އީރާނާއި އެމެރިކާ-އިޒްރޭލާ ދެމެދު ހިނގަމުންދާ ހަނގުރާމައިގެ ސަބަބުން ގަލްފުގެ ކަނޑުދަތުރުފަތުރަށް އެތައް މަހެއްވަންދެން ބުރޫއަރާފައި އޮތުމަށް ފަހު، ގުދުރަތީ ގޭސް (އެލްއެންޖީ) އުފުލާ ޓޭންކަރަކާއި ތެޔޮ އުފުލާ ބޮޑު ސުޕަ-ޓޭންކަރެއް ހޮރްމޫޒް ކަނޑުއޮޅިން ކާމިޔާބުކަމާ އެކު ނުކުމެ، ޕާކިސްތާނާއި ޗައިނާއަށް މިސްރާބު ޖަހައިފި އެވެ.
ކަނޑުދަތުރުފަތުރުގެ މައުލޫމާތުތަކުން ދައްކާ ގޮތުގައި، މިދިޔަ މާޗު މަހު ގަތަރުގެ ރަސް ލައްފާން ބަނދަރުން މުދާ ބަރުކުރި 'ފުވައިރިތު' ނަމަކަށް ކިޔާ އެލްއެންޖީ ޓޭންކަރު، ޕާކިސްތާނަށް ދިއުމަށްޓަކައި މިއަދު ވަނީ ކަނޑުއޮޅި ހުރަސްކޮށްފަ އެވެ. ބަހާމާސްގެ ދިދަ ޖަހާފައިވާ މި އުޅަނދު މާދަމާ މުދާ ބޭލުމަށް ހަމަޖެހިފައިވާ ކަމަށް ބެލެވެ އެވެ.
މީގެ އިތުރުން، ޗައިނާއަށް ގެންދިއުމަށް، އިރާގުން އެކްސްޕޯޓްކުރި ދެ މިލިއަނެއްހާ ފީފާގެ ސާފުނުކުރާ ތެޔޮ ބަރުކޮށްގެން އޮތް 'އީގަލް ވެރޯނާ' ސުޕަ-ޓޭންކަރު ވެސް، ގާތްގަނޑަކަށް ތިން މަސްދުވަހު ތާށިވެފައި އޮތުމަށް ފަހު މިދިޔަ ހޮނިހިރު ދުވަހު ވަނީ ގަލްފުން ނުކުމެފަ އެވެ. މި އުޅަނދު ޖޫން މަހުގެ 12 ވަނަ ދުވަހު ޗައިނާގެ ނިންގްބޯ ބަނދަރަށް ފޯރާނެ ކަމަށް ލަފާކުރެވެ އެވެ.
މި އުޅަނދުތަކަކީ އީރާނުން ކަނޑައަޅާފައިވާ ހާއްސަ ދަތުރުފަތުރުގެ މަގެއްގެ ދަށުން މި މަހު އެ ސަރަހައްދު ހުރަސްކުރި މަދު އުޅަނދުތަކުގެ ތެރޭގައި ހިމެނޭ އުޅަނދުތަކެކެވެ. ނިމިދިޔަ ހަފުތާގައި ވެސް ތެޔޮ އުފުލާ ވަރަށް ބޮޑު ތިން އުޅަނދަކުން ހަ މިލިއަނެއްހާ ފީފާގެ ސާފުނުކުރާ ތެޔޮ ޗައިނާ އާއި ދެކުނު ކޮރެއާއަށް އުފުލާފައިވެ އެވެ.
މިދިޔަ 28 ފެބްރުއަރީގައި ފެށުނު މި ހަމަނުޖެހުންތަކުގެ ސަބަބުން، ދުނިޔޭގެ ތެލާއި އެލްއެންޖީ ސަޕްލައިގެ ގާތްގަނޑަކަށް ފަސްބައިކުޅަ އެއްބައި އުފުލާ މުހިންމު މަގެއް ކަމަށްވާ ހޮރްމޫޒް ކަނޑުއޮޅީގެ ދަތުރުފަތުރަށް ވަނީ ވަރަށް ބޮޑަށް ހުރަސް އެޅިފަ އެވެ. ހަނގުރާމަ ފެށުމުގެ ކުރިން ދުވާލަކު 125 އާއި 140އާ ދެމެދުގެ އަދަދަކަށް އުޅަނދުތައް މި ސަރަހައްދުން ދަތުރުކުރި ނަމަވެސް، މިހާރު ވެސް ގާތްގަނޑަކަށް 20,000 ފަޅުވެރިން ތިބީ މި ސަރަހައްދުގައި ހުރި އުޅަނދުތަކުގައި ތާށިވެފަ އެވެ.