެ ގެއަށް ވެސް ދިޔައީ ޔައްސާރުގެ އިންވިޓޭޝަންއާއެކީގައި،" ޔުމްނުގެ ދައްތަ ބުންޏެވެ.
ޔުމްނުގެ އާއިލާގެ މައްސަލައަކީ ޔުމްނު ވެއްޓުމުން ވެސް އެތަނުގައި ތިބި މީހުން އަޅައިނުލާ ދިޔުން ކަމަށް ޔުމްނުގެ ދައްތަ މިރޭ ބުންޏެވެ.
"އަޅުގަނޑުމެން ޑިނައީއެއް ނުކުރަމޭ ކަންތައްވި ގޮތެއް. މަރަށް ދޫކޮށްލި މައްސަލައޭ އަޅުގަނޑުމެންގެ މައްސަލައަކީ. މަރަށް ދޫކޮށްލާފައި އެ ފުރާޅުގަނޑު މަތީ މި ކުއްޖާ އޮތީ ކިހާ އިރެއްވަންދެންކަން ވެސް ހަމަ އެނގޭނީ އެމީހުންނަށް. މަރަށް ދޫކޮށްލާފައި ދިޔައީ ވެސް އެމީހުން،" އޭނާ ބުންޏެވެ.
ޔުމްނުއަށް އިންސާފު ލިބޭނެތޯ އޭނާ މިއަދު ސުވާލު ކުރި ކަމަށް ވެސް އާއިލާއިން ބުންޏެވެ.
"އެންމެ ފަހު ބަހަކަށް ޔުމްނު ބުނެފައި ވަނީ އަޅުގަނޑު ކައިރީގައި، އިންސާފު ލިބޭނެހޭ، ޔަގީންހޭ އިންސާފު ލިބޭނެކަން. މިއީ އަމިއްލައަށް ކުރި ކަމެއް ނޫނޭ، މިއީ ބަޔަކު ކުރި ކަމެކޭ. އޭނަ އެތަނަށް މަރަށް ދޫކޮށްލީ ބަޔަކުއޭ. އޭނަ އަމިއްލައަކަށް ނޫނޭ އެކަން ކުރީ،" އޭނާ ބުންޏެވެ.